【日本偽旅行】全港5個本地「日式庭園」 秒到鳥居/神社/繪馬/動漫場景打卡

[sig_post_pv label=””] 個人瀏覽過





疫情持續,香港人想重新搭飛機去旅行嘅願望,未知幾時先可以出現。本地遊興起,令唔少地方都逐漸人山人海,良心餐廳更加係門庭若市,事實上本地重有好多地方值得一遊,由今日起,編輯會為讀者推介兩個人本地偽旅行,令你哋可以有一秒穿越異國嘅感覺。去唔到旅行,頂住當先啦……

香港有好多值得一遊嘅公園,當中有唔少係可以影吓相,先為大家推介共中5個以日式設計為主嘅小公園,大多隱藏於鬧市一隅,望落似足日式庭園,比起幾千萬嘅噴水池更有特色,可以隨時拍拖去「港版日式庭園」影吓偽旅行照片。

(1)炮台山﹕天后廟道三號花園

位於港島嘅天后廟道三號花園,靠近馬路邊有一個迷你京都庭園,地方唔大,但每個角落都有日式風格,小公園樓上就係配水庫遊樂場,離紅香爐峰入口約只有15至20分鐘步程。小公園最特別之處係一個以竹棚搭建嘅屋頂同和風小屋,小屋外更連有石小橋,就連角落小裝飾都有和式風格,如竹籬笆、驚鹿、蹲踞、石燈籠等。

延伸閱讀﹕秒遊京都! 炮台山配水庫旁秘藏日式公園 30分鐘直上紅香爐峰山頂

(2)鑽石山﹕南蓮園池

第二個係同樣可以一秒穿越京都嘅小公園,位處九龍嘅南蓮園池內有唐代園林建築,既有中式古色古香味道,庭園中央更有一座八角形設計嘅迷你版金閣寺。公園內造景獨特,布局匠心,狀似山水畫,環境寧靜,不過場內保安嘅規矩一度受爭議。

延伸閱讀﹕「港版金閣寺」禪意古色庭園 南蓮園池規矩多爭議更多

(3)元朗﹕元朗公園

第三個係比較少人留意到嘅小角落,雖然處於元朗公園內,但一般人未必會留意呢個迷你動漫場景。既似足日式庭園,亦恍如小型《姆明》小屋,只要校啱角度,就似走入童話小說內嘅「姆明谷」。對比東京《姆明》主題公園的確極遜色,但迷你「姆明谷」亦有藍色尖頂小屋、堡壘磚牆,附近被翠綠山坡、河流、果樹、花朵包圍,有如童話國度。

延伸閱讀﹕童話國度!元朗驚現香港姆明小屋 神還原芬蘭童話小說場景

(4)太子﹕大坑東遊樂場/大坑東蓄洪池

第四個係更少人留意到嘅地方,位於足球場旁邊,但佈滿草牆嘅小屋配合大草地,令環境恍如經典動漫《IQ博士》嘅天神村。雖然現實中只係一個蓄洪池,但藤蔓遍佈牆身,形成密密麻麻嘅草牆,配合地面碧綠草地更有唯美感,增添異國感。

延伸閱讀﹕異國風小屋佈滿草牆 恍如《IQ博士》天神村

(5)長洲﹕長洲北有蓋配水庫公園+長洲關公忠義亭

最後一個係五個當中最遠離市區嘅一個,亦係陸路無法到達嘅地方,不過走入長洲,不單可以搵到日式鳥居、神社繪馬打卡,櫻花季時更可以拍攝櫻花照片,今趟拍拖情侶好去處更加可以營造偽旅行感覺。日式庭園靠近長洲北面,入口參照日本「鳥居」牌坊,最特別係以原木打造,而非石屎建成,有如明治神宮嘅「一の鳥居」,另外行上少少可以俯視似足北海道嘅風景。至於櫻花同神社繪馬就需要折返長洲碼頭嘅另一個方向,每年有唔同品種嘅春季樓花,上年係台式山櫻花,今年就變成中國紅櫻花;而附近更有一個以日本神社繪馬設計為藍本設計嘅祈願版,揉合中日式設計,同「絵馬掛け所」掛有五角形木板一樣掛上祈願內容,總算可以幻想自己去咗日本神社啦。

延伸閱讀﹕【2021賞花地圖】30分鐘船程穿越日本! 走訪日式鳥居兼神社繪馬打卡 一棵棵桃紅櫻花艷絕長洲



Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!