2020-10-22
Bi’Di cafe

小資女三層架下午茶 觀塘全新粉紅系Cafe歎櫻花茶兼打卡



Bi’Di cafe
{"popup_fix":"false"}

現時,愈來愈多香港女仔都學貴婦一樣去酒店歎High Tea,但一個酒店嘅英式三層架下午茶往往$200至$300起跳,只能間中食吓,做一個拜金女先可以經常歎酒店下午茶,如果你自己做唔起拜金女,但又唔想委屈做便利貼女孩,只能做一個小資女孩,想多啲食吓下午茶享受生活,可以挑選啲價錢比較相宜嘅英式下午茶。最近觀塘工業區有一間滿滿少女感嘅全新Cafe,開業僅一個月,目前仍然試業中,有一個價錢親民嘅英式下午茶,仲有限定花茶,而且係一間同路人嘅店,一於同閨蜜去打卡啦!

呢間全新嘅少女Cafe室內環境幾Relax,有偌大窗戶採光,以粉紅色為主調,粉紅系咖啡店往往都受歡迎,甫踏入門口已經見到一個特長韆鞦架,店員稱係一個幾受歡迎嘅打卡位。室內梳化、座椅、霓虹燈都以粉紅色設計,配合眾多同樣以粉紅色為主嘅道具裝飾,各位粉紅迷絕對可以瘋狂打卡。

每Set三層架下午茶都有花茶一壺,可以揀玫瑰花茶苿莉花茶桂圓紅棗杞子茶,甚至期間限定嘅日式櫻花茶,略嫌兩個人只得一壺,需兩份飲。店員提醒櫻花茶會比上述三款花茶淡,不過問一問店員得知全部花茶都係用茶葉,而唔係茶包,茶味方面應該比較有保證,所以日式櫻花茶可以一試。第一泡櫻花茶色澤甚深,焗一焗茶味會較香,味道清新,茶味唔算淡,唔會有俗氣感覺,亦係解渴嘅茶品;櫻花茶嘅第二泡顏色唔會一下子變得極淺色至無色,只係由深茶色變成淺茶色,顏色似鐵觀音或香片,大概使用茶葉都係比較有誠意。

Cafe推出嘅英式三層下午茶有6款鹹點同4款甜品,數量唔算多,但全部二人份量亦合理,唯獨欠缺英式下午茶最重要嘅鬆餅。以牛角酥朱古力酥取替鬆餅,兩舊都有層次,入口酥脆,啖啖酥香感,麵包軟熟;脆炸蝦卷無咩蝦味,味道稍淡,對比牛角酥無咁香脆;而吞拿魚蛋沙律多士煙三文魚沙律菜法包亦份量充足,吞拿魚混入蛋沙律內,兩者都並非只得少少餡料同細細塊煙三文魚;香草蕃茄冷扁麵係少數略有飽肚嘅款式,略嫌唔夠蕃茄味,入口比較淡。

至於甜品就有經常都有嘅一口Macaron,一啖就食晒,味道有兩款,杏仁同抹茶味,相比平時嘅Raspberry口味,甜度無咁重;日本泡芙為朱古力口味,比平時忌廉口味係比較特別;另有特色Mousse Cake兩件,每位都有唔同款式,記者試嘅係莓果口味同咖啡口味,前者以粉紅色豬仔設計,後者以大大粒栗子設計,形狀非常特別,而甜度適中,唔會過於甜膩。食完甜品,仲有一小碟生果拼盤,內有士多啤梨粒同藍莓粒,可以Refresh一下。

E.A.Tips﹕

(1)三層架下午茶供應時間為15:00至17:30,兩個人$288,不過一壺花茶需要兩份飲,可Refill一次。

(2)上IG打卡Tag返餐廳,有95折優惠,人均約$136。

(3)新張期間,會免收加一服務費。

(4)室內座位唔多,記得先從Whatsapp號碼或IG Book位,確保有座位。

(5)有朋友生日或慶祝拍拖紀念日可預先講聲,據悉生日可提字等。

Bi’Di Cafe

創業街36號華基中心1804室
星期一至五 11:30 – 17:30,星期六可預約,星期日休息
3188 5453(11:30 – 17:30)/ Whatsapp預約號碼﹕5904 5405

Please Like & Follow & Subscribe /
歡迎讚好、追蹤、訂閱