茅坪竹林

西貢神秘寶地 20分鐘到茅坪竹林隧道打卡

[sig_post_pv label=””] 個人瀏覽過



去西貢只識入市中心?不妨兩個人早少少落車,可以行吓更多值得一遊嘅天然景點。由北港路上山,路程唔長,可以到達一道神秘嘅竹林隧道打卡,再沿路行重可以探訪埋山友大熱嘅茅坪樹藤王,若只係到茅坪竹林隧道,由落車到上山腳程只係約20分鐘。

沿北港古道而走,行上茅坪古道,沿路一直有樹蔭,唔需要好辛苦,即可以輕鬆觀賞一道超壯觀嘅竹林隧道,一枝枝青竹延伸成一道隧道,不單適合少女打卡,而且都係一個拍拖情侶準備拍攝婚照嘅好地方。

竹林隧道有兩段,西貢方向而走第一道見到嘅竹林隧道較短,第二道竹林隧道剛較長,兩邊青竹向上延伸,搭成一個個拱門狀,小隧道貌似睇唔到盡頭,愈走愈高,幾分幽深,有尋幽探秘感覺。

再沿石塊路段,不時會見到蝴蝶同野菇,回頭可以眺望橋咀島、白沙灣,景觀遼闊。

經過竹林隧道,大概再行30分鐘後可達茅坪樹藤王,為榼藤,又叫鴨腱藤、鴨見藤,屬稀有植物,旁邊仲有一條荒廢小村落,主要樹藤非常粗壯,而且縱橫交錯,呈扭紋狀,藤枝一直向外延伸,似足電纜,樹藤橫生發展,似懸浮半空,非常壯觀。



再行10分鐘石級可到涼亭,分岔路有唔同方向,左邊可去茅坪,右邊就返轉頭。沿茅坪方向可去到淪為頹垣敗瓦嘅茅坪村、茅坪廢屋、聯達五鄉公立學校遺址、叢林隧道,最高點茅坪坳僅高約300米,有探險感。百年茅坪古道可連接西貢同沙田方向,但目前村屋已荒廢,日久失修,滿滿草苔、藤蔓,人就更加少見到。

既可以選擇沿路折返西貢,亦可以選擇繼續行程,行多45分鐘至1小時,可由茅坪坳行到梅子林,自由選擇。

延伸閱讀﹕1小時穿梭北港古道連綿竹林 茅坪古道尋樹藤皇梅大石澗 烏溪沙泥涌石灘驚變綠洲

Like Facebook / MEWE 緊貼最新資訊,一個Like一個鼓勵,支持原創文章,向Content Farm說不。】


E.A.Tips﹕

(1)由彩虹出發乘搭向西貢市中心方向嘅小巴路線1A, 1S, 1, 2, 12, 101M,經過白沙灣、獅子會自然教育中心後,可於北港路落車。
(2)由西貢北港路上山,會先見到北港足球場,再經過北港濾水廠、北港花園,上到閘口有絲帶記認,合共行約20mins,即可以到達茅坪屋場竹林,竹林隧道即映入眼簾。
(3)竹林隧道路段基本上都係水泥路,幾安全,但後面北港古道上茅坪古道山路就係石塊堆砌而成,尤其潮濕時比較危險,所以最好有充足裝備先好繼續行。
(4)有時間同有體力嘅話,沿路繼續行,可以繼續行去大水坑、馬鞍山方向,山路雖然明顯,但最緊要係量力而為。
(5)記得眼看手勿動,要繼續行程就記得愛護樹藤王,樹藤好脆弱,唔好借力或隨意破壞。


延伸閱讀﹕隱藏科技大學旁 白水碗沙灘處處影相位

屋場竹林

西貢北港路
24hours

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!