2021-04-10

1小時穿梭北港古道連綿竹林 茅坪古道尋樹藤皇梅大石澗 烏溪沙泥涌石灘驚變綠洲

北港古道+茅坪古道+梅大石澗+泥涌

116個人瀏覽過



由西貢行入馬鞍山,只需1小時即可穿過北港古道、茅坪古道,雖有部份上落斜路段,但沿途樹蔭連綿,毋須暴曬,屬一道休閒路線,即使兩個人夏天拍拖上山亦算適合。

要走茅坪古道,唔少人都建議從馬鞍山行到西貢,但記者反而認為以西貢為起點、馬鞍山為終點更好,基本上只有北港古道一段上斜稍花力氣,此後路段都甚輕鬆,而且比較少人會從西貢出發,可避免於路段遇上太多人。事實上,北港古道係指北港、茅坪之間嘅路,而茅坪古道就係茅坪、馬鞍山梅子林之間嘅路,全段路加埋約2.5公里,所需時間僅約1小時。

從西貢出發,只需於北港路行上山,背後為西貢白沙灣海景,走20分鐘可達茅坪竹林隧道,路段雖稍有上斜,亦需要步上一級又一級石階,但綠樹成蔭,由下至上觀望甚為壯觀,青竹營造拱形圓洞,第一段竹林隧道較短,而第二段竹林隧道較長,似足置身叢林又搵唔到出口嘅感覺。

延伸閱讀﹕西貢神秘寶地 20分鐘到茅坪竹林隧道打卡

經過茅坪坳嘅茅坪休息處,高約300米,可見十字路口,其中一段為通往昂平營地嘅麥理浩徑第4段,茅坪休息處位置為聯達五鄉公立學校遺址,擁大片草地,現時加建咗長櫈、涼亭。踏入茅坪古道,可以沿路找尋近期山界熱門打卡點茅坪樹藤皇。要搵樹藤皇,先要搵到條神秘絲帶路,位置靠近廢棄村校洗手間,入口大概位於涼亭右邊,藤皇樹幹極粗壯,呈扭紋狀,藤枝四散,十足十粗電纜,但目前藤皇已經被摸得光滑無比。

經過石屎橋時,可見茅坪坑石澗上游,而茅坪古道大多由石頭舖砌小路,容易行走,附近同北港古道一樣遍佈林蔭,茅坪村更有多間荒廢村屋,石牆依然堅固,但屋內更被林木所佔,藤蔓、青苔滿屋,而且不斷延伸,頹廢感十足。而梅子林實際上有五條村落,目前已悉數廢棄,包括梅子林、茅坪、黃竹山、石壟仔、昂坪,茅坪曾被被劃為具特殊科學價值地點,但只有依山而建嘅梅子林村直接有馬路接駁。

    

行到馬鞍山梅子林村盡頭可見馬路,馬鞍山梅子林同荔枝窩梅子林並非同一地方,馬鞍山梅子林為古老風水林之一,皆因有豐富風水林物種。沿梅子林路嘅斜路直行,可從中段梅子林涼亭旁邊小路進入,有絲帶作記認,小路多為石階,輕鬆易行,半分鐘即可直通往梅大石澗,位置稍神秘,所以人流唔多,清涼舒服。

梅大石澗其實只係茅坪、石壟仔雙澗下源,又叫梅子林大水坑,同馬鞍山馬大石澗差唔多,分別在於梅子林稍稍被水壩堵截水源,令水源較少,澗道雖闊而平順,但澗石盡露,而且比馬大石澗較少風景位。不過,大水坑村村民可輕易從村內走入馬大石澗,相反梅子林村離梅大石澗有一段路,人流相對較少,而盡處可見潭區、梅子林水壩,可返回梅子林路,驟眼睇水唔太深,而溪水尚算清澈。從梅子林村經梅子林路走到富安花園,全段梅子林路大概要走25分鐘,之後會中間會經過亞公角街花園、河道,出口會見到馬鞍山崇真中學。

亞公角街花園對面有巴士路線可直入烏溪沙泥涌,另步行約1小時可到達泥涌石灘。泥涌本來係打卡勝地,為一個濕地地區,不時有朝潮蟹、彈塗魚,淺水泥灘內長滿紅樹林、貝類生物,唔少人都會去放風箏,而石灘靠近泥涌村,斷橋、碼頭等都為年輕人影相熱點。最近泥涌驚見泥地遍佈海藻,恍如綠洲一樣,絕對係打卡之選!

走入泥涌石灘,陣陣紫菜香撲鼻,原來最近石灘內滿佈綠色海藻生物,同時為石灘點綴,令石灘瞬間變為綠洲,加上旁邊嘅紅樹林,令寧靜嘅淺水泥灘更添詩情畫意,配合背後日落光線、煙霞,水面如鏡,既可形成天空之鏡,又可望八仙嶺山巒,更可賞似足銀幕版大海景嘅吐露港。


E.A.Tips :

(1) 綠色小巴1,1A,1S可來往新蒲崗、牛池灣、西貢,於北港站落車,即西貢市中心前一個站,過咗白沙灣遊艇會碼頭之後,可以準備叫落車,位置於獅子會自然教育中心對面,於北港路落車,位置離西貢市中心約20分鐘步程。

(2) 若以大水坑村為起點,可乘搭巴士路線84M,289K,43X,85K,89C
於富安花園巴士總站落車,向梅子林村方向走。

(3) 如要搭車去泥涌,可乘搭巴士路線40S,86P,87,99,99R, 289R,299X,X89D,682A,682X 或小巴路線807B,807K,807S到泥涌村落車,99號可來往烏溪沙,而299X則可來往沙田市中心,落車點離泥涌石灘僅1至2分鐘步程,但目前整路就要經停車場隔離小路進入泥涌石灘,需要額外多2至3分鐘腳程。

(4) 謹記帶備充足糧水,於西貢或馬鞍山先作補給先出發。

(5) 愛護環境,自己垃圾自己帶走。

(6) 影相還影相,唔好騷擾其他山友,若有人經過,要先讓路,唔好獨霸路段打卡。

(7) 部份山路略有崎嶇不平,要注意個人安全。


(8) 雖然路段唔難行,但天雨路滑就要避免行上山路,尤其係落雨前後或落雨時。

(9) 梅子林村至梅子林路有私人地方,謹記唔好胡亂闖入,行返公眾路段比較好。

(10) 請勿破壞竹林隧道、茅坪藤皇,唔好攀爬,要保護自然靚景。


(11) 泥涌斷橋上有唔少蠔殼,小心會被𠝹損手腳。

(12) 去泥涌前最好先留意天文台潮汐漲退時間,注意安全,而踏入淺水泥灘最好穿著拖鞋。

(13) 謹記保持安靜,山路並唔係屬於閣下自己嘅。


茅坪休息處

馬鞍山麥理浩徑4段
24hours

梅大石澗

馬鞍山
24hours

泥涌石灘

1 Nin Ming Rd, Ma On Shan
24hours

烏溪沙泥涌

新界沙田馬鞍山西沙路 530 號
24hours

Please Like & Follow & Subscribe /
歡迎讚好、追蹤、訂閱