[sp_html5video category=”2452″]
一般人去葵芳搵食，第一時間都會只諗到葵涌廣場，雖然葵廣的而且確係美食多蘿蘿，已經被KOL做到爛，但事實上一款又一款全新小食大多喺葵廣呈現，其實葵芳仲有好多好嘢食，當中一條小街道就隱藏咗唔少小店。
小店以初心食堂命名，有幾分日式風格，室內簡潔雅緻，多餘裝飾甚少，只放咗三兩張枱同黑板，黑板為餐牌，主打叻沙，由A餐至B餐基本價錢介乎46至48蚊，價錢合理，有六款餸任揀，亦可選擇油麵、米粉或兩溝變摻摻，亦有幾款特色小食同飲品，位置靠近職業訓練局青年學院。
將叻沙外賣，老闆貼心將麵條同湯底分開放，只要將湯底倒入小碗內即成。叻沙湯底呈金黃色，有微微黏稠感，好滑溜，有濃郁椰香味，雖有紅噹噹粒粒辣椒，但入口唔太辣。油麵同米粉兩樣溝埋變做摻摻，油麵爽滑，米粉柔韌，配料當中最吸引係豆卜，完全吸附濃郁叻沙湯汁，夠晒惹味。不過，呢碗好似漏咗隻溏心蛋。
至於印式煎雞略鹹，味道較濃厚，有類似胡椒味道，醃製過好入味，入口偏辛辣，雞肉煎得香口。而泰式蝦餅入口似蝦膠，煎得同樣香口，咬落幾爽滑，放湯底比煎雞更入味。
| e.a.tips （1）建議最好堂食，雖然返到去仍然暖笠笠，但堂食係熱辣辣。 （2）不過室內空間唔多，無位的話叫外賣返去會更舒服。 （3）拍拖兩個人加埋都唔使100蚊一餐，的確係幾抵食。 |
交通﹕葵涌廣場2樓沿天橋落，經葵涌運動場，轉入信芳街再轉入美芳街即達。
延伸閱讀﹕葵芳薑主題飯麵有幾薑？ 薑味飲品堅夠薑
初心食堂
| 地址﹕ | 葵芳美芳街2-14號昌鴻大廈地下9號舖 |
| 營業時間﹕ | 12:00 – 22:00 |
| 電話﹕ | 6466 1342 |
在〈葵芳隱密小街超抵叻沙店 金黃湯底濃稠可口椰香味重〉中有 6 則留言
留言功能已關閉。