2020-08-04
二少廚房(外賣)

觀塘工廈Food Court買外賣 歎滋補燉雞湯+手撕雞秘製醬拌麵



觀塘工業區有一個Food Court有各式美食,小編被介紹下去試咗呢間燉湯、手撕雞專門店。早排捱完套《地產仔》,最初空耳聽錯呢間係鄧少廚房。由於林鄭唔俾堂食,唯有叫外賣。

愛琴坊Food Court位處觀塘工業區,靠近牛頭角,貪佢尚算平靚正,Food Court環境本來幾好,有充足空間,但目前只能叫外賣。二少廚房據悉本來係賣甜品,現時就係一間賣健康燉湯、手撕雞、餃子嘅食店,肺炎期間食得健康啲都好嘅,$70有手撕雞拼燉湯餐,幾抵食。

燉湯有4款,包括蟲草花雞湯、花膠燉雞湯、蓮藕雪梨雞湯、蓮藕蜜棗排骨湯,每款+$13有原盅上,由於售罄問題,只有一款湯可擇。蟲草花雞湯可益腎陽,補肺陰,止血化痰,健脾益胃,湯料充足,有大量蟲草花,仲有煲得軟爛嘅雞腳、雞肉、豬肉,可以食埋。各種湯料精華滲透燉湯內,平時唔落鹽嘅小編略嫌鹽灑多少少,但雞腳等湯料令燉湯有微微膠質感,雞湯幾香,蟲草花好香,濃郁甘甜,唔算太油膩,啖啖暖笠笠,溫潤滋補。

套餐內有一款係薑蔥手撕雞配飯 $57,手撕雞份量唔少,配搭生菜、白飯或米線,雞肉有雞髀、雞胸肉,唔算韌同嚡口,雞髀肉較嫩滑,白肉始終健康啲。薑蔥油另上,蘸雞或撈飯都可以,雞肉唔蘸蔥油會略淡、略乾,蘸咗就有蔥油香味,似港式燒味嘅蔥油。另一款係招牌鹽焗手撕雞配飯 $60,份量同樣多,入口微鹹,雞肉亦算細嫩,唔油膩,味道相對唔重。

每款套餐+$8可配兩款魚湯米線或拌麵,當中酸辣魚湯米線以酸菜、腐竹配搭魚湯米線,份量充足,酸辣味稍輕,有輕微開胃感,有少量薑味,有幾分似譚仔米線。另一款有秘製醬拌麵,拌麵驟眼睇辛辣感重,但事實上麻醬、辣椒份量唔多,只係微辣感,醬汁唔算油膩,食落似有豆辦醬,配搭青瓜絲同花生碎更有層次感,醬汁同麵質比米線更好。拌麵有兩種食法,一種係手撕雞、拌麵分開,另一種食法係將手撕雞同拌麵撈勻嚟食,令手撕雞味道較濃。飲品有豆漿+$12,有豆香味,入口微甜,可解鹹味、辣味,豆漿有幼滑感,比較溫和。

e.a.tips
(1)加$12有涼粉做甜品,飯麵套餐+$13可以配原價$42燉湯。
(2)想飲燉湯要早啲去,當日19:00就無晒9成燉湯。

二少廚房

地址﹕ 觀塘巧明街94-96號鴻圖中心地下6B-6C號舖
營業時間﹕ 08:00 – 20:00
地址﹕ 觀塘巧明街94-96號鴻圖中心地下6B-6C號舖
營業時間﹕ 08:00 – 20:00

Please Like & Follow & Subscribe /
歡迎讚好、追蹤、訂閱