2020-09-23
Non Kitchen

觀塘工廈隱世西餐廳 歎高質炭火羊扒/牛小排



Miss A有朋友介紹嚟呢間唔起眼嘅餐廳,隱藏喺工廈之內,查一查先知係由五星級酒店大廚主理,用餐限時90mins,其實都好夠時間,反正Mr E都突然想鋸扒食餐好嘅,兩個人要行樓梯上一層,入到去一望面積幾大,但所有嘢一目了然,叫咗兩個dinner sets,超適合拍拖當西餐廳撐枱腳!

麵包同餅乾條蘸一蘸牛油超好食,餅乾條比較硬身,麵包就軟身好多,但表皮烘過都有啲輕脆,薄薄搽一層牛油好香,呢隻牛油真係又香又滑。

牛油果海蝦沙律
前菜沙律有呢款,牛油果同蝦肉混合,本來以為只得表面兩隻蝦,最估唔到係牛油果入面仲有超多蝦肉粒,蝦肉爽口彈牙,牛油果好軟綿綿,啖啖入口層次豐富,好fresh。

蕃茄紅湯
當日就供應呢款湯,蕃茄味好濃郁,入面材料都好多,好少見到咁多湯料嘅西湯。

炭燒澳洲羊扒 $338
好少見到西餐有羊扒,所以叫咗呢個,用炭燒方式煮,特別香口,好難得係羊扒無咩羶味,唔知係咪燒完無咁啲,羊扒肉質比較軟嫩,食落有啲胡椒香味,仲有啲油脂香,但有少少筋位,幾有嚼勁。

炭燒美國牛小排 $378
牛小排價錢比較貴,但比普通扒更惹味,肉質明顯係軟腍得多,無咩筋位,入口即融咁,亦無咩油脂,加上炭燒方式煮,特別香口,食得出塊扒唔係平嘢嚟,好足料,而且入口有啖啖胡椒香。

鮮果乳酪
食完咁濃味嘅扒類,成個dinner set最後食埋呢個甜品就好perfect,乳酪好清甜,唔係超甜膩嗰種,加上底下有好多生果粒,有奇異果、藍莓、紅莓、火龍果、芒果,入口好清新。

Blood Mary $48/2
其中一杯叫咗特飲,因為跟dinner set有半價優惠!叫咗呢杯blood mary,入面有raspberry、strawberry、cranberry混合,好多莓果味,好清新,影相好靚,但就比較甜,嗜甜、打卡之人必選。

值得一提係可以入去房打枱波,問過侍應話係可以用餐免費玩嘅,都幾得意吖,去康文署都要俾幾十蚊玩,而家食飯就有得玩陣。

Non Kitchen
地址﹕觀塘鴻圖道12精棉工業大廈1樓
營業時間﹕星期一至四 12:00 – 15:00、18:00 – 22:00;星期五 12:00 – 15:00、18:00 – 23:00;星期六 18:00 – 23:00;星期日全日休息;公眾假期 18:00 – 23:00;公眾假期前夕 12:00 – 15:00、18:00 – 23:00
電話﹕2783 0313

Please Like & Follow & Subscribe /
歡迎讚好、追蹤、訂閱