行山嫌辛苦又想舒展吓？不妨揀啲輕鬆路線啦！位處香港仔郊野公園內嘅香港仔谷，內有著名嘅香港仔水塘，包含香港仔上水塘、香港仔下水塘，連接灣仔峽公園、姻緣石，唔少人都揀選從灣仔出發，但記者認為更輕鬆嘅路線係從香港仔方向出發，路段更平坦易行，近在咫尺，由香港仔行去灣仔亦只需約1小時，上斜路段極少，沿路更會見到一群蝴蝶樹上飛舞，最啱兩個人周末拍拖散散步。
【Like Facebook / MEWE 緊貼最新資訊，一個Like一個鼓勵，支持原創文章，向Content Farm說不。】
沿香港仔自然教育徑行，可遠眺香港仔避風塘，更輕鬆嘅路線係沿香港仔健身徑行，路段為石屎路，既有遮蔭，亦屬平坦路段，第一個分岔路口只係先遊上水塘同下水塘分別，第二個分岔路口只需於向灣仔或水塘分岔路口選擇，只要向上水塘方向行就得。行30分鐘即達上水塘主壩，水壩一方背後係翠綠群山，前面係平靜湖面，周末有涼風會更Chill。
延伸閱讀﹕香港仔抵食下午茶！ 轉角街坊店必食激厚西多 邪惡炸髀畫蛇添足？
延伸閱讀﹕港式茶記果然冰室年初香港仔開業 生炸式香草雞扒有驚喜
香港仔水塘附近既有燒烤地點，亦有唔少健身設施、涼亭等，沿路滿佈樹木遮蔭，基本上唔需要被猛烈陽光長期照射，亦可以享受行山樂，飽覽水塘一帶靚景。
水塘內有唔少法定古蹟值得欣賞，4項建築於11年前已列為法定古蹟，包括上水塘水壩，以花崗岩建造，受意大利文藝復興時期影響，設計改以實用主義為主。而上水塘對落有一個神秘小石橋，望落好有英倫風格，以圓拱形設計，連欄杆都係古式風格，細窄小橋同時滿滿童話風，打卡一流！從下而上近距離觀望水壩會更壯觀，同時可以睇埋呢個法定古蹟。
轉右去水霸, 左去灣仔 
下水塘前身係大成紙廠私人水塘，建立逾百年，20年代嘅香港政府更以水塘為居民解決食水問題，將私人水塘變公用水塘，後來更於30年代喺上游位置加建香港仔上水塘。而下水塘更分別有正方形建築、紅磚設計嘅水掣房、泵房，連接水壩，望落充滿歷史痕跡。
上水塘人流比較多，而下水塘雖然無上水塘水壩咁震撼，但人流較少，大多係釣魚客，更有清山綠水感覺，水質清澈見底，環境清幽寧靜，更舒服，甚至可遠眺高樓大廈。由上水塘行去下水塘，以一道樓梯銜接，既有石屎路，亦有泥路，兩者混合但唔算難行，腳程只係約10分鐘。而連接下水塘嘅小橋係屬打卡位之一，滿滿文青風格。
從下水塘返回入口處，中途路段有少量相間石塊舖砌而成，可以打吓卡，但更方便係直接行旁邊泥路。邊行可以邊繼續欣賞水塘風光，感受人跡罕至嘅水塘景觀，水中輕易泛起樹影，天空之鏡輕易形成。沿路會再經過亦會經過香港仔（海水）配水庫，其後就會見到出口位置。
另外，香港仔水塘亦可以直通灣仔方向，唔少KOL、大型網媒都推介從灣仔出發再行到香港仔市區，大概起步點比較方便，不過終點一樣要搭車返去，最大弊病係要不斷上斜，而斜度都幾高。記者良心建議由香港仔出發，只有起步點稍稍上斜，但斜度比灣仔段明顯較低，加上只有水塘向灣仔方向中段有少量上斜位，始後就只有不斷落斜往灣仔市區方向。
返回剛才路口, 往灣仔峽方向進發 
返回水塘、灣仔方向分岔口，沿左邊路段可直通灣仔市區，由水塘行到灣仔，大概需時30分鐘。沿香港仔水塘道一直行，青山綠水，鳥語花香，環境清幽，中段不單望到低密度豪宅，更可以望到一群蝴蝶於樹上飛舞，路段其實唔難，但都可以有行山感覺。
延伸閱讀﹕灣仔山坳頂藏打卡公園 泰式小屋異國風滿滿
沿路行到落底，會經過灣仔峽公園、甘道兒童遊樂場，之後會見到一個分岔路口，只需橫過對面馬路即可達灣仔自然徑。5至10分鐘後再行到另一個分岔口，右邊會見到一個叫蘭谷嘅小公園，有幾分小橋流水感覺。分岔口左邊寶雲道健身徑，可去金鐘方向；直線方向係沿灣仔峽道（即灣仔自然徑）直落灣仔方向；而右邊就係寶雲道健身徑去姻緣石、跑馬地方向，行7分鐘加80級樓梯上姻緣石不單可求桃花，亦可從高處俯視灣仔、跑馬地天際線景觀。
沿灣仔自然徑繼續行，只有不斷落斜，再行約5至10分鐘就到堅尼地道，路段斜路、樓梯多而斜，如果從灣仔方向作起點，所需力氣會更大，當然落斜更需要小心安全啦！此後路段可自由選擇，藍屋、舊灣仔郵政局、利東街方向都好接近，可返回皇后大道東、莊士敦道、軒尼詩道乘搭巴士或電車，甚至行到海傍乘搭天星小輪去尖沙嘴方向。
E.A.Tips﹕
（1）由香港仔水塘道可以直上香港仔健身徑，上山路段僅約15分鐘腳程，可預先搜尋交通工具及路線。
（2）水壩下方石橋雖然好有童話感，唔少人公然闖入影相兼上IG打卡，事實上可輕易進入，但門口有告示標貼屬禁地，最好都係唔好入啦。
（3）郊遊最重要係自己垃圾自己帶走，記得要愛護環境。
（4）本路線平坦易行，但最好都要有充足準備，帶備食水、蚊怕水等。
（5）只需返回香港仔健身徑，即可沿香港仔水塘道回程，經漁光邨就可到達香港仔市區。
（6）由水塘行去灣仔路段平坦，少有斜路，但香港仔水塘道末端至灣仔方向就極多上斜位，想少啲上斜就建議從香港仔出發，而非灣仔出發啦！
香港仔水塘
香港仔水塘路 
24hours
在〈【蝴蝶群舞】零難度上香港仔水塘 推介人跡罕至神秘位打卡 1小時直通灣仔鬧市超易行〉中有 4 則留言
留言功能已關閉。