2021-04-10

尖沙嘴地庫賣台式牛肉麵 3間黃店參與限定Hello Kitty Hungry Hunt美食巡禮

犇之食堂@Hello Kitty Hungry Hunt美食巡禮

32 個人瀏覽過





Hello Kitty迷注意!3月至4月有6間餐廳推出Hello Kitty Hungry Hunt美食巡禮,身為Hello Kitty忠實擁躉嘅小編當然要去朝聖吓,不過6間當中只有一半係良心小店,即使拍拖兩個人要探索Hello Kitty美食地圖,都謹記要堅持初心呀!

最近Lasonic Limited與Sanrio聯乘Hello Kitty Hungry Hunt美食巡禮,3間有參與Hello Kitty Hungry Hunt美食巡禮嘅餐廳係御勝牛、Camellia、奔之食堂,日式、西式、台式餐廳都有,今次編輯先去其中一間,有閒錢先去埋另外2間。呢間位於尖沙嘴嘅奔之食堂,位處地庫一隅,目前門口擺放咗大大隻Hello Kitty公仔作裝飾,呼應返Hello Kitty主題,必然係Hello Kitty迷打卡位!

而奔之食堂原以台灣菜為主打,是次特別推出Hello Kitty 為食餐,包含5款食物、飲品,有刈住你飽$52、奶黃飽$52、珍珠之森$62、卡布奇諾$48、QQ芋圓$62,價錢偏貴,只係每樣加插Hello Kitty元素。當中,刈住你飽即台灣出名嘅刈包,內餡夾有一塊半肥瘦五花腩肉,同時有酸菜、青瓜、生菜等,略帶鹹香,只係包上印有Hello Kitty嘜頭。

卡布奇諾即係一杯有Hello Kitty拉花嘅Cappuccino,可愛悄皮感覺油然而生,咖啡表面有綿密奶泡,良久未溶化,Hello Kitty拉花保持得幾耐,咖啡味濃郁,Cappuccino向來比Latte少奶而重苦澀味,咖啡味更香。

    

至於QQ芋圓即係一般芋圓、番薯圓、紫薯圓,加上仙草、黑糖珍珠、奶茶冰,再添加3粒以Hello Kitty為原形嘅椰汁奶凍,三色芋圓本身煙煙韌韌,只係比較淡口,仙草、黑糖珍珠亦爽滑香甜,奶茶底甜味充足,只係冰粒比較多。3粒椰汁味奶凍幾彈牙,配搭奶茶底更香甜,係夏天冰涼嘅甜品之一。

下午茶叫一碗眷村紅燒牛肉麵$78,配手沖檸茶加$5,但茶味唔太濃厚,偏淡身,檸檬味尚可。而牛肉麵有微辣味,湯底份量唔少,但牛味唔算重,僅輕微甘甜味。每碗有3至4片厚切牛肉,屬牛𦟌肉,肉質軟稔,味道唔重,蘿蔔反而幾軟嫩入味,至於麵條偏粗身,稍滑溜,質感比較一般,少量蔥花調味比較香口。


E.A.Tips﹕

(1) 由即日起至2021年4月18日,都會有期間限定Hello Kitty Hungry Hunt美食巡禮。

(2) 於奔之食堂點2款Hello Kitty餐點,即可免費換領Hello Kitty Hungry Hunt指定限量主題襟章乙個;於Camellia消費滿$350,包括Hello Kitty餐點1份,即可免費換領襟章乙個;而於御勝牛消費滿$200,包含Hello Kitty餐點,即可免貴換領襟章乙個。

(3) 御勝牛地址為何文田窩打老道72B 號,而Camellia地址則為尖沙嘴梳士巴利道18 號Victoria Dockside K11 Musea地下033 號舖,至於犇之食堂就為於太陽廣場地庫。

(4) 以$99可換購Hello Kitty Hungry Hunt主題旗仔乙枚,用作收集主題襟章;另以$99亦可換購Hello Kitty手繪風咖啡杯乙套。

(5) 餐廳若唔夠貨,會隨後補返,記得保留單據再取呀!


奔之食堂

尖沙嘴廣東道28號力寶太陽廣場LG樓LG07-08號舖
星期一至六 11:30 – 21:30;星期日 11:30 – 19:00
2668 6638

Please Like & Follow & Subscribe /
歡迎讚好、追蹤、訂閱