今次去到新界元朗錦田,區內隱藏唔少慢活文青地,周末可慢遊錦田,既可打卡,亦可歎盡錦田區內高水準嘅街坊食店。錦田歷史悠久,以村屋為主,有唔少城中古村落,其中一條古村附近就隱藏唔少好地方,有農莊、亦有露營地,最啱拍拖兩個人去錦田2日1夜遊。
3低本地遊,  兩個人旅吓行,  和你Taste

【3低本地遊】錦田慢活文青遊 必食2間街坊店 探訪城中古村連2日1夜懶人露營地

個人瀏覽過





今次去到新界元朗錦田,區內隱藏唔少慢活文青地,周末可慢遊錦田,既可打卡,亦可歎盡錦田區內高水準嘅街坊食店。錦田歷史悠久,以村屋為主,有唔少城中古村落,其中一條古村附近就隱藏唔少好地方,有農莊、亦有露營地,最啱拍拖兩個人去錦田2日1夜遊。

第一站﹕錦田紅磚屋

由錦上路交通交匯處旁邊錦上路跳蚤市場為起點,穿過盈匯坊,可直達錦上路旁邊嘅錦田紅磚屋。錦田紅磚屋係一個似足日本地下街市集嘅跳蚤市場,紅磚屋僅於星期六、日及公眾假期先開放。事實上,紅磚屋前物係蠟燭廠,於2007年先改成室內市集,充滿懷舊味道同文青感,由52間紅磚砌成嘅小店組成,可以臨走發掘吓心頭好。其中,有間手工蠟燭店叫Angel Candle,燭台、香薰蠟燭款式新穎特別,仲有再造環保蠟燭,款款小物都好精緻。

延伸閱讀﹕錦田紅磚屋前身係蠟燭廠 室內市集52間小店驚喜尋寶

第二站﹕錦田壁畫村

從錦田紅磚屋行到錦田公路,沿途會不斷見到唔少壁畫,事實上錦田擁有香港其中一個藝術小村落,錦田壁畫村亦早已聞名,每幅壁畫分佈喺錦田各處地方,要搵晒咁多幅壁畫就要睇清楚地圖,不妨拍拖兩個人行勻成個錦田啦!錦田由2017年下旬起開始社區活化計劃,打造成一條壁畫村,經義工們努力創作同繪畫,喺區內加入一幅又一幅充滿愛嘅壁畫,包括圍村之愛同天佑之愛,發揚村民互愛精神。至今壁畫村有逾40幅壁畫,當中有部份壁畫仍未完工,顯然即將會有人為壁畫髹上色彩。行過吉慶圍、水頭村,會發現一間以CoHee Studio命名嘅咖啡店,係一間排隊店,有興趣可以去買杯咖啡飲呢!

延伸閱讀﹕錦田壁畫村40幅壁畫充滿愛 分佈全區任打卡

第三站﹕帶記餐廳

嚟到錦田,好多人都會去靠近西鐵錦上路站嘅盈匯坊搵食,位置方便,一個商場有唔少食店。不過,要食好嘢當然唔係咁簡單,經過盈匯坊繼續前行,直到錦田公路,會發現錦田大馬路上有一間叫帶記餐廳嘅真街坊小店。餐廳明顯比較陳舊,毫不起眼,望落好低調,似一般茶記。不過,食物水準非常有驚喜,午餐有16款選擇,有別於茶記,以意粉、天使麵為主,周末套餐鮮茄湯麵套餐、新鮮漢堡包餐都係記者特別推介嘅美食。

延伸閱讀﹕錦田街坊茶記爆汁牛漢堡 低調高手製超濃蕃茄湯

第四站﹕錦田逢吉鄉

錦田曾被稱為岑田,明朝先改為錦田,原本係盆地,係元朗六鄉其中之一。開埠前,居民以鄧氏為主,由宋朝開始建立圍村,元朝時曾喺曾叫做岑田,到明朝時改名為錦田,鄧氏建立嘅圍村有北圍、南圍、泰康圍、吉慶圍、永隆圍。直到清朝時,錦田居民曾經歷沿海劃地嘅遷海、遷界措施,需要內遷,康熙帝後先復村。錦田圍村內有唔少村內風俗,包括屬於大型宗族慶祝活動嘅洪聖誕,帶同男丁舉行開燈儀式嘅鄧族點燈,紀念居民因遷海而逝、酬謝復界兩位廣東巡撫王來任同兩廣總督周有德嘅嘅酬恩建醮等。

一直沿村落小路走,有幾分似日本鄉郊地方,當中錦田逢吉鄉嘅上將府第為客家村落,毗連模範村、華盛村、榮基村,原來有逾百年歷史,既有朝早9點前先有得食嘅舊式逢吉茶樓,亦有被評為二級歷史建築嘅逢吉鄉上將府第,旁邊有沈氏家祠、協威樓。此外,錦田附近仲有石崗軍營、石崗機場,而錦田區內發展比元朗慢,曾被指為一個原始村落,後來先發展為住宅區。

延伸閱讀﹕驚現小黑羊! 錦田古村逢吉鄉有段故 鄉郊小路滿佈農莊露營地

第五站﹕錦田鄉郊露營地

沿鄉郊小路可直達妙覺寺、農地、war game場,路段甚至會見到一群似足黑狗、由牧羊人帶領散步嘅小黑羊,附近有一個叫Park Nature嘅露營地,入口會見到有間泰國菜餐廳,露營車以太空艙設計,據悉係特別設計成星空露營車,俾人可以入露營車玩Glamping,戶外可享大自然,但室內似足酒店設施,毋須重裝出發,只需帶備個人用品,最啱懶人露營!

而錦田樹屋附近亦有一個今年初先開業嘅露營地,可望雞公嶺,內有大草地,營地既可玩柴火,亦可以任摘香草,相當特別,方便享受野炊。而營地內設施齊備,既有洗手間、鋅盆,亦有熱水淋浴設備,只需帶上基本露營用品,適合新手露營。

延伸閱讀﹕18款香草任摘+可玩柴火! 錦田全新露營地仰望雞公嶺 設備齊全有熱水供應 10分鐘到市中心

第六站﹕錦田平湖

錦田水尾村鄉公所外有一間以樹形突出、樹中有屋聞名嘅錦田樹屋,樹木包圍房屋生長,旁邊大榕樹亦無人打理,相傳該樹屋係書齋,歷經百年變成樹屋。而樹屋附近有一個由雙池塘組成嘅平湖值得影吓相,環境空曠,湖面平靜,堪稱港版天空之鏡,Glamping後等黃昏影日落一流!

延伸閱讀﹕錦田百年樹屋被颱風吹冧 平湖雙池塘天空之鏡日落勝地

第七站﹕KOK KOK

由錦田樹屋同平湖離開,出返錦田公路,喺帶記餐廳隔離有另一間值得品嚐嘅泰國菜餐廳。KOK KOK主打正宗泰國菜,同樣為區內街坊店,泰式炒金邊粉、濕炒河粉都係記者推介美食,尤其係濕炒河粉,由泰國人炮製嘅濕炒河粉的確係特別正宗,以此為錦田2日1夜遊作結就夠晒完美。

延伸閱讀﹕錦田隱世正宗泰國菜 平價濕炒河粉極惹味


E.A.Tips :

(1)

(2)


Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!