【區區有小店】觀塘東廣場3間素食店到底邊間最抵食？

[sig_post_pv label=””] 個人瀏覽過

觀塘東廣場係觀塘之友嘅Food Court之一，小店林立，食物種類多多，本地人愈食愈健康，拍拖兩個人揀素食係健康啲嘅，當中淨係素食店都少有3間可擇，最啱OL食，記者試勻3間素食店，俾啲意見大家啦！

素食之選（1）﹕素食譜 💛

首先係開業2年嘅素食餐廳，內有堂食座位，主打係蔬食車仔麵，亦有五行蔬食養生飯、咖哩秋葵炒飯，通通價錢相宜，一碗3餸蔬食車仔麵只係$38，配有特調天然湯底，當然可轉其他湯底，除咗一般麵條，重有特製麵條，例如菠菜麵、蕃茄麵、地瓜麵，更有15款配料任揀，加$8可多一款配料，今次揀咗地瓜麵，配搭蘿蔔、芋頭丸、紫豆卷。湯底入口似味噌湯，微鹹，唔算重味，反而有清香感，可以飲埋。而地瓜麵亦偏幼同軟身，呈淡橙色，比一般麵條感覺較輕盈，但唔會太清淡。蘿蔔軟嫩鮮甜，無渣，而紫豆卷係腐皮感，至於芋頭丸就幾驚喜，內餡係芋頭蓉，入口綿軟幼滑，微甜。熱飲加$4，另外加$6可試吓小店自製嘅養生茶，當日係香橙南非國寶茶，茶包配上一大塊香橙，既有茶香，橙香味滲透茶內，好特別。

E.A.Tips﹕下午茶時段為15:00至17:00，會更抵食，$35套餐連熱飲，重有多款小食可擇。

素食譜

觀塘成業街7號東廣場寧晉中心地下57號舖
星期一至六 12:00 – 21:00；星期日全日休息
5539 4088

素食之選（2）﹕愛家，愛便當💛

另1間素食店係最早出現嘅愛家．愛便當，以日式素食便當為主，由網店轉為實體店，素食便當中有6至8件素壽司，或者2至3個有餡飯糰，重有1碗可以先暖胃嘅素湯、2款料理同1款甜品，整體係幾豐富。是日陳列套餐$68 有6款素壽司、2碟是日料理、1碗素湯、1份甜品，至於1人前$78 就有8件素壽司、2碟料理、1碗素湯、1份甜品，款款不時轉換，幾有新鮮感，不過價錢就比第一間貴差唔多1倍。食材顏色鮮艷，幾吸睛，而且以蔬菜為主，調味料唔多，都算係健康之選。各款壽司包含蕃茄、青豆、淮山、蟹籽、菇菌、蓮藕、黃椒、青椒，用蕃茄扮吞拿魚幾得意，壽司飯用咗穀物醋、黑糖調味，是日甜品係紫糯米糕，有豆沙餡，微甜。另外，有無限量供應嘅日式茶，可以消滯。

*編輯親身查證，東廣場愛家．愛便當舖位已經結業，目前遷至鴻圖道76號地下D室（更新自2021年6月）

E.A.Tips﹕撞正無晒白飯嘅話，需要等候得比較長時間。

愛家，愛便當

觀塘成業街7號東廣場地下G18號舖
星期一至五 12:00 – 21:00；星期六 12:00 – 16:00；星期日及公眾假期全日休息
9799 1916

素食之選（3）﹕嚐綠 Ever Green💛

重有1間素食店係主打係沙律外賣盒，專做外賣自取，細沙律$40可任揀3款，大沙律$60則可任揀5款，玻璃櫥窗櫃內有多達12款沙律選擇，重有幾款支裝果汁，當日驟眼睇的確好受OL歡迎。基本料都算足，選擇比較豐富，賣相可以打吓卡，最大賣點係每日有唔同餐單，略嫌服務姐姐態度一般。地中海小米沙律包含地中海小米、紅腰豆、鷹咀豆、乾蕃茄、粟米，有少少澱粉質，感覺有啲飽肚感。牛油果醬綜合沙律包含牛油果、青蘋果、車厘茄、粟米，蘋果幾爽脆，但牛油果醬唔夠多。紫薯沙律包含紫薯、青蘋果、西芹、粟米，紫薯外面微黏，其實內裏係一粒粒比較硬，似薯仔粒，無咩調味，所以想食微甜又想健康嘅人。另外，加$10可揀一支果汁，試一試番石榴味嘅芭樂，但味道一般，番石榴味較淡。