踏入5月，真香港人反警暴兼抗爭持續，但飯點都要食，必須力撐良心小店。憑香港人自身嘅衛生意識，無政府幫助下，減少武漢肺炎傳播風險，疫症終於逐漸緩和，出街嘅人數逐漸增加，飲食業似乎開始出現一個小陽春。今次為大家推介幾間主打日式料理，100蚊樓下可以埋單嘅隱藏小店，拍拖搵食一定要識揀！
【Like Facebook / MEWE 緊貼最新資訊，一個Like一個鼓勵，支持原創文章，向Content Farm說不。】
黃店（1）﹕櫻花樹下
位置﹕天水圍
位處天水圍嘅櫻花樹下，隱藏喺新北江商場內，而呢個商場C區同時有好幾間良心小店。疫症期間飲食業步入寒冬，但最神奇係呢間小店每分每秒做到無停手，堂食同Foodpanda外賣同樣一個接一個！小編Miss A同Mr E實試兩款日式鰻魚飯，不單價錢平到只係40至50蚊，而且份量充足，兩個人食夠晒飽肚，絕對高質。蒲燒鰻魚飯嘅鰻魚軟嫩之餘，鰻魚汁撈飯極惹味。而鰻魚炒飯必須大力推介，鰻魚份量雖然唔算太多，但炒飯極有鑊氣，飯粒乾爽，粒粒沾滿醬汁，大廚炮製炒飯之類肯定有保證。
黃店（2）﹕燒夜食堂
位置﹕長沙灣
呢間隱藏喺宇宙商場附近嘅燒夜食堂係一間日式料理小店，基本黃得唔太明顯，Poster同連儂牆都只係貼晒店內，門口得一小張貼紙。小店用App自助點餐，一碗拉麵價錢約60至70蚊，不過主打係小食同串燒，例如炸雞軟骨非常香口，炸粉適中，入口輕脆，而各款串燒以鹽燒方式炮製，灑上調味粉香噴噴，肉類串燒普遍入口味道較鹹，極適合佐酒，車厘茄串燒就酸甜味豐富，可解鹹味。
延伸閱讀﹕隱世良心小店 惹味串燒最啱佐酒
黃店（3）﹕芝C Sushi
位置﹕藍田
隱藏喺藍田匯景商場內嘅芝C Sushi，係區內少有嘅良心小店，主打係芝士卷物同壽司，小店面積較細，堂食位置極少，通常都係外賣，一般50蚊內可埋單。芝C卷以反卷形式炮製，用壽司飯包裹魚生同流心芝士，表面再舖上一層芝士，幾款魚生配忌廉芝士、車打芝士、水牛乳酪芝士足足三種芝士，絕對係芝士迷必食推介！不過，手卷先係小編想大力推介嘅小食，普遍坊間手卷只得最頂有餸，未食到中間已經無餡，呢間嘅手卷最大特色係食到底都係餸！
延伸閱讀﹕芝士控必食！ 藍田手卷食到底都係餸
黃店（4）﹕丼瀛
位置﹕觀塘
隱藏喺觀塘榮昌工業大廈之內嘅丼瀛，抗疫期間實試發覺衛生措施極充足，食飯絕對可以食得安心！小店主打爆丼飯，刺身飯由最平50蚊內到100零蚊都有選擇，碗碗日本刺身勁爆滿，全場套餐仲送暖笠笠豆腐海帶味噌湯、清新爽脆嘅野菜沙律同餐飲，特別建議午市去食，價錢更相宜，外賣自取50蚊內就有。海之幸丼刺身份量充足，件件刺身新鮮之餘亦夠厚，賣相一流。而更惹味嘅係松葉蟹肉甲羅燒蟹膏丼，佈滿松葉蟹肉，而且蟹肉已取出，唔需要自己拆蟹，蟹肉勁鮮甜兼有蟹味，甲羅燒蟹膏為重點，蟹蓋內放滿蟹膏，加上一粒鵪鶉蛋，將蛋漿倒入蟹膏內，然後攪勻，蟹膏蟹味極濃，加上蛋香味，啖啖蟹黃香，入口綿密之餘帶有黏稠感，蟹膏味夾雜鵪鶉蛋味特別濃郁可口。
延伸閱讀﹕觀塘工廈平民丼飯 甲羅燒蟹膏勁飽滿
在〈【區區有小店】4間100蚊樓下隱藏小店 歎超抵日式料理〉中有 1 則留言
留言功能已關閉。