【3低本地遊】歎地道餐廳+海邊咖啡坪洲輕鬆環島遊！

瀏覽次數：342

個人瀏覽過

坪洲向來係一個純樸兼恬靜怡人嘅小島，相比生活節奏急速嘅市區，坪洲絕對係周末兩個人享受慢活節奏嘅好地方，本身人流疏落，面積亦比長洲、南丫島細得多，但眾多離島之中，以坪洲為最有價值嘅拍拖好去處。

坪洲歷史悠久，由唐宋年間已有漁民居住，19世紀末至20世紀初曾發展灰窰業，以蠔殼、蜆殼、珊瑚等燒製成石灰，最高峰有11間灰窰廠，唔少居民都以此為工作，直到60至70年代因坪洲工業發展蓬勃，火柴廠、大型鋼管廠、柚木傢俬廠、造船廠、紡織廠、牛皮廠等逾百間廠房屹立坪洲，手工業亦相繼興起，現時坪洲仍有部份灰窰廠遺址，如勝利灰窰廠遺址。有傳坪洲將會被政府納入作興建大型人工島新市鎮，美好風景最好趁早攝錄，以免後悔。

第一站﹕新寶馬茶餐廳小廚

踏入坪洲，兩個人首先要去搵間餐廳醫吓肚，一般人會揀熱門餐廳祺森冰室等，但往往人流極多，今次帶大家去一間地道餐廳，夠晒懷舊味。永安街嘅新寶馬茶餐廳小廚門面好有文青咖啡店感覺，帶有慵懶感，可以打吓卡。最受歡迎嘅菜式係菠蘿包夾雪糕，飲品亦充滿懷舊感，不過記者比較推介食炒飯，蝦膏炒飯、豆豉鯪魚炒飯都充滿地道風味，滿口鹹香味，市區未必食到嘅鑊氣。

延伸閱讀﹕Chill歎懷舊黑牛白牛坪洲茶記蝦膏炒飯超有鑊氣！

第二站﹕永安街

坪洲永安街係區內主要街道，大多數居民都於丁屋居住，住所樓下則用作店舖，如餅店、冰室、文具店、單車店、食品店等，感覺似足50年代舊香港模式。而永安街亦算係必經之路，無論去邊個景點，都會經過永安街。

第三站﹕牛皮廠 My Secret Garden

呢個秘密花園係由牛皮廠活化而成，引得唔少人慕名去打卡，而牛皮廠建於30年代，後來被評為香港三級歷史建築物，近年由廢墟演變成藝術花園，從小巷走入4萬呎空間內，走廊似足萬花筒，室外貌似民間藝術村，滿佈由日常廢物設計而成嘅裝飾品，亂中有序，注入色彩，增添藝術元素，即時變為裝置藝術空間，似足台灣文創空間，非常環保。

延伸閱讀﹕坪洲牛皮廠活化秘密花園秒變裝置藝術空間

第四站﹕手指山

由牛皮廠步出，瞬間可以直達東灣海灘、龍母廟，沿右邊小路可通往手指山方向。少人又無車嘅坪洲，感覺特別舒爽，步行15mins可到達手指山山頂休憩處，再步行5mins可到達銀洲仔亭。手指山為坪洲最高點，高約95米，東望九龍半島，南眺南丫島三支煙囪、喜靈洲，西望愉景灣、大嶼山，北眺香港迪士尼樂園、青馬大橋。若從上方觀察，可見坪洲狀似凹字，四面環海，凹陷地方為東灣，南、北面分別有南灣，東北有釣魚翁石，一端連接大利島碼頭。

延伸閱讀﹕長洲坪洲梅窩離島遊撞口撞面都係外國人

第五站﹕釣魚翁石+心形石

折返東灣泳灘方向，於無需要汗流浹背嘅情況下，步向另一個人流稀少嘅天涯海角。沿路直行至釣魚公觀景亭指示牌，步入後會經過農地、蕞林、商業電台信號站，約15至20mins可到達無人沙灘、釣魚翁石，既無人、亦無垃圾，水質方面亦相對地清澈。沿坪愉徑走，會見到一個又一個沙灘，內有心形石可以打卡，其中一個小沙堤有幾分似隨時會被海水淹沒嘅連島沙洲，不妨停低吹吹海風或於睇黃昏夕陽景色，沿路景觀遼闊，同時眺望愉景灣、香港迪士尼酒店、青馬大橋，再步行10至15mins，即可返回山腳位置。

延伸閱讀﹕30分鐘走訪坪洲另類天涯海角行無人沙灘兼睇釣魚翁石

第六站﹕大利島碼頭

走出坪愉徑，可行到大利島碼頭方向，屬坪洲其中一個景點，適合垂釣或觀賞夕陽，大利橋盡頭亦有一個小燈塔。事實上，呢度前身為灰泥廠，目前為廢物轉運站、污水處理廠。而從旁邊小路進入，可以走到另一個趣味空間，似足牛皮廠一樣，廢物利用，變成小型打卡位。末端更有一個小灘，環境恬靜，亦屬賞景、吹海風、休憩、放空之地。