市區都有唔少山丘值得行吓，九龍灣有一座叫平山嘅小山就係其一，只係高將188米，屬九龍半島觀塘區山丘，位處彩虹至九龍灣之間，雖然有624級樓梯，但路段唔算辛苦，既可影黃昏夕陽景，亦可拍攝夜景，尤如九龍灣版嘉頓山，值得拍拖上山行吓。有幾條路線均可到達平山，路段更有季節限定嘅芒草，秋冬近尾聲，不妨兩個人抓緊尾巴去平山睇睇啦！
延伸閱讀﹕小玉桂山連接利東海怡 15分鐘輕鬆登頂環瞰180度海灣
平山可遠望啟德機場，所以叫機場山，西面更有平山石礦場，18世紀用嚟採掘花崗石，高等法院、青洲燈塔、舊郵政總局等都係使用平山石礦場嘅花崗石，甚至運到廣東福建起廟起祠堂起教堂，如廣州石室聖心大教堂。舊採石場丟空30年先再開發彩雲道、佐敦谷。整個小山可望區內住宅地帶，包含坪石邨、彩盈邨、彩德邨、彩福邨及彩霞邨，目前小山已削成懸崖狀。
最精彩嘅路段，只需經彩禧路公園行到彩榮路、彩榮里，沿彩雲道食水配水庫對面樓梯行，即達平山小山頂，不過呢個入口樓梯同時係最多、最斜，向上望有幾分氣勢，需要有心理準備，但記者覺得路段同深水埗嘉頓山差唔多。
唔少居民會將衫褲掠於平山上，樓梯中途亦不時有大袋，一望就知道自己位處市區，有種舊香港嘅公屋感覺。不過行長樓梯時，轉頭望望背後風景，赫然發現可直視獅子山，側面輪廓幾清晰，山底有各屋邨屋苑，從平山高點可環瞰東九龍一帶，高樓大廈中間更可眺望啟德、觀塘海濱。黃昏、傍晚時份，更可以睇日落西山、晚霞靚景，一邊上樓梯，一邊睇住背後斜陽逐漸變成金黃色，絕對值得上山影吓相。
沿長樓梯直上山頂，中段會發現平山有唔少芒草，都算可以抓緊秋冬尾巴觀類芒草，而且平山人流較少，唔需要同人逼上山睇市區芒草。
天橋上頂轉左 
從標高柱位置，可望3條分岔路，一段係彩榮里長樓梯，一段係直通往佐敦谷，一段係彩榮路公園，其中兩段路都可連接到佐敦谷晨運徑，穿梭林蔭後即達另一端出口。當中，長樓梯對面路段就係東面佐敦谷公園、順利邨，更可望飛鵝山，中段更有小路捷徑直通出口，再行2分鐘即達佐敦谷公園，可以順道去野餐、放空。
天橋上頂轉右 
沿路轉左上山, 直去可到佐敦谷公園
門口對面為紀律部隊宿舍，謹記事事小心……有車 
從右邊小路進入此路 
山路會連接返石屎路，此欄杆標記為連接佐敦谷晨運徑之處，謹記上面前人留低嘅8隻字
E.A.Tips﹕
（1）第一個入口靠近彩德邨，由九龍灣得寶商場轉入彩雲道，直上彩霞道至通天電梯到彩禧路公園，再直上彩榮路、彩榮里，然後沿彩雲道食水配水庫迴旋處對面樓梯直上472級樓梯，再行152級樓梯，即達平山山頂標高柱；第二個入口為彩榮路公園，經彩禧路公園、彩福邨到彩榮路公園，沿路可直上佐敦谷晨運徑，中途可轉左直上平山；第三個入口可由佐敦谷上山，靠近佐敦谷公園，入口對面係順利紀律部隊宿舍，需要小心，路段係山路捷徑，其後會連接返水泥路段；第四個入口為新清水灣道，上佐敦谷晨運徑或聖若瑟英文中學對面樓梯上；第五個入口為明愛樂恩學校迴旋處對面小路。
（2）佐敦谷路段會有倒塌大樹，需要小心安全。
（3）長樓梯比較陡峭，天氣欠佳時最好都係唔好上山，避免發生意外。
（4）由九龍灣上山，其實時間都要30分鐘，所以都最好準備定充足糧水。
（5）睇夜景嘅話，最好帶定頭燈，以免落山有意外發生。
延伸閱讀﹕CoCo Espresso登陸九龍灣 罕見氮氣咖啡綿密有餘韻
彩雲道食水配水庫
觀塘北 
24hours
在〈九龍灣版嘉頓山 624級直長階梯望獅子山 快閃登平山睇芒草〉中有 3 則留言
留言功能已關閉。