2021-05-17

葵芳薑主題飯麵有幾薑? 薑味飲品堅夠薑

本地薑


葵芳搵食其實唔只去葵涌廣場,都可以試吓其他良心店嘅,呢間以薑為主題,門面都係薑黃咁黃,兩個人食唔使100蚊,想拍拖食平啲,可以試吓呢間以薑為主打嘅港式茶餐廳,睇吓到底有幾薑?

餐廳座位空間闊落,不過疫情期間人流較少,外賣較多,以飯麵為主,飲品為副,大多都加入薑為原材料。眾所周知,薑功效多多,男女老幼適宜,既可促進血液循環,改善手腳冰冷,提高消化功能,亦可以增強免疫力、殺菌,甚至祛寒治感冒、抗發炎、幫助女士改善生理痛問題。

薑湯泡飯午餐$40,可配兩款餸,揀咗鯇魚腩,但鮮雞肉俾錯豬潤,可任揀7款菜,包括菜心、芥蘭、娃娃菜、白菜、唐生菜、芫荽或芥菜,揀咗娃娃菜,份量幾多,鯇魚腩份量尚算恰好,大多係魚腩末端近魚油位置,魚肉比較滑嫩,無乜碎骨,但都會有骨。豬潤就比較嚡口,同無乜味道,似煲完湯嘅豬潤。而薑湯有薑味,不時搵到薑絲,只係薑味唔算太重,小編鍾意薑味再濃烈啲嘅感覺。

薑汁梳打+$5 以薑汁、薑粒、梳打水混合,經調味後入口酸甜,上面有檸檬,增添酸爽感,底部有超多薑粒,夏天飲幾清爽。另有改名改得幾有玩味嘅特調飲品,有女人四十、逆流大叔、黃金時代、希望之光等,以港產電影命名,本土味濃,大多以薑汁、梳打水配搭唔同口味嘅果汁。

延伸閱讀﹕葵芳隱密小街超抵叻沙店 金黃湯底濃稠可口椰香味重

延伸閱讀﹕葵芳新開張日料店抵食便當 肥美原條鰻魚CP值極高

本地薑

地址﹕ 葵芳興芳路177號葵芳廣場地下18號舖
營業時間﹕ 07:15 – 22:00
電話﹕ 9217 6226

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ Please Like & Follow & Subscribe /
歡迎讚好、追蹤、訂閱