2020-09-23
Moo Moo

觀塘工廈手工漢堡包 即叫即做件件爆餡



Moo Moo 觀塘手工漢堡包 即叫即做 件件爆餡【按圖睇片】
{"popup_fix":"false"}

觀塘向來隱藏唔少有質素嘅美食,要搵平價漢堡包唔容易,當連鎖快餐店一個純醫吓肚嘅漢堡包都賣到幾十蚊時,就會發現其實身邊仲有好多選擇,呢間漢堡包店賣五、六十蚊,但以手工漢堡包製作,用料充足,味道方面亦有質素。

鴻圖中心呢間以漢堡包作主打嘅小店,餐廳有幾分似酒吧,有戶外吧枱、室內高腳座椅、food court雅座任揀,可以坐得舒適。連鎖快餐店嘅漢堡包無保證是常識吧,但平時見到手工漢堡包賣到成百蚊個,往往亦會令人卻步,而五、六十蚊就可以接受。呢間小店嘅漢堡包即叫即做,等候時間可能會長少少,比起連鎖店較用心製作。不過,眼見店面雖小,但廚房同樓面都有四、五個人,人手都幾充足,所以基本上等一陣就會有。

小編本來想試吓鹹蛋黃雞堡,點知已售罄,唯有試另一款Burger — $62嘅魚FULL之堡,內餡包含炸魚柳、芝士、芥末醬、蕃茄、生菜。漢堡包出爐時,表皮光滑,傳嚟陣陣牛油香,似乎烤焗時搽上一層薄牛油喺表面,每個麵包都係外脆內軟,麵包厚身而鬆軟。魚FULL之堡簡單嚟講即係魚柳包,但比連鎖店嘅魚柳包高質得多,魚柳外皮呈金黃色,炸得香脆,魚肉厚身、滑嫩,比坊間係大塊啲,結合爽脆嘅生菜、鮮甜嘅蕃茄、邪惡嘅芝士,加上些微芥末醬,材料份量配搭得宜,鹹香味中夾雜鮮甜味。

而$60嘅經典之選同樣有外脆內軟嘅牛油烤烘麵包,內餡有新鮮手打優質美國穀飼牛肉,配搭美國車打芝士、新鮮生菜同蕃茄,加上秘製Moo Moo汁,亦令人垂涎。手打牛肉壓製出嚟貿感厚實,有牛味,充滿肉汁,入口Juicy,似漢堡扒,而漢堡包內似乎仲有些微炒香洋蔥粒嘅微甜感,車打芝士鹹香味重,生菜蕃茄可中和少少膩感,加上自家製洋蔥汁更顯香口,整體唔會太乾。

至於其中一款小食就係$40/3隻嘅泰檸雞鎚,表面一層薄薄炸粉,炸得香脆,雞肉都保持到肉汁,基本上檸味唔太重,反而千島醬好配合炸雞鎚,入口有些微辛辣味,似連鎖店嘅脆香雞翼,但肉質當然好啲。而特飲每杯$28,有唔同味道可擇,士多啤梨味偏甜,入口清爽,似士多啤梨梳打,可解膩。

e.a.tips
出面座位偏熱,建議坐入面food court雅座,比較闊落同有冷氣,拍拖搵食都係兩個人坐得舒服啲好。

交通﹕近港鐵牛頭角站B6出口,沿隧道或天橋步行過去約5至10mins。

MOO MOO

地址﹕ 觀塘巧明街94-96號鴻圖中心地下1A號舖
營業時間﹕ 星期一至六11:00 – 22:00星期日12:00 – 22:00
電話﹕ 9496 8213
官網﹕ facebook.com/moomooburger/
地址﹕ 觀塘巧明街94-96號鴻圖中心地下1A號舖
營業時間﹕ 星期一至六11:00 – 22:00星期日12:00 – 22:00
電話﹕ 9496 8213
官網﹕ facebook.com/moomooburger/

Please Like & Follow & Subscribe /
歡迎讚好、追蹤、訂閱