2020-09-23

中日合璧點心玩味十足 小火車送到面前



    Mr E同Miss A突然想食點心,兩個人行行吓發現呢間匿喺啲棚架下面,見到下面無位坐,以為係外賣點心舖,點知原來樓上係堂食。

    裝修設計全部以日式風格為主,連茶都係俾綠茶,唔係平時中式嘅濃茶,而呢隻綠茶又幾好飲。

    個老闆好似幾識諗gimmick嘢,送點心係用火車車軌,估計係參考日式風格嘅,同上次去食sushiro一樣咁款。不過每次一到就會叫枱號拎點心,啲聲略嫌有少少大聲。

    金魚鮮蝦餃
    齋睇差啲唔記得自己叫過,外表係金魚造型,入面係蝦餃嚟,都算有料,蝦肉都爽嘅,整條金魚嘅皮厚咗少少,不過好有gimmick,可以打卡,拍拖食都唔失禮 。

    流心鵪鶉蛋燒賣
    開頭以為隻蛋係平時酒樓咁放燒賣上面,隻蛋放咗入面,啲蛋汁喺燒賣入面呈流心狀,好似食egg benedict咁,流心蛋汁同燒賣混合,好滑好滋味。

    爽彈鮮蝦腸
    腸粉皮可以俾合格嘅,餡料會俾高啲分,因為佢真係好唔吝嗇咁放蝦肉,夾開一半之後舊舊都仲有成舊蝦肉,而且蝦肉唔係梅嘅,幾爽口。

    薑汁雞包仔
    雞包仔落咗薑汁,入口好重薑味,幾新鮮,餡料充足。

    四寶滑雞札
    值得一讚係隻雞札入面有火腿+魚肚+冬菇+雞髀肉,已經好久無食過雞札入面真係有火腿同魚肚啦!

    迷你版咖哩魷魚
    質素尚可,迷你版份量都唔算少,入味少少會更好。

    荷葉花菇滑雞籠仔飯
    飽肚之選,不過入味少少會好啲

    流沙煎堆仔
    煎堆入面係流心狀態,食完其他點心再食,個餡都未凝固,入口外面香脆,內裏軟心。

    灌湯餃
    專登叫呢個嘅,睇吓係湯灌餃定灌湯餃,起碼佢知道係一隻上,湯係放餃入面,雖然加咗上湯,但無上湯反而會更好。

    爆趣QQ紫薯包
    呢味好特別好得意,開頭睇到以為自己無叫到,外表係冬菇造型,搣開佢先知原來係紫薯包,個包啲皮表面似平時麵包舖啲麵包上面層皮,入口幾香!入面都係普通酒樓包咁,不過內餡係紫心蕃薯狀,蕃薯蓉幾綿密,入口只係輕輕有甜味。

    上點心上得好快,唔怕等得耐會餓,有好有唔好,鍾意相機食先就可以一次過影wide shot,但有機會有啲會攤凍,所以建議點心最好都係趁熱即食。

    價錢叫咗超過10碟有多,兩個人都係200鬆啲,真係幾抵食!

    壹籠籠點心
    地址﹕牛頭角馬蹄徑1號寶恩大廈地下7號舖
    營業時間﹕07:00 – 02:30
    電話﹕2652 0238

    Please Like & Follow & Subscribe /
    歡迎讚好、追蹤、訂閱