Parc古道具公園
Cafe 咖啡店,  兩個人醫吓肚,  和你Taste

Vintage感爆燈! 觀塘最美古董咖啡店法式風情



觀塘工廈向來臥虎藏龍,不時會出現特別嘅食店,有一間法式古董咖啡店隱藏工廈內,既係婚紗拍攝場地,亦係一間寧靜嘅咖啡店,唔計食物質素,裝潢設計方面似足復古影樓,滿滿Antique,的確無得輸!

Parc古道具公園位處觀塘,公園佈滿嘅並非花草樹木,而係古董陳設,據悉古道具意指古董,室內的確收藏眾多法國古董,同時亦提供輕食同甜品。Parc係法文,意指Park公園,小型咖啡店開業3年,室內傢俬、家品都滿滿歷史痕跡,Vintage感重,身處種種法國古董範圍內,悠閒空間內歎返杯嘢Chill吓幾疏乎呢!不過,呢個法式下午茶絕對係可以飲吓嘢,但唔係食吓嘢。

甫踏入門口,已經可以清晰見到一件又一件古舊傢俬、家品,各類陳設都充滿古典風格,可以研究一下。當中左面有一個嚴禁進入嘅位置,有古董婚紛、飾物,甚至小物擺設,法國傢俬唔會太巨型,以精緻為主,擺放一室後,法式風情表露無遺。咖啡店內其他地方都可以打卡,古董相機、逐漸消音嘅古舊鋼琴、法式餐枱同櫈,甚至乾花小物,都好啱拍拖去打卡,甚至少女兩個人Tea一Tea或同三五知己Gathering。

話明咖啡店,飲食必然係重點,女孩子對Afternoon Tea通常都無乜抵抗力,網絡評價最高嘅甜品係狀似修女嘅法國甜品修女泡芙,仲有幾款法式下午茶Tea Set。

Savory Crepe Brunch Set $158 for 1,包含當日指定餐湯、甜點蛋糕一份、飲品一杯,而蕃茄芝士流心蛋法式鹹薄餅配沙律菜芝士風乾火腿法式鹹薄餅煙燻鮭魚特製乳酪醬法式鹹薄餅則三揀一,加$30可要冰滴或手沖咖啡。餐湯為南瓜粟米湯,味道濃郁,幾Creamy,但飲落似罐頭湯;沙律菜配茄汁焗豆只係微量生菜、青瓜,焗豆上枱已為涼食;中間係芝士風乾火腿法式鹹薄餅,Crepe同中環嗰間專門店比一定無得比,鵝黃色調嘅Crepe只係似普通家庭式製出嚟嘅感覺,薄餅邊位微脆,但有啲乾,呢款鹹味法式薄餅parma ham略細,無乜芝士味,呢個配搭其實唔太適合。

至於甜品,小編完全滿頭問號,唔知係不幸定俾錯,睇見唔少網民同樣Tea Set嘅甜品係真蛋糕類別,又朱古力蛋糕,又芝士蛋糕,但自己嘅Tea Set見到嘅竟然只係兩塊迷你朱古力曲奇、兩件超超超超超超超超迷你牛油雞蛋糕,同四粒藍莓,絕對係理想與現實分別,說好的甜品呢?

延伸閱讀﹕中環人氣法式薄餅 鹹甜任揀口味正宗

至於甜味法式薄餅就試咗一份期間限定Sakura Crepe Set $98,賣相一般。Crepe的確有幾分煙韌感,同樣微脆,Crepe本身略油。配搭雲呢嗱雪糕、鹽漬櫻花、蜜糖,通通加入法式薄餅內,蛋香味唔夠濃,配料唔多,甜味基本單靠雪糕,其實唔太突出。反而後俾我哋嘅古董瓷碟花紋精細,驟眼睇幾特別。

飲品反而比食物更突出,部份味道唔錯,部份可以打卡,設計幾有少女心。當中,Pink Rose Lemonade 粉紅玫瑰檸檬果汁 $48 係最啱打卡嘅飲品,其實另外有一杯Marine Blue Lemonade 南法海風檸檬果汁,但店員稱材料唔夠,只能做一杯。無論粉藍色定粉紅色,雖然只係普通材料製,都係一杯適合打卡嘅飲品,係最上鏡嘅飲品!杯緣灑滿砂糖,表面有微量玫瑰花瓣、藍莓、冰粒等,但無乜玫瑰花香味,入口比平時飲嘅Lemonade偏甜,檸檬酸味稍輕,但都解渴。

至於Kyoto Matcha Milk with Red Beans 京都字治紅豆抹茶 $50,採用京都老舖辻利抹茶,入口唔太甜,上層係抹茶,中層係牛奶,底層係紅豆,會逐漸睇到抹茶向下沉,漸層感超靚!抹茶粉沖出嘅抹茶味道香濃,唔苦澀,牛奶帶甜味,而紅豆咬落似紅豆莎嘅紅豆,整體甜度恰好,唔會過甜。

French Press 法式濾壓咖啡 $55就俾客人可以自己擠壓咖啡,過程由自己控制,等待3mins就會聞到咖啡香味,可以優雅地歎咖啡,入口醇香,些微苦味、甘香味夾雜咖啡豆烘焙味,仲有微量咖啡渣,幾提神。一杯相對普通嘅Chocolate Milk 朱古力奶 $48,朱古力味好濃郁,牛奶順滑,最簡單反而有驚喜。

Denim Coffee係一杯藍咖啡 +$30,以玻璃杯盛載,咖啡底部會逐漸由咖啡色變成湖水藍色,超療癒!咖啡容易入口,唔太苦澀,咖啡有回甘味,底部有微甜味,有別於一般咖啡。

延伸閱讀﹕小資女三層架下午茶 觀塘全新粉紅系Cafe歎櫻花茶兼打卡

E.A.Tips﹕

(1)以咖啡店食物質素嚟講,建議只叫飲品,唔建議叫嘢食。

(2)先到櫃檯Order同俾錢,食物同飲品會隨後上枱。

(3)古董婚紗可供租借,場地亦可作法式婚禮拍攝之用,商業拍攝$500一個鐘。

Parc古道具公園

觀塘鴻圖道60號鴻福工廠大廈10樓B2號舖
星期一全日休息;星期二至日 12:00 – 18:00
5544 0534

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!