2021-07-24

鴨脷洲撐枱腳首選 平民西餐廳點只鋸扒有質素

Bowls cafe 寶膳餐廳


去到南港島區,唔少市區人都會有人生路不熟嘅感覺,區內並非人煙稠密之地,而大多數人會逗留鴨脷洲大街搵食,但鴨脷洲大街咁多間餐廳又點揀好?今次小編搵到一間超高質嘅良心食店,為區內少有嘅西餐廳,無論價錢定食物質素,CP值都好高,屬拍拖兩個人撐枱腳之選!

餐廳以西式風格打造,不時播放英文歌曲,感覺放鬆,環境舒適,驟眼睇以為燈光昏暗,但坐低又發現座位頂頭燈光充足。午市套餐Set Lunch有13款可擇,雖然貌似一間中高價西餐廳,但打開餐牌先發現價錢極親民,由$66至$98都有,似家庭式餐廳。唔少人都會揀鋸扒,感覺High Class啲,的確西餐中嘅肉眼扒、羊架、德國鹹豬手等都係招牌菜,不過小編認為餐牌上其他選擇更可以考驗廚師功架,鋸扒反而唔係最好選擇。

每款套餐有餐湯蒜蓉包,餐湯亦可轉餐飲,是日餐廳係紅湯,雜菜蕃茄湯有驚喜,有豐富蔬菜,包含紅蘿蔔、椰菜、西芹、蕃茄、薯仔等,一碗滿滿鮮茄粒粒,入口酸甜,又有微微肉味,餐湯表面僅有薄層油份,味道濃郁,好開胃;而蒜蓉包舊舊脆卜卜,表面塗滿蒜蓉、牛油,蒜香同牛油香填滿法包,分佈平均,法包的確脆口,不過略嫌烘得太耐,有啲乾,入口偏硬。

其中一款係俄羅斯牛肉 Beef Stroganoff $68 配薯菜,小編只為影相靚,事實上應該配白飯。俄羅斯牛肉係一種燉煮料理,比較考功架,牛肉大粒厚實,似一粒粒骰仔,份量充足,切落去非常鬆軟,無筋位,入口軟嫩,唔嚡口,牛味濃,肉汁滿滿。而醬汁調味充足,鹹度適中,茄醬酸甜味融合鹽同胡椒味,加上配料有洋蔥、紅蘿蔔等,味道更香甜,上枱香噴噴,醬汁極有水準!西蘭花都有微香,唔會有陣青味,而薯條本身雖有薯香,但有啲單調,可以配蕃茄醬,不過事實上唔需要蘸蕃茄醬,蘸一下俄羅斯牛肉嘅醬汁更惹味。

另一款考功架嘅係蒜片蜆肉橄油意粉 Spaghetti with clam meat and garlic $66,意粉乾爽,入口順滑,煙韌彈牙,有採用橄欖油炒過,所以唔係好乾身。蒜片同蜆肉份量充足,並非得少量,食到底都仲有,尤其係蜆肉。加上香草點綴,就更突出,夠晒香口。

跟餐+$32可以叫多份甜品,法式焦糖燉蛋 Creme Brulee值得一試,表面有一層厚焦糖,脆卜卜,焦糖香甜,配合底下蛋香味,不過頂頭嘅cherry只係裝飾,實際上係有藥水味嗰種,記得唔好亂試。

延伸閱讀﹕無人之境? 香港仔鬧市神秘瀑布 黃竹坑道藝術木牆打卡

延伸閱讀﹕香港仔抵食下午茶! 轉角街坊店必食激厚西多 邪惡炸髀畫蛇添足?

延伸閱讀﹕小玉桂山連接利東海怡 15分鐘輕鬆登頂環瞰180度海灣

延伸閱讀﹕鴨脷洲大街咖啡店小清新 質素跑唔跑得贏市區?

E.A.Tips﹕

(1)星期一至五12:50前離座或14:00後入座,都可享9折優惠,變相無加一服務費,周末假期就需要加一服務費啦。

(2)若將蓋印單據合計滿$2000,即可登記成為寶膳之友VIP享全年優惠,點餐前可出示VIP卡,午餐有9折優惠之餘,亦有$80 cash coupon,多人用餐會比較化算。據了解,VIP禮品仲有英式早餐、生日蛋糕等,甚至優先試私房菜,詳情請留意餐廳告示

(3)每位最低消費為$66,餐廳座位唔算多,若有其他客人排隊等候,就請盡量唔好坐太耐啦!

(4)晚餐最好預先訂枱,減少等候時間。

寶膳餐廳 Bowls Cafe

鴨脷洲鴨脷洲大街117號地舖
星期一至日 07:30 – 15:30、18:00 – 21:00
2870 1588

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook啦!
ΔPlease Like & Follow & Subscribe /
歡迎讚好、追蹤、訂閱

       

消失的「萬壽無疆」? 旺角懷舊東方色彩工業風咖啡店五金味重
入場有限制!大埔慈山寺偽旅行驚現仿日本神社御手洗 必睇全球第2高巨型純白觀音像
瞰鋼線灣景色!穿梭山頂至薄扶林水塘尋港版《千與千尋》場景 新哥德式風格大學堂/伯大尼教堂打卡 薄扶林村都有秘地?
離奧海城僅3分鐘步程!大角嘴全新街坊早餐店 每日啡一啡飽肚套餐$40有找
西貢驚現地下鐵路站!全新牛肉小食店毗鄰碼頭 驚喜酥脆炸麵+5款口味Shake Shake薯條
環瞰270度全海景添情調! 北角海逸君綽酒店歎限定龍蝦主題四重奏下午茶
大埔廣福道新開業壽司店歎高水準午市定食 新鮮刺身生蠔都有「良鮨」
「東方威尼斯」水鄉小島賞無遮擋醉人日落 大澳珍珠形寶珠潭藏海星紅蟹仔 迆遊虎山浪漫紅木橋打卡
商場舖搬街邊舖!元朗巷弄爆辣冷麵海量芫荽 6級辣度你試到第幾級?
文青Cafe?大排檔? 沙田逾60年雲吞麵老店一度告急
勇闖港版吳哥窟尋大潭廢堡「天空之城」 20分鐘輕鬆折返赤柱沙灘
上水安圃村季夏搶眼小黃菊花海 原野羊群恍如港版清境農場 直闖日式藤原豆腐店打卡兼遊新田魚塘觀鳥睇日落【2021賞花地圖】
每日只做5款主食! 大角嘴商場限量日本牛丼 沖繩小島料理心機爆滿
大角嘴街坊海南雞秘店 低調泰式雞飯2個版本4種口味
九龍灣商場尋寶 最平$3/件壽司 經濟型必揀平價丼飯
西貢小黃屋前身係村校? 1小時遊客家小島鹽田梓 15分鐘船程訪碩果僅存曬鹽場