坪洲牛皮廠 Secret Garden

坪洲牛皮廠活化秘密花園 秒變裝置藝術空間



一年前,坪洲人流稀少,遊客甚少,碰面嘅只係外籍遊客同當地居民,估唔到一年後多咗好多香港人同大陸遊客,除咗武漢肺炎令本地人未能出境旅行呢個因素,導致好多人到離島遊避疫一止旅行癮,仲因為前身為牛皮廠活化後變成秘密花園呢個打卡點被散播,以致唔少人慕名而至影相,最近將坪洲市區擠得水洩不通。

坪洲一間牛皮廠曾被評為三級文化古蹟,後來因丟空而被活化成藝術花園,翻新廠房後成為少女同大媽嘅打卡熱點,雖然呢個以Secret Garden命名嘅秘密花園喺一年前已經存在,但近一年成為少女打卡同文青攝影嘅地方,有時間亦不妨兩個人放慢腳步,拍拖去閒遊一下呢。

永安街有一個小巷入口寫住「牛皮廠」,只瑟縮角落,隨時會走漏眼錯過,內有一道塗上色彩嘅昏暗走廊,十足十現實版萬花筒,超有動感!走廊後原來別有洞天,據悉有4萬呎空間,天花、牆身都掛滿一件又一件以廢物製成嘅藝術品裝飾,全部亂中有序,包括紙杯、風扇葉、車胎、籃球、網球、枱櫈、獎牌等,都是居民日常廢物,以環保為概念,只注入適量色彩同藝術元素,令場地一秒變成裝置藝術空間。

牛皮廠原本係一個工業地帶,屬島內其中一個工廠,惟後來因荒廢而淪為廢墟,整個空間頹垣敗瓦,其他廠都被清拆,而目前只淨返牛皮廠活化後容許公眾進入參觀,成為民間藝術村,推廣小島歷史同藝術,有幾分似台灣文創空間。

呢個藝術空間內有民宿、食肆,首先會見到一間Chill Chill Country,販賣消暑飲品同手作製品,旁邊隱藏咗一間古董店連民宿,下層為古董雜貨店,可以找尋各種有收藏價值嘅古物,上層就係民宿。民宿對面有個滿佈花草嘅小花園,外面有跳飛機,充滿懷舊感。沿彩色樓梯向上行,會見到另一部份嘅打卡位,每件藝術品都用心堆砌,包括爛櫈、牛皮刨、水管、水喉通,甚至單車組件、爛銅爛鐵,一堆廢物堆置起來就變成一座藝術品,再步上樓梯會見到屋頂原來係太陽能板,整個環境似足走入第二個空間,的確唔簡單。行到末端,仲有一間叫好望角嘅咖啡店,沿路行出去會到達東灣海灘同龍母廟。

不過,坪洲原本係一個純樸、恬靜怡人嘅小島嶼,入離島係為咗遠離市區,感受多見風景少見人嘅環境,目前牛皮廠活化後引得一眾少女遊客同大媽而至,令小島人流增多,到底會唔會同本身環境理念有啲背道而馳呢?

E.A.Tips﹕

(1)牛皮廠入口喺永安街左面,由新寶馬茶餐廳小廚向前行1分鐘即達。

(2)記得保持安靜,唔好騷擾其他人,整個空間係公眾地方,並唔係閣下嘅。

(3)打卡還打卡,唔好亂搞場內藝術品,並非屬於你,你影到靚相,唔等如其他人都影到靚相。

(4)藝術空間嘅裝置藝術每個禮拜都會更新吓,所以每個月都有可能睇到唔同嘅藝術品呢!

(5)民宿可以從Airbnb搜尋兼預訂,得唔得就要靠運氣啦。

延伸閱讀﹕Chill歎懷舊黑牛白牛 坪洲茶記蝦膏炒飯超有鑊氣!

延伸閱讀﹕只有3個選擇 坪洲極神秘嘅海邊咖啡店Secret Cafe

延伸閱讀﹕30分鐘走訪坪洲另類天涯海角 行無人沙灘兼睇釣魚翁石

延伸閱讀﹕大利島碼頭黃昏熱點 坪洲延伸小路走入趣味空間

牛皮廠 Secret Garden

坪洲永安街21D(牛皮廠)
室內小店大概係10:00-20:00,室外空間24hours

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!