2021-05-17

葵廣後窩心私房菜 霸氣鰻魚溝Wasabi飯新奇有創意

Star Kitchen


提到葵芳,大家最先諗到嘅通常係葵涌廣場,但事實上葵芳仲有好多嘢食嘅。隱藏葵涌廣場後面,有一間幾有創意嘅多國菜餐廳地舖,私房菜用料充足,老闆創出唔少與別不同嘅菜式,菜式新奇有諗頭。

室外感覺只係一間街坊餐廳,室內有種異國感,有幾分歐陸色彩,磚牆設計有特色,彩色玻璃小吊燈更吸睛。當中,最特別莫過於全人手書寫嘅餐牌,字體端正,目前比較少見手寫餐牌。

兩款Dinner Sets既有主食,亦包含前菜、餐湯、飲品同甜品,野菜沙律入口新鮮爽脆,胡麻醬汁酸甜味豐,添加果醋後特別開胃,粟米粒令沙律增添微甜感。而餐湯不時轉換,蕃茄忌廉湯夠creamy,蕃茄味好濃郁,入口有些微蕃茄蓉,忌廉湯質感滑溜,蕃茄味好鮮甜。

食主菜前不妨另加$38試試法式鮮蝦Cocktails餐前小食,以Cocktails汁配搭鮮蝦同野菜,呢種製法平時會喺酒吧見到,一般係放置玻璃杯內嘅小食。蝦肉爽口彈牙,配搭自家製Cocktail醬汁,入口酸酸甜甜,酒味唔重,比普通野菜沙律更開胃,老闆提點擠入檸檬汁可令整體更清爽,檸檬汁的確令鮮蝦沙律提鮮,入口更開胃醒神。

跟餐+$22可轉配星空或夢幻特飲,以蝶豆花炮製,基本以藍紫色為主,粉紅佳人就包含士多啤梨乳酸梳打蝶豆花,入口酸甜解渴,而碧綠如茵就包含青蘋果青檸梳打蝶豆花,入口清爽微酸,蝶豆花釋出天然物令顏色變藍,重點係外表亮麗,充滿少女心,打卡一流!

主菜有明太子煙三文魚意粉 $118,菜式簡單,但採用日本名產明太子,以阿拉斯加鱈魚子加工醃製,再加入辣椒粉同香料辟腥,入口微辣,帶有香味。明太子幼細而粒粒分明,略帶微辣感,咬入口仲有微鹹嘅汁液,用嚟撈意粉一流,令醬汁味道更香濃,配搭煙三文魚更惹味。而意粉喺影完相後仍然彈牙,無變得黏稠似糊狀,質感滑溜之餘亦掛汁,製作的確幾用心。

更值得品嚐嘅主菜係Wasabi原條鰻魚意大利飯 $158,雖然製作需時,要等候約15至20mins,不過出品係幾高質,上枱時原條鰻魚放置意大利飯上,真係幾有霸氣!蒲燒鰻魚啖啖肉,魚肉厚身,魚質肥美嫩滑,毫無碎骨,燒得好香口,醬汁份量恰好,唔會太鹹,好惹味。最特別之處係鰻魚下嘅Wasabi意大利飯,醬汁令飯粒好creamy,飯粒唔算硬,黏稠感重,但入口唔太膩,質感似燉飯,意大利飯內更混合好多菇菌,層次更豐富。

而意大利飯混入日本Wasabi,令意大利飯中有Wasabi微辣感,最難得係意大利飯有Wasabi嘅香味同清新感,但Wasabi嘅刺激感又唔會好重,無乜刺鼻嗆喉感,調校得恰到好處,估唔到Wasabi撈意大利飯可以咁夾,簡直係完美Crossover!老闆細心地喺旁邊擠有少少Wasabi,如果唔夠味可以自行再添加,不過Wasabi份量基本已經好充足,唔需要再自己另加啦。老闆提到,今次以Wasabi加入意大利飯嘅靈感來自壽司,平常大家食壽司都會蘸Wasabi,佢就靈機一觸諗到將Wasabi加入菜式內,再加上鰻魚,令大家有食壽司嘅感覺,調校味道後成功將Wasabi同意大利飯融合,至於原條鰻魚上枱,就可令食客感覺更豐富。

拍拖去食完主菜,當然要兩個人Sweet住歎埋甜品,跟餐仲有芒果布甸,另加$25可叫自家製低糖朱古力心太軟或Tiramisu,一樣即叫即製,要預等20至30mins。芒果布甸唔普通,芒果味好重,而且底層仲有好多芒果粒粒,布甸下仲有一層透明啫喱,整體好香甜,但入口唔太甜膩。老闆特別調配適合香港人食嘅低糖意式甜品,包括Tiramisu同朱古力心太軟,入口亦唔會甜膩,心太軟新鮮出爐時,上枱熱辣辣,賣相一流!將心太軟切開,會睇到入面朱古力漿呈流心狀態,質感柔滑細緻,外層輕脆醇香,內餡朱古力味極濃郁,暖笠笠之餘唔會太苦澀,但明顯比坊間甜度稍低。

小編講吓嘢
老闆兼大廚相當友善同熱情,會為客人介紹唔同特色菜式,不時更加會由廚房走出嚟同食客交流,既詢問菜式評價,亦會同食客寒暄,溝通一下,感覺好親切,似足去人哋屋企作客一樣,目前比較少小店會咁做。老闆亦會親自耐心介紹每道菜式,原來好多菜式都係老闆重新創作,即使好普通嘅材料,經佢巧手一變,都變得新奇有趣。

延伸閱讀﹕葵芳隱密小街超抵叻沙店 金黃湯底濃稠可口椰香味重

延伸閱讀﹕葵芳薑主題飯麵有幾薑? 薑味飲品堅夠薑

延伸閱讀﹕葵芳新開張日料店抵食便當 肥美原條鰻魚CP值極高

Star Kitchen

地址﹕ 葵芳禮芳街21號地舖
營業時間﹕ 11:00 – 22:00
電話﹕ 9777 3132

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ Please Like & Follow & Subscribe /
歡迎讚好、追蹤、訂閱