2020-09-21
新寶馬茶餐廳小廚

Chill歎懷舊黑牛白牛 坪洲茶記蝦膏炒飯超有鑊氣!



遊客去坪洲通常會去祺森冰室,出名程度等同歎High Tea一定要去半島一樣。不過,該冰室人流極多,而且網絡上有海量式相片,你再去打卡亦只係空中一粒微塵,今次為你介紹另一間更出色而較少人打卡嘅食肆,菜式地道,懷舊味十足,門口仲有一個Chill爆嘅打卡位,絕對值得拍拖去試吓!

對比長洲、南丫島,坪洲向來係比較少遊客嘅地方,不過近一年遊人增多,對比上年幾乎只有少數外籍遊客嘅坪洲,今年坪洲明顯多咗遊樂地方,唔少食肆都需要排長龍。位處永安街嘅新寶馬茶餐廳小廚,裝潢顯心思,門口牆身為天藍色調、木系為主,綠色植物陪襯,帶有幾分文青感同慵懶感,仲可以好似咖啡店咁打卡,驟眼睇未必估到只係一間地道茶記。

餐牌選擇眾多,有時候覺得一間餐廳好食同唔好食,除咗大廚功架,亦取決於識唔識叫嘢食,所指適當地方叫適當食物。當然,大多數人都會叫菠蘿包夾雪糕 $32,據稱酥脆菠蘿包內夾住唔同口味嘅雪糕球,冷熱共融,菠蘿包熱力融化冰凍雪糕,既可打卡,又夠特別,難怪屬人氣之選。

話明茶餐廳小廚,當然係叫炒飯啦!最有地道特色嘅要數蝦膏炒飯 $54,離島嘅蝦膏比較地道同有鹹香味,菜式並非市區輕易可以炮製,以蝦膏嚟炒飯,炒飯啖啖蝦膏香味,加入配料層次更豐富,飯粒乾爽,唔太油膩,大廚炒得超有鑊氣,好有水準,而且飯量充足,細食嘅人可以兩個人食一碟都得。

另一碟係估唔到好食嘅豆豉鯪魚炒飯 $58,炒飯睇落黑漆漆,賣相一般,但實際上同樣炒得好香口,好夠鑊氣,豆豉鯪魚切碎後再拌入炒飯,令飯粒更帶有豆豉同鯪魚嘅鹹香味,平時罐頭豆豉鯪魚有好多油沉底,但炒飯內油份唔多,好乾爽。

餐廳最出色嘅係地道懷舊食物同飲品,黑牛、白牛絕對係首選,屬於白牛嘅白雪公主 $27即係7up加雲呢嗱雪糕,而黑牛 $27即係可樂加朱古力雪糕,頂端雪糕球既可先食幾啖,亦可等雪糕融化,溶於汽水內,等同於忌廉溝鮮奶嘅感覺,飲嘅一樣係懷舊味道,都屬於市區極少有嘅懷舊飲品。

E.A.Tips﹕

(1)一般人坪洲落船會先揀最出名嘅祺森冰室,冰室無位先會去睇其他餐廳,所以落船後最好食咗先,否則等候時間會更長。

(2)餐廳睇落無中文餐牌,但實際上應有英文餐牌提供,因為好多外國人光顧。

(3)由碼頭行到餐廳,大概只係3mins腳程。

(4)假日無套餐,只能夠散叫,飲品都係計原價,價錢比較貴,建議非假日先去。

新寶馬茶餐廳小廚

坪洲永安街29號地舖
星期一至五 11:00 – 20:30;星期六至日11:00 – 20:00
2983 8218

Please Like & Follow & Subscribe /
歡迎讚好、追蹤、訂閱