香港仔抵食下午茶！轉角街坊店必食激厚西多邪惡炸髀畫蛇添足？

[sig_post_pv label=””] 個人瀏覽過

香港仔同鴨脷洲地方唔大，睇落選擇唔多，但都隱藏咗唔少抵食街坊小店，呢間茶記睇落平平無奇，雖然未去到好似啲人咁用「高質」、「隱世」呢啲誇張詞語嚟形容，但港式下午茶街坊小食的確值得一試，兩個人行街拍拖時，歎返個下午茶好疏乎㗎！

呢間茶餐廳最出名同最受歡迎嘅係豬扒菠蘿包，將豬扒夾於菠蘿包內，充滿懷舊感，非常特別，另外亦可以任揀餡料夾於菠蘿包內，難怪唔少人都去試。不過，其他下午茶餐同樣好有傳統冰室感覺，對比坊間扮冰室嘅茶記嚟講，淨係睇下午茶小食的確食得出係比較高班。

好少見下午茶餐有粉麵，燒鴨米線只係$35，配凍檸茶加$3，燒鴨水準雖然唔太高，肉質唔太嫩滑，浸湯後亦無咗燒鴨味，不過勝在大件夾抵食。米線湯底有種魚湯感，未知係咪加咗另一種湯底調配，比普通湯底好。而凍檸茶唔太甜，略嫌茶底唔太夠茶味。

從小到大，下午茶必食嘅小食一定係生炸雞髀，今次配埋奶茶紅豆冰$32，絕對邪惡感爆燈！挑選斧頭雞髀已經難得，重以生炸方式嘅炸雞髀更少有，呢間炸髀本身炸得唔錯，大大隻，表皮脆卜卜，雞肉唔會好乾同有雪味，仍有肉汁，無沙律或薯條伴碟都唔緊要，但加上胡椒調味反而令人有畫蛇添足感覺，胡椒味其實有啲多餘。

茶記叫奶茶都係正常事，今次係幾出名嘅奶茶Crossover紅豆冰，的確係幾特別。雖然奶茶味唔太濃，比較淡，無咩驚喜，大概熱奶茶同凍奶茶係有分別。但紅豆煮得夠稔，份量就好多，用匙羹潷都有排潷，估唔到奶茶同紅豆冰都夾到。

另一款傳統冰室必備產物就係西多士，寫明特厚西多士到底有幾厚？配糖漿或煉奶$28，唔跟餐飲$24，價錢合理。熱辣辣西多士上枱時，表面舖有一塊正在遇熱溶化嘅牛油，加上淋上糖漿，已經令人垂涎，但略嫌糖漿預先淋咗而唔係另上，糖漿會令西多士表皮浸軟。但西多士特別加厚，比一般麵包厚身，表皮炸成金黃色，內餡夾有花生醬，外面仍有輕脆感，麵包軟熟，啖啖蛋香夾雜花生醬香。

以「快樂茶檔」為名，整體裝潢格局的確好有「茶檔」感覺，2015年下旬開業至今，似以前嘅傳統冰室，食物質素實而不華，價錢亦係街坊價，重係良心店，跨區都值得。

延伸閱讀﹕無人之境？香港仔鬧市神秘瀑布黃竹坑道藝術木牆打卡

延伸閱讀﹕南區藏五星級瀑布秘景石灘亂石隨時變雞蛋仔？

E.A.Tips﹕
（1）茶記嚟，無加一，只收Cash，這是常識吧？
（2）好多食物都全日供應，但下午茶餐價錢平啲，供應時間就係14:30至18:00。
（3）室內空間同座位唔多，食茶記最好都係唔好坐咁耐，食完好俾下一個入啦。
（4）從街渡或巴士總站行過去，腳程只係約5分鐘，走入香港仔舊大街後，右轉會見到喺轉角位，靠近兆群大廈。
（5）內街泊車後再行過去都幾方便。