2021-05-17

【黃店懲罰祭】葵芳掃街另類選擇 葵涌廣場以外5間良心圈小店

葵廣以外5間黃店(初心/金鍋燒/山下見/吉壹野/本地薑)


11.26起一連4日係黃店懲罰祭,就算無懲罰祭、爆買日,都應該堅持支持同路人小店。行到葵芳,搵食只係識葵涌廣場?的確,葵涌廣場有海量式美食資訊,良心圈小店亦有好多,網絡上葵廣跟拍嘅美食推介絕對係斗量車載,再講已經係廢話。事實上,葵芳掃街唔只得葵涌廣場,葵廣背後仲有好幾間良心圈小店值得支持吓,先為大家推介5間良心圈小店,即使拍拖掃街都要有新鮮感,食厭葵廣就不妨兩個人行吓其他地方啦!

Like Facebook 緊貼最新資訊,一個Like一個鼓勵,支持原創文章,向Content Farm說不。】

(1)初心食堂

位處美芳街嘅初心食堂係性價比較高嘅選擇,裝潢簡潔,主打叻沙,每碗唔使$50,有6款餸任揀,亦可配搭油麵、米粉或兩溝變摻摻。外賣會將麵條同湯底分開放置,保證麵條返到屋企仲有充足湯汁,而叻沙湯底呈金黃色,質感濃稠,椰香味好重,表面有好多紅色辣椒,但辛辣味唔算重,容易入口。油麵比較爽滑,米粉就比較柔韌,豆卜係最吸收湯汁嘅配料。

延伸閱讀﹕葵芳隱密小街超抵叻沙店 金黃湯底濃稠可口椰香味重

(2)金鍋燒

正對初心食堂,只係幾步腳程就到達嘅金鍋燒,主打係熱辣辣串燒、雞煲、烤魚同雜錦煲,好有大排檔風味,晚餐可以揀套餐,麻辣鯇魚煲好重手,雖然等候時間較長,但30mins後都仲暖笠笠,份量充足,兩個人食都足夠。麻辣味亦唔太重,輕微麻辣度輕易入口,而鯇魚亦軟嫩多肉,只係部份位置多骨。配料甚多,紅椒、菜、蔥、乾蔥、腐竹、豆腐、辣椒等,當中乾蔥又甜又爽脆。

延伸閱讀﹕葵芳大排檔金鍋燒 主打熱辣辣串燒/雜錦煲

(3)吉壹野

比較接近葵涌廣場嘅係呢間小食店,以吉壹野命名非常簡單易明,以街頭小食為主,價錢偏低,小店由幾個年輕人開設,幾位驟眼睇都係年紀尚輕,絕對值得支持吓!

(4)本地薑

5間當中比較偏遠嘅本地薑,係一間以薑為主要原材料嘅茶餐廳,以飯麵為主,食物同飲品大多都會加入薑,反正薑功效多多,對身體有益,多食都無壞。當中,薑湯泡飯午餐價錢只係$40,既可配搭兩款餸,亦可配上一款菜,份量幾多,屬最食得飽肚嘅一間。鯇魚腩份量同選材都唔錯,多數係魚腩末端近魚油位置,魚肉滑嫩,無乜碎骨,只得少量骨,不過豬潤較嚡口同無乜味道,似煲完湯嘅豬潤。薑湯薑味重,搵到唔少薑絲,不過薑味再濃啲會更好。飲品都係薑汁梳打,雖然只係混合薑汁、薑粒、梳打水,入口酸甜,有檸檬同好多薑粒,夏天飲幾清爽。

延伸閱讀﹕葵芳薑主題飯麵有幾薑? 薑味飲品堅夠薑

(5)山下見日本料理

山下見日本料理係5間當中最新嘅一間,開業不久,屬葵芳新店,主打日式料理、便當、卷物、刺身、壽司、丼飯,裝潢簡潔,有幾分似日本街頭食店,質素比大集團旗下食店明顯更高。原條鰻魚飯便當價錢合理,有前菜、主食、配菜、白飯,為一人便當,原條鰻魚放入便當比較少見,鰻魚肥美之餘,肉質軟嫩,表皮亦有焦香感,CP值好高!

延伸閱讀﹕葵芳新開張日料店抵食便當 肥美原條鰻魚CP值極高

E.A.Tips﹕

(1)除咗有一間靠近葵芳廣場,大部份小店可由葵涌廣場2樓沿天橋直行到底,會見到葵芳運動場,右邊幾條小街隱藏好幾間良心圈小店。

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ Please Like & Follow & Subscribe /
歡迎讚好、追蹤、訂閱