港式茶記果然冰室年初香港仔開業 生炸式香草雞扒有驚喜

由黃到金嘅Let’s Jam一起果醬打骰嘅果然冰室，以港式冰室為主打，今年初開業，價錢相宜，同香港仔區內茶記差唔多，早餐兩個人埋單唔使$80，經常大排長龍亦不無道理。

• 

• 

呢間人氣冰室裝潢以湖水藍色為主調，設計簡潔，從對面遠望都好搶眼，但室內燈光較暗，周末入座率、流轉度幾高。餐牌選擇唔算多，但早、午、晚餐、下午茶都有，午餐有飯、意粉，據悉鰻魚炒飯係招牌貨，而早餐就有分港式早餐、歐陸早餐、全日早餐。

延伸閱讀﹕【蝴蝶群舞】零難度上香港仔水塘 推介人跡罕至神秘位打卡 1小時直通灣仔鬧市超易行

• 

• 

• 

港式早餐有煙鴨胸特濃野菌忌廉湯通粉 $36，配搭炒蛋、牛油方包，方包為白麵包，無烘底，僅得少量牛油。煙鴨胸的確有陣煙燻味，一碗份量幾多吓，湯底大概係罐頭湯忌廉蘑菇味，通粉軟硬度恰好，唔會硬身又唔會過軟熟，而奶茶、咖啡都有茶記基本質素，奶味、茶味適中。

• 

• 

歐陸早餐 $42 有豬扒、魚柳、雞扒任揀一款，拼一款配料，再配搭茄汁焗豆、牛油多士。香草雞扒係一大驚喜，竟然以生炸雞髀方式脆炸雞扒！雖然以早餐嚟講，係比較Heavy，但味道上的確係有水準，表皮輕脆，雞肉有肉汁。炒蛋呈金黃色，份量唔少，尚算軟滑有蛋香，再加入香草點綴，只係有少少過熟。而多士微脆，焗豆暖笠笠，略嫌多士上欠缺招牌果醬，但呢份早餐食完幾滿足。

• 

• 

• 

E.A.Tips﹕

（1）位置喺香港仔體育館、香港仔街市對面，前身係龍門冰室。

（2）早餐供應時間至11:30，下午茶就由14:30開始。

（3）全日早餐有素食選擇，並非只有傳統英式早餐。

（4）下午茶可以試吓以招牌果醬配鬆餅，拍拖去可以Tea吓。
（5）呢間茶記嚟，只收Cash。

---