2020-09-21
丼瀛

觀塘工廈平民丼飯 甲羅燒蟹膏勁飽滿



    丼瀛 觀塘工廈平民丼飯 甲羅燒蟹膏勁飽滿【按圖睇片】
    {"popup_fix":"false"}

    觀塘工廈向來多隱世美食,唔少超驚喜嘅美食都隱藏喺平平無奇嘅工廈內,就好似呢間抗疫良心小店一樣,主打日式料理同丼飯,拍拖撐枱腳亦唔失禮,甚至可以加分,絕對值得兩個人去一試再試!

    適逢武漢肺炎,室內都遵守限聚令,每張枱都隔開1.5米,而且再加設膠片阻隔食客,同時會為進店客人量度體溫同每張枱提供消毒用品,每位客人仲會派發埋酒精濕紙巾,做足抗疫措施。

    以為疲症令唔少人減少出街,同時令唔少餐廳生意受影響,但以現場情況嚟睇,時間已經係過咗中午食飯時間,室內卻竟仍然坐滿人,睇嚟唔算太受影響。餐廳以爆丼為主,碗碗勁足料,滿滿日本刺身,營造爆丼效果,全場均附送味噌湯、沙律。

    每位客人都有豆腐海帶味噌湯野菜沙律同餐飲,味噌湯暖笠笠,味道唔鹹,最適合食刺身丼前暖暖胃,而沙律就淋上胡麻醬,入口略帶酸甜味,好清新,蔬菜好有爽脆感。

    其中一碗係海之幸丼 $138,刺身丼嘅醋飯同刺身份量恰好,飯粒係採用珍珠米,粒粒入口煙韌,刺身亦比出面啲日式料理丼飯更足料,唔會淨返醋飯孤令令食到最尾,唔會食到底無晒刺身。海之幸丼飯賣相一流,刺身好新鮮,一碗有原隻牡丹蝦、三文魚、三文魚籽、帶子、油甘魚,仲要每樣唔只一塊,小店對刺身份量一啲都唔孤寒,比大型店舖更慷慨。

    最值得推介嘅係松葉蟹肉甲羅燒蟹膏丼 $128!飯量同樣剛剛好,醋飯表面仲佈滿松葉蟹肉,上枱時已經將蟹肉拆出,方便食用,仲留有兩隻蟹鉗,蟹肉勁鮮甜,入口充滿蟹味。不過,重點係甲羅燒蟹膏,蟹蓋內放滿蟹膏,中間放有一粒鵪鶉蛋,只要將鵪鶉蛋嘅蛋漿倒落蟹膏內,然後攪勻就得啦!蟹膏本身極重蟹味,啖啖蟹黃味超香,蟹膏向來似足磨成蓉一樣,入口綿密,加上蛋味混入蟹膏入,令蟹膏變得更有黏稠感,蟹膏味勁香濃,以致蟹膏味夾雜鵪鶉蛋蛋黃香味。

    另外,叫多咗個特價小食南瓜味薯餅 $22,以脆炸方式將南瓜餅炸熟,南瓜本身已經磨成蓉,表皮炸得香脆,內裏依舊綿密幼滑,旁邊仲配有沙律醬,可以蘸一蘸再食,沙律酸甜味可解解脆炸嘅油膩感。

    而用嚟盛載丼飯嘅器皿亦相當別緻,高身型嘅碗,高雅得嚟不失獨特風格,同樣係可以打卡嘅小小位置。

    E.A.Tips﹕
    (1)建議食午餐,價錢比晚餐仲要平。
    (2)Openrice預訂優惠﹕即日起至7月31日,星期日至四晚市指定餐牌有7折優惠,但唔計酒水飲品;星期六日及公眾假期午市指定餐牌半價優惠,但僅限刺身、壽司及小食。另外,星期一至四晚市指定餐牌都有7折優惠

    交通﹕位置近APM,位置近地鐵觀塘站B3出口,附近有好多巴士,建議最好搭巴士。

    丼瀛

    地址﹕ 觀塘巧明街109號榮昌工業大廈5樓A室
    營業時間﹕ 星期一至五 12:00 – 15:30、18:00 – 22:30;星期六至日 12:00 – 22:30
    電話﹕ 3708 8705
    地址﹕ 觀塘巧明街109號榮昌工業大廈5樓A室
    營業時間﹕ 星期一至五 12:00 – 15:30、18:00 – 22:30;星期六至日 12:00 – 22:30
    電話﹕ 3708 8705

    Please Like & Follow & Subscribe /
    歡迎讚好、追蹤、訂閱

         

    3 thoughts on “觀塘工廈平民丼飯 甲羅燒蟹膏勁飽滿

    Comments are closed.