【3低本地遊】觀塘工廈食店間間有水準 30分鐘遊走海濱至啟德郵輪碼頭
觀塘對部份返工人士嚟講，可能係地獄區，皆因交通同人流密集，畢竟觀塘為18區當中一個大區，但其實觀塘的確有唔少值得去嘅地方，區內小店眾多，匯集工業區內，拍拖兩個人想輕鬆過一日嘅話，不妨考慮遊走觀塘工廈之間。
第一站﹕丼瀛
丼瀛係觀塘工廈內其中一間食店，以日式丼飯為主打，水準不俗，刺身份量上幾有爆丼感覺，套餐有味噌湯、沙律，而盛載丼飯嘅碗具亦幾別緻，高身碗望落有高雅感覺，風格獨特。
延伸閱讀﹕觀塘工廈平民丼飯 甲羅燒蟹膏勁飽滿
第二站﹕工廈遊
事實上，觀塘原名為官塘，不過現時好少建築物會再用官塘為名稱，如果你有細心留意，目前唔少小巴站仍然以官塘為地面標記，只不過後來因填海計劃而被官方稱為觀塘。而觀塘聚集住宅、工商廈，非常密集，而最為人熟悉嘅係APM商場、創紀之城，甚至清拆前嘅裕民坊。官塘於宋朝時曾為官方鹽場，即官富場，不過後來鹽量唔多，最終被棄置。而觀塘工廈內亦隱藏一間又一間小店，當中3座駱駝漆大廈就係其中之一，而其他工廈亦陸續有小店開業，令區內好不熱鬧。
第三站﹕想爺爺了
行完工廈，感覺口渴嘅話，可以到其中一幢工廈入面找尋一間日式茶室，適合當作下午茶。小店地方唔大，但裝潢上就可以打吓卡，皆因內有日式榻榻米設計風格，而且全部只供應茶品，一叫先會開始泡茶，坐低飲杯茶都縛疏乎呢！
延伸閱讀﹕清一色現泡茶 唔賣咖啡！ 觀塘廠遊迷你日系茶室 週末與情人榻榻米放空茗茶
第四站﹕觀塘海濱
歎完茶，可以去海邊散吓步，由工廈群步行到觀塘海濱，頓時可以鬆一口氣，海旁環境舒適，內有小草地，唔少人都會選擇觀塘海濱作拍攝婚照嘅地點。觀塘海濱有一道長廊，長度有逾千米，由順業制一直延伸到一個感官花園。
第五站﹕啟德郵輪碼頭/啟德碼頭公園
而由觀塘海濱一直向前行，更可以轉入小路，前往啟德郵輪碼頭，甚至啟德碼頭公園，可以回望韆塘海濱方向，亦可眺望對岸香港島，甚至鯉魚門，飽覽維港海景。公園內有大草地，適合野餐，而草地上又有一架飛機裝置，唔少人都會於飛機前打吓卡。
第六站﹕哈豆
折返觀塘工業區範圍，可以走上另一座工廈內，找尋另一間台式小店，食物幾有水準，係一間值得推介嘅餐廳。菜式以古早味為主，鹹酥雞、乾拌麵$68、肉燥飯$62 等都充滿台灣風味，亦可以一試滷水拼盤$22，飲品可選+$4飲豆漿紅茶或免費加支豆漿綠茶，全按個人喜好。
延伸閱讀﹕抗疫小店隱藏觀塘工廈 炮製超正宗台灣菜
