荷蘭徑+馬己仙峽配水庫遊樂場

半山荷蘭徑穿梭叢林仙境 直通馬己仙峽配水庫 高空俯瞰港島中區夜景



港島區嘅市區後花園比起九龍區少,雖然係石屎森林,不過當中都可以搵到城中綠州,人流相對地少,有行山感之餘,景觀一樣有。今次講緊靠近香港仔水塘、灣仔峽道、港島半山嘅荷蘭徑,只需穿梭30分鐘山路,路段由灣仔峽道可直達馬己仙峽配水庫遊樂場,路段可感受幾分探險感,更可俯瞰灣仔至中環夜景,兩個人可上山散步兼睇夜景,都算係一個貼地嘅拍拖活動。

從香港仔水塘返回灣仔前,會經過灣仔峽道公園南端出口,前行灣仔自然徑陡峭斜路開端,轉左可到達荷蘭徑入口,路牌上方有風車模型標記,非常易認。荷蘭徑路段人流較少,大多係外藉人士攜狗散步,全段步程大概係30分鐘,多為平坦之路,尚算輕鬆,中段會不斷穿梭叢林間,有幾分探險感覺,右邊更不時可望中環、灣仔市區風景,亦可眺望海景。

延伸閱讀﹕【蝴蝶群舞】零難度上香港仔水塘 推介人跡罕至神秘位打卡 1小時直通灣仔鬧市超易行

延伸閱讀﹕灣仔山坳頂藏打卡公園 泰式小屋異國風滿滿

荷蘭徑原叫荷蘭灣徑或荷蘭海員徑,近寶雲山、太平山,大概高298米,有百年歷史,山下就係半山住宅、灣仔同中環等中區商業地帶,位置曾經被稱為荷蘭灣,源由係有荷蘭渣華輪船公司Royal Interocean Lines(現叫Nedlloyd)嘅荷蘭藉海員登陸此處,而小徑就係用作返工用途,從山頂居住處步行往返灣仔公司。

沿荷蘭徑走,會不斷經過叢林,滿佈植物,樹木生長茂密,樹藤隨意攀爬,一片青蔥翠綠,不時更有雀聲蟲鳴、流水聲,環境僻靜,恍惚走入一個叢林仙境。不過右方不時會見到高壓電塔架、電纜線、商業區高樓大廈,望向右邊熙來攘往嘅港島中區鬧市,一秒出戲。

沿荷蘭徑直行到盡頭,可以行到西面嘅馬己仙峽食水配水庫遊樂場,走出荷蘭徑,首先會見到配水庫遊樂場,內有草地、遊樂設施、150米緩跑徑、健身設施,人流稀少,環境比市區配水庫好得多,遊樂場旁邊亦有一條荷蘭徑原始部份,可以去返灣仔峽道。而再行前啲會見到配水庫。


E.A.Tips﹕

(1)既可從灣仔經灣仔自然徑步行上荷蘭徑;亦可從香港仔水塘經灣仔峽道公園到荷蘭徑;甚至直接乘搭巴士路線15,15B直達灣仔峽道落車,1分鐘即達荷蘭徑;或者乘搭小巴1號,於馬己仙大廈落車,馬己仙峽道行到馬己仙峽配水庫遊樂場。
(2)荷蘭徑雖然大部份路段平緩,但小山徑為山路,部份路段崎嶇不平,遍佈石頭、樹根,而且無欄杆,需要小心安全。
(3)從馬己仙峽配水庫遊樂場離開,經馬己仙峽道,沿麥當奴道行到堅尼地道到纜車徑,可返回金鐘香港公園方向;另荷蘭徑可行到寶雲道花園,經寶雲道亦可返回市區。
(4)建議避免夏天行走,需要小心有蛇、蚊蟲出沒,秋冬天行會比較安全。
(5)山徑路段山石不時有苔蘚,需要小心。
(6)馬己仙峽配水庫遊樂場無公園燈,夜晚最好帶備頭燈等照明工具。


馬己仙峽配水庫遊樂場

半山馬己仙峽大廈及馬己仙峽道對面
24hours

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!