2020-09-21
訊號山花園

愛德華風格文青後花園 走訪尖沙嘴紅磚塔望維港



尖沙嘴向來係熙來攘往嘅地方,要搵寧靜嘅地方唔容易,尖東海旁有一座曾經係區內最高點嘅小山丘,既可望從高處近距離俯視維多利亞港,亦有一座超美紅磚塔,不單係情侶拍拖談心嘅好地方,近年亦成為唔少文青同網紅嘅打卡地。

位處尖沙嘴東部海角嘅訊號山,既有黑頭角之稱,亦被稱為大包米,於1907年曾因皇家香港天文台興建訊號山訊號塔,所以公園被稱為訊號山花園,訊號塔作用係每日為維港船隻準確報時,代替水警總部,塔頂桅杆有一個空心銅製時間球報時,不過目現時已經被拆除。若熱帶氣旋吹襲時,旁邊小型建築物亦會於半空掛起風球訊號,附近可清楚睇到。其後,訊號塔嘅時間球因不合時宜而逐漸荒廢,最終1933年就被拆掉,不過訊號塔早在80年代就獲封為香港二級歷史建築,而於11年前亦升為香港一級歷史建築,5年前更被政府列為法定古蹟。

而訊號塔以紅磚牆舖砌,據悉來自花崗石,並以當時流行嘅愛德華巴洛克風格建築設計,四角為斜削角,滿滿英式格調,目前訊號塔塔頂一層窗戶為圓形,而下面兩層就為方形,半圓球狀塔頂更被髹成淺綠色,不單採愛德華風格設計,而且塔身充滿古典色彩,非常雅緻。訊號塔為訊號山花園嘅獨特標誌建築,雖然物換星移,但呢座超過100年嘅歷史建築,絕對係打卡好去處。

雖然訊號塔靠近維港,但目前已被部份海旁建築遮擋,從維港未必可以清晰見到訊號塔。目前訊號塔樓高3層,但據悉原先只得2層,由42呎加建到62呎,目的都係為咗令維港船隻清楚睇到訊號塔。

上訊號塔之前會見到一座白色磚牆嘅小平房,斜屋頂同白色主調亦可作影相之處。沿窄樓梯直上即達訊號塔,而訊號塔旁邊有個大花園空地,既有充滿古色嘅涼亭、又有樹木遮蔭嘅枱櫈,可作休憩用途之餘,亦可欣賞維港靚海景。

訊號塔內有一條幾有美感嘅旋轉樓梯,亦可作打卡位,不過樓梯偏窄,只夠一個人行走。塔內呈八角形,四邊皆有窗口,可以從四面睇風景,東面可以望到填海後愈來愈窄嘅維多利亞港海景,而西面則可以睇到日落景,訊號塔前後就睇樹林景多,周末不妨去呢個尖沙嘴小小後花園行個圈啦!

E.A.Tips﹕

((1)訊號山花園可從緬甸臺入口進入,位置於垃圾房隔離,比較低調,可能唔太覺眼。

(2)訊號塔附近比較多蚊,最好噴定蚊怕水先去。

(3)沿斜路直上到頂即可到達訊號山,分岔路極少,路程僅約5至10分鐘,上超窄樓梯前會見到白色主調嘅平房建築,直上樓梯即達訊號塔。

(4)訊號塔內嘅旋轉樓梯只夠一個人行,兩個人就要前後而行,梯級亦較細,需要注意安全。

(5)拍攝個人照就上一樓較好,但拍攝風景照再上二樓就靚好多,而三樓只有一條斜梯,而且唔開放。

訊號山花園

九龍尖沙咀緬甸臺訊號山花園
09:00 – 11:00、16:00 – 18:00

Please Like & Follow & Subscribe /
歡迎讚好、追蹤、訂閱