2020-08-04
HOKO Farm

美食沙漠中搵食 鑽石山歐陸式咖啡店歎靚扒



鑽石山美食點稀少,大部份都係連鎖店,要搵一間可以接受嘅良心店,往往要跨區去隔離黃大仙或新蒲崗,甚至上慈雲山,荷里活廣場內亦有一間可以接受嘅餐廳,應該算係萬藍叢中一點黃。

座落廣場內嘅HOKO Farm,餐廳裝潢以原木為主,有幾分歐陸感,開放式設計令空間感大增,高樓底背後係玻璃幕牆,透視荷里活廣場標誌之餘,亦可透入自然光,令室內都有幾分寫意。加上座位距離甚遠,同其他餐廳相比,疫情期間可以食得較放心。

食物以西式同歐陸式為主,有牛扒、Pizza、意粉、沙律等,份量嚟睇,兩個人拍拖食啱啱好。坐低侍應會送上一客蒜蓉包,麵包脆口,塗上薄層牛油同蒜蓉,牛油香夾雜蒜香味,係一份幾好嘅前菜。

水牛芝士莎樂美腸薄餅 $96,Pizza內包含Salami同Mozzarella Cheese,同連鎖店Pizza有分別,無分厚批、薄批,熱辣辣上枱嘅Pizza似典型Italian Pizza,偏薄,批底香脆,但有啲似餅乾,批內柔軟,上面舖有Salami同Mozzarella Cheese,Salami帶有鹹香味,夾雜香濃水牛芝士味。

燒美國頂級肉眼牛扒(300g)伴薯菜或意粉 $338,配上燒汁,牛扒燒成井字坑紋,微微香口,肉眼扒肉質軟嫩,5至7成熟剛剛好,淋上燒汁後帶上鹹味。牛扒經醃製過,有啲香料味,表面有少量鹽,切開時肉質色澤略顯嫩紅,微微粉紅幾軟腍,咬落有肉汁,略帶油脂香,有牛味。至於伴碟嘅薯條為波浪粗薯條,大部份幾乾身,少部份偏油,香脆可口,幾有薯香味,起碼上枱影完相仲有熱力。

秘製香草即烤原隻燒春雞(900g)伴薯條 $148,寫明製作需時30mins,但小編較好彩,可以30mins內可上枱,價錢其實有啲偏貴,不過原隻上枱還算不過不失。燒春雞上枱偏乾,體積為一隻碟大細,表面微脆幾香口,切開時都有雞汁溢出,但雞皮超鹹,反而雞肉味道就剛好,只有雞髀嫩滑,其餘都係雞胸質感,大概係一道健康菜式,唔俾食雞皮,只食雞肉。

食完濃味嘢要飲返杯花茶解膩,女士對花茶向來愛不釋手,不能抗拒,試一壺Midsummer Dream $38,包含法國玫瑰、洛神花、白桑綠茶、甜葉菊,上枱以蠟燭茶座為熱茶保溫,可一直從透明茶壺觀察茶壺內變化,呢壺花茶會有淡粉色逐漸變為微微紫紅色,愈深色表示花茶味愈濃烈。打開壺蓋,可聞到花茶香味,玫瑰香氣可寧神,法國玫瑰富含維他命C同礦物質,可幫助放鬆情緒,鞏固免疫系統同消化功能,甜葉菊同洛神花就可降血糖、血壓。花茶入口微甜,洛神花有種回甘味,整體可幫助解膩,飲落舒服。

e.a.tips
(1)花茶可以Refill,沖泡第二次仍可出味,不過一般Refill第三次後就會較淡。
(2)先撳飛,後入座。

HOKO Farm

地址﹕ 鑽石山龍蟠街3號荷里活廣場2樓288號舖
營業時間﹕ 08:00 – 22:30
電話﹕ 2327 1966
地址﹕ 鑽石山龍蟠街3號荷里活廣場2樓288號舖
營業時間﹕ 08:00 – 22:30
電話﹕ 2327 1966

疫情下安排 (最後更新至2020年7月21日) :
6:00-8:30PM 不設堂食只提供外賣自取,最後點餐時間為8:30PM
* 最新情況可瀏覽餐廳FACEBOOK

Please Like & Follow & Subscribe /
歡迎讚好、追蹤、訂閱