ShhhCafe
Cafe 咖啡店,  兩個人醫吓肚,  和你Taste

Shhh!尖沙嘴全新乾花系Café 爆汁手打牛漢堡 周末放空歎咖啡兼玩工作坊



Shhh Café & Studio

疫情期間,飲食業有好多餐廳都抵受唔住而結業,但仍然有唔少餐廳疫下開業,尖沙嘴呢間樓上Café就係其中之一,良心小店絕對值得支持。除咗一般咖啡店嘅All Day Breakfast、Spaghetti,仲有勁Juicy嘅手打牛肉漢堡,另有招牌Crossover咖啡同花茶,抗疫期間外賣自取仲提供折扣優惠。留意到枱面有工作坊宣傳小咭,旁邊不時會舉辦手作蠟燭、手沖咖啡等工作坊,周末有時間兩個人去食個Tea或玩吓工作坊都係一個唔錯嘅拍拖活動。

位處海防道樓上舖嘅Shhh Café & Studio,一出Lift已經係餐廳,7月起試業已一個月,以純白同木質為主調,加上乾花同綠色植物作裝飾,略帶小清新,陳設簡單,營造小花園感覺,文青感滿滿。室內環境清靜,貫徹主題「Shhh」,本身意指to be quiet或噓,最啱周末放空,另大窗戶亦正對九龍公園,坐窗邊高枱櫈可鳥瞰園景,悠閒非常。

招牌漢堡有Shhh 手打牛肉漢堡 $78,原來係每日限量推出,配有炸薯條,份量適中,外脆內軟,無炸燶,好香口,加錢可以試番薯條。漢堡大大份,麵包軟熟,餡料有手打牛肉、芝士、蕃茄、生菜、漢堡醬汁,手打牛肉超厚實,質感軟嫩而有肉汁,煎過後更香口,芝士帶鹹香味,蕃茄同生菜減低油膩感。

Shhh 青醬蒜香帶子巴馬火腿意粉 $88 擺盤唔錯,意粉份量恰好,軟硬適中,沾滿青醬,順滑有彈性,青醬香夠清新,比起一般忌廉意粉無咁重膩感。有帶子粒、巴馬火腿片,本身帶微鹹味,但巴馬火腿比較硬身,非軟腍感,而且好乾,只係意粉入口偏鹹同偏辣,食中粒辣椒會滿口辛辣感,不過大廚疫情期間難以試味,偏鹹亦可原諒。

跟餐本身送咖啡或茶,叫手調咖啡或花茶+$20,包括Shhh’s Signature,賣相吸引,以Yuzu柚子、Espresso濃縮咖啡、Lemon Juice檸檬汁混合而成,表面有一層泡沫,店員特別提點要先飲晒泡沫,再將咖啡攪勻,咖啡帶酸甜味,第一啖感覺奇怪,似咖啡有變壞嘅酸味,第三、四啖會比較容易入口,期後會感覺酸甜味中和咗咖啡苦澀味,反而互相配合,最啱嚐鮮。

除咗咖啡,花茶亦係下午茶嘅好選擇,雪梨乾桂花杞子茶有種英式復古下午茶感覺,同平時High Tea一樣,花茶原壺上枱,底座可保持花茶溫度,啖啖暖笠笠,另花茶可以Refill。呢款花茶茶壺內有大塊雪梨乾、海量杞子、茶包,入口甘甜,首輪茶味香濃,Refill後已明顯開始變淡。

E.A.Tips﹕

(1)試業期間,餐廳只收Cash,收唔到電子支付。

(2)雖然無加一,但人均最低消費係$40,如果無咩人可以慢慢坐。平日去人流較少,可以坐得耐啲,周末假日可能比較多人,有機會限時。

(3)一般中達大廈前門一出Lift就到,後門近洗手間亦有Lift可到達。

(4)可以從電話號碼查詢,Whatsapp亦可預先Book定枱。

(5)抗疫期間,外賣自取有8折優惠,詳情留意官方Facebook

(6)枱面宣傳小咭顯示,工作坊目前試玩價為$299。

延伸閱讀﹕尖東死場驚現文青咖啡店 藍莓味貝果勁煙韌

延伸閱讀﹕《暖男爸爸》取景地 古蹟地有來頭 實試ODEA法式庭園果香下午茶

Shhh Cafe & Studio

尖沙嘴海防道38-40號中達大廈11樓全層
12:00 – 18:00
5566 3078

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


免加2蚊!太子親民居食屋靠近雷生春 日式料理丼飯套餐外賣抵過堂食
流浮山海鮮街酒家林立藏殖民時代皇冠郵筒 海味場旁眺后海灣日落觀60年歷史神秘建築物
【野餐隨行】九龍城人氣泰國菜皮蛋炸蝦餅x潮州粉麵上等牛坑腩 賈炳達道公園野餐大玩Crossover
西貢外賣限定英式炸魚薯條專門店 最高人氣係邊款小食?
經偽鳥居登長洲最高點北眺亭 關公忠義亭附近躲藏超隱秘殖民時代懷舊T形街牌/皇冠郵筒
【野餐隨行】牛頭角消失的後山?鱷魚山81米高隱蔽小公園眺海景 歎近50年老牌上海菜館米芝蓮正宗滬菜
後生仔主理!旺角女人街$50海南雞飯 4款口味有咩揀?
【野餐隨行】元朗人氣壽司丼飯店係驚喜定驚嚇?公園大草地野餐望姆明小屋百鳥塔
旺角點心專門店外賣自取!$56一個人點心拼盤唔使怕選擇現分歧
娛苑起步!142級樓梯登元朗後山豬黃嶺 超矮標高柱眺望雞公嶺淋坑山
樂富唯二!茶餐廳中伏食物多?尋隱藏三和砵仔蒸飯水準不俗
東梅古道起步登昂坪救援徑現代棧道 一隅400米高近距離下瞰香港赤臘角機場宛如觀景台
【野餐隨行】天水圍新北江商場消暑刀削麵 實試公園湖邊草地旁用餐到底有咩問題?
離潮流特區僅3分鐘步程!旺角砵蘭街越南河內料理必食牛柳粉 牛湯濃郁菜式地道
【土瓜灣半日遊】前馬頭圍大廈朝聖193 Cafe!香港花見小路/日系粉紅橋打卡 牛棚藝術公園探索牲口棚遺跡【野餐隨行】
免搭船!穿梭大橋徒步過海往返香港仔鴨脷洲 360度探視珍寶海鮮舫最後景象