香港公共空間比比皆是，但有部份地方係受到冷落，人流稀少，有啲地方影相需要排隊，有啲地方無人去影。香港仔有一個休憩處雖然水淨鵝飛，不過就隱藏咗一個神秘嘅影相位，似足無人之境，值得兩個人去打吓卡。
休憩處位處縱橫交錯嘅馬路同天橋旁邊，上面係鴨脷洲大橋，前面係香港仔大道，平時雖然人跡罕至，幾近荒廢，但橋底風涼水冷，假日不時引得唔少外籍僱傭都席地而坐，反而變成佢哋嘅休息地同聚會地方。
鬧市中要搵片刻寧靜唔容易，從地圖上可以發現一個名為香港仔大道／鴨脷洲大橋休憩處嘅空地，位置空曠，背後隱藏一個小瀑布，絕對係適合影相嘅好地方！
呢道小瀑布可以話係鬧市中嘅隱藏版瀑布，比起瀑布灣公園嘅瀑布景更高，水流亦較大，從小瀑布頂端望返落去，似足懸崖處，睇住瀑布垂直傾瀉而下，甚震撼！齋聽水聲感覺到瀑布幾雄壯，甚至覺得唔似係呢個地方，絕對係一個零難度嘅瀑布之行。
小瀑布位處有「香工」之稱嘅香港仔工業學校旁邊，舊翼校舍有80幾年歷史，被評為香港三級歷史建築。學校前身曾經係二戰時英國皇家海軍總部及志願部隊基地，後來更演變成英國皇家海軍傷兵輔助醫院。唔少舊電影、早年嘅電視劇都曾經喺學校取景，如電影《男人四十》、電視劇《誓不低頭》，甚至港台節目《鐵窗邊緣1》亦有學校取景。
由小瀑布行返出嚟，經過香港仔工業學校，沿黃竹坑道可以搵到一處幾特別嘅木牆，木質主調配搭些微恰當嘅色彩，好有藝術感，適合文青情侶打吓卡呢！
E.A.Tips﹕
（1）小瀑布位置喺休憩處後面，旁邊係香港仔工業學校。
（2）由鴨脷洲乘搭街渡落船後，向黃竹坑方向行，經天橋過對面，前行5分鐘即達小瀑布位置。
（3）香港仔工業學校本身有城巴路線可以到達，可乘搭38,42,590號，又或77,77X,90,97,99X,592,107,170,171,171A,671,671X號。
（4）小瀑布旁邊小路樓梯生滿青苔，行過時要小心滑倒。
（5）小瀑布頂端有一條小繩索可澗水過對岸，不過未知繩索係咪穩固，亦有一定危險程度，最好都係唔好嘗試啦！
（6）最好唔好行出瀑布，因為小瀑布其實有一定斜度，而且水流幾急，隨時會有危險。
香港仔大道／鴨脷洲大橋休憩處
香港仔黃竹坑道1號香港仔工業學校旁邊 
24hours
在〈無人之境？ 香港仔鬧市神秘瀑布 黃竹坑道藝術木牆打卡〉中有 4 則留言
留言功能已關閉。