3低本地遊,  兩個人旅吓行,  和你Taste

【3低本地遊】鑽石山無鑽石有片場? 咖啡店歎靚扒 古色庭園似足迷你金閣寺

個人瀏覽過





今次行吓鑽石山,區內基本以住宅為主,包括龍蟠苑、星河明居,上有慈雲山,下有原為大型寮屋區、2000年已被清拆完成嘅大磡村,土地用作興建鑽石山屯馬線月台、公屋、居屋啟翔苑。附近有竹園、上元嶺、牛池灣,空間唔大,驟眼睇的確無乜值得遊覽,不過其實都暗藏一個古色古香嘅小公園,食完飯拍拖兩個人去行吓公園、影吓相又一日。

鑽石山英文叫Diamond Hill,小編細個以為鑽石山真係有鑽石,呢個諗法確實好幼稚,事實上鑽石山毫無鑽石礦,而背景到底係咩?坊間流傳好多故事,鑽字有鑽開之意,鑽石山原本有石礦場,採石幾十年,所以石山又叫鑽石山。另一故事係石礦場有好多閃亮礦晶,似足鑽石,故稱為鑽石山。不過石礦場原址一早已關閉,山被剷平,80年代起鳳德邨,未開採嘅小石山就成為慈雲山學校邨。

第一站﹕HOKO Farm

打開搵食APP,鑽石山值得食嘅餐廳唔多,大多係連鎖店,要搵小店只能行過黃大仙或新蒲崗,荷里活廣場內只有一至兩間良心小店,HOKO Farm就係其中一間。歐陸式風格嘅咖啡店以開放式設計,樓底特高,加上玻璃幕牆可延伸空間。食物主打牛扒、Pizza、意粉、沙律等,兩個人食都夠,前菜有蒜蓉包,薄層牛油同蒜蓉幾香口。Pizza比連鎖店優勝,入口鹹味無咁重,牛扒同燒春雞都值得一試,特別係牛扒,軟嫩又有肉汁,油脂豐腴,有牛味,而雞肉亦嫩滑,有雞汁溢出。最後可以歎返杯花茶作結,花香味濃,茶味甘香,微甜帶回甘味,相當舒爽。

延伸閱讀﹕美食沙漠中搵食 鑽石山歐陸式咖啡店歎靚扒

第二站﹕南蓮園池

50至60年代,鑽石山有好多片場,包括大觀片場、永華片場,仲有李小龍常出入拍攝嘅嘉禾片場,現時嘅荷里活廣場亦根據歷史而命名。而荷里活廣場隔離有一個仿唐建築嘅公園南蓮園池,南蓮園池同附近志蓮淨苑、斧山公園都由佛教非牟利慈善團體興建,政府僅以每年$1嘅象徵式費用委託志蓮淨苑管理南蓮園池。

南蓮園池係一個充滿古色嘅庭園,免費入場,背靠獅子山、慈雲山,毗鄰荷里活廣場,公園內嘅圓滿閣更有幾分日本寺廟風格,似足迷你版金閣寺!附近花園、水池都以隋唐郡府園林絳守居園池嘅唐式園林為藍本,佈局加入山、水、林木、古樹、奇石,自然山水型充滿藝術特色,原本係一個城中古園,拍拖閒遊拍攝一流,但就被莫名加妙嘅管治手法大煞風景!

延伸閱讀﹕「港版金閣寺」禪意古色庭園 南蓮園池規矩多爭議更多



Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!