九龍,  兩個人影吓相,  神秘之地

「港版金閣寺」禪意古色庭園 南蓮園池規矩多爭議更多



日本寺廟向來建築設計一流,但其實香港亦同樣有充滿古色嘅庭園,位處鑽石山南蓮園池內嘅圓滿閣絕對係「港版金閣寺」,八角形設計,鑲上金箔更顯金碧輝煌。園內環境清幽,花園、水池以中式園林建築為主,但小編覺得有幾分似日式寺廟建築風格,迷你被金閣寺更加係打卡之處。不過,南蓮園池內規矩眾多,管治手法一直以來有無間斷嘅爭議聲音,包括不准寫生、不准拍攝公仔等,今次小編兩個人甚至見到管理員不准菲籍人士碰觸欄杆。

位於鑽石山嘅南蓮園池補靠獅子山、慈雲山,毗鄰為荷里活廣場,係康文署轄下公園之一,政府以$1象徵式收費委託志蓮淨苑管理,包括任何設計、監督、維修等。小小園池以唐代園池建築設計為主,採用特色木質、奇石、古樹建造,當年花費甚鉅,造價近2.5億,政府承包近1.8億,其餘則由志蓮淨苑捐建,目前為休憩同觀賞之用。園內有木建構建築藝術館,木製模型非常精緻,同京都清水寺一樣用木材搭建,唔用釘建造,其他地方如水車磨坊、小瀑布都係吸睛位,南蓮園池內亦有售賣紀念品嘅店舖、素菜館、茶館等,不過價錢上唔太抵食。

園池內環境布局似足一個隋唐園林,原來靈感係來自隋唐郡府園林絳守居園池,以山水型為主,滿滿藝術特色,可以喺繁囂城市中得到一片靜寂,十足城中古園,亦可加深歷史文化認識。將山水、堤谷地貎、花木柏槐融合,加上古色古香嘅實木園景建築,獨特形狀同紋理非常吸引,甚至屋簷上花紋、各種奇石質感都係值得一睇,布居匠心獨造,清靜環境下絕對係休憩好地方,亦可以構成一幅又一幅完美的山水風景畫,松林、花朵造景一流,有種慢活郊遊感覺,拍拖周末假日閒遊極適宜,不過大好環境卻被園內莫名其妙嘅規管大煞風景

南蓮園池受香港法例第132章遊樂場地規例規管,另外自設一堆遊園守則,不准喧鬧、踐踏草地、池內放生、亂拋垃圾、刻字塗污、採摘花草、飲食、嬉水、奔跑、攀爬等都係一般大眾明白嘅公園規矩,加上屬佛門清靜地,即使不准使用腳架或自拍棍拍攝,我哋明白會阻礙他人,而不准穿著畢業袍、婚紗等亦不無道理,只准日常衣著都正常。

不過,部份規矩則令人莫名其妙,例如不准逆線遊園走回頭路寫生畫畫拍攝公仔向魚池揮手團體合照帶花放隨身物品在地,通通以影響觀賞為由拒絕,而拒絕原因並沒有根據自己所出之約章規範,只由保安按喜好同幻想自行演繹。當日小編手拿自攜公仔拍攝亦被管理員阻撓,理由就係公仔為畢業照中之飾物,所以視之為拍攝畢業袍照,惟我哋只係日常衣著,對於拍畢業照指控感莫名奇妙。湊巧地2008年已有相關案例,有一位女士自攜100cm公仔遊園拍攝,即使同樣非商業用途亦被阻撓,女士更直指阻撓拍攝理由牽強,反質疑係咪要著唐代衫先可以影相,最終被傳媒追問下康文署先肯承認管理過嚴需檢討,而11年後嘅今日未見改善卻似變本加厲。

同年有另一案例,遊園寫生嘅女畫家亦受阻撓,當時女畫家並無設畫架,只手持A4紙大小速寫簿同針筆寫生,仍然被管理員阻止繪畫,並以只准欣賞、不准寫生、上司命令為由阻撓。

另外,當日小編亦親自發現另一個例子,星期日唔少菲籍僱傭放假遊園,只係唔多於5位菲籍女士,以手碰到欄杆影相,即被管理員以簡單港式英文大鬧,並非勸喻,直指唔可以碰觸欄杆。不過,小編發現小紅書中唔少大陸來港、有小粉紅之稱嘅女遊客都有公開地碰觸欄杆,甚至刻意衣著暴露、公然除鞋上櫈打卡,難道只要係大陸客就可以順理成章做任何事?

E.A.Tips﹕

(1)巴士路線3B, 10, 11, 11C, 38, 42C, 61X, 62X, 70X, 74A, 74X, 75X, 80, 82X, 84M, 85C, 85M, 89, 89B, 89C, 91, 91M, 92, 258D, 259D, 286M, 671, 796B, 906R, E22, E22A,仲有19, 19M, 70, 72號小巴均可抵達。
(2)園內規矩眾多,除咗正常遊園規矩,部份規矩令人莫名其妙,記得留意各項規矩。
(3)以仰視角度拍攝圓滿閣,可避開後面嘅大廈,感覺有幾分似日式風格,的確似迷你版金閣寺。

延伸閱讀﹕美食沙漠中搵食 鑽石山歐陸式咖啡店歎靚扒

南蓮園池

地址﹕鑽石山鳳德道
開放時間﹕07:00–21:00
電話﹕3658 9366

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


鄰近車公廟!沙田大圍廢校轉化綠色空間 環保博物館將藝術融入生活
全港3間分店!復古裝潢還原屋邨走廊賣懷舊點心 老馮茶居不如用一款點心單飛?
藜麥紅白米飯配滋補燉湯 大角嘴$48健康港式便當
荃灣清靜秘密花園 大會堂劇院咖啡店歎下午茶
大角嘴街坊刺身壽司專門店 丼飯全日供應最平$40
元朗錦田路邊大排檔毗連公園街市 超高水準街坊醉雞麵/海南雞飯回頭率高
荃灣人氣新式大排檔旗艦店 與時並進改良舊餸菜吸斯文客人?
石崗軍營賞楓!雷公田起步遊200年歷史甲龍古道 直搗川龍家樂徑眺青馬/昂船洲大橋【秋季紅葉2021】
大角嘴高水準台式手工芋圓店月底將結業 滿$100送2件芒果糯米糍
【年糕巡禮2022】新年最黃賀年糕點完整名單!近50間港九新界實體店連網店年糕蘿蔔糕即刻預訂!
野餐隨行【大嶼山及離島篇】有View有草地!全港100個近鬧市近食肆安心野餐點 梗有一個喺左近!
野餐隨行【港島篇】有View有草地!全港100個近鬧市近食肆安心野餐點 梗有一個喺左近!
野餐隨行【新界篇】有View有草地!全港100個近鬧市近食肆安心野餐點 梗有一個喺左近!
野餐隨行【九龍篇】有View有草地!全港100個近鬧市近食肆安心野餐點 梗有一個喺左近!
荔枝角程班長台灣美食宣佈即將結業 台灣味牛肉麵營業至3月!
露營地全禁?赤徑藏荒廢小教堂!西貢東100%瀝青路穿越鹹田灣+西灣沙灘