2020-09-23
葵芳驚喜魷魚包飯+Souffle Pancake

葵芳驚喜魷魚包飯 歎埋甜品Souffle Pancake



平時去親葵芳,Mr E同Miss A兩個人多數都去葵廣掃街算,今次喺openrice search新餐廳時發現呢間新開嘅cafe,喺新都會廣場搵咗陣先搵到,門面Ocio四個字潦草嚟,唔太容易睇清楚,裝修幾企理,即管試一試。

叫咗個比較穩陣嘅All Day Breakfast同埋超驚喜嘅魷魚飯,最後叫多個抵食又甜而不膩嘅甜品,仲有碗好Creamy嘅南瓜湯,唔太大碗,食之前飲少少暖胃唔錯,南瓜湯唔單止好creamy,而且仲有南瓜蓉,甚至南瓜絲,證明幾足料。

Ocio精選全日早餐 $98
今次呢份All Day Breakfast裏面有炒蛋、蕃茄、雞胸肉、煙三文魚、薯條、沙律菜、焗豆、腸,當然仲有呢度好多人叫嘅窩夫啦,以價錢同份量嚟睇,其實份量都唔少,可以食得飽肚。焗豆沙律菜煙三文魚蕃茄腸炒蛋呢啲基本嘢,最估唔到有雞胸肉,而且唔算細塊,而雞胸都煎得唔乾身,都幾軟嫩同香口,薯條條條都脆卜卜,份量恰好。

值得推介係窩夫,見到隔離枱兩邊都單獨叫窩夫,果然真係好出色吓!窩夫有厚度,大概一隻手指頭咁厚,表面鬆脆,內裏似足麵包咁軟熟,淋上糖漿後,窩夫帶少少甜味更滋味。

龍蝦汁原隻魷魚意大利飯 $148
以魷魚片包裹住龍蝦汁意大利飯,上面舖上啲木魚碎嗰啲配料作點綴,仲淋咗醬油,Miss A覺得有啲鹹。不過魷魚同飯就超驚喜,魷魚煎一煎好香口,爽爽哋,咬落軟身唔難嘴嚼,意大利飯每粒都充份被龍蝦汁包裹。飯粒唔硬,粒粒分明,好怕啲意大利飯好硬身,龍蝦汁唔鹹,送飯一流!

蜜瓜雪山熱香餅 $98
最後食埋呢個Souffle Pancake,上面係一個Souffle Pancake,下面係半個蜜瓜,蜜瓜中間又有啫喱,個氣勢用嚟打卡一流!

將Souffle Pancake切開,啲Cream會流落下面嘅啫喱同蜜瓜度,個畫面超療癒!Souffle Pancake係原味嚟,質感鬆軟,不過空氣感重啲會更好,啫喱被cream cover咗甜甜哋,蜜瓜好清甜,唔係甜到漏嗰種水果。食完甜品再食返個蜜瓜清清哋個胃好舒服,蜜瓜肉挖極都仲有,最後挖到手攰先停!

仲有叫咗杯Peppermint Tea同杯Peach Tea。前者薄荷味好重,兩杯飲到底都仲有味。熱飲比較好,食完嘢飲熱嘅會舒服啲。

拍拖去食都好適合,環境幾舒服,可以慢食。

Ocio
地址﹕葵芳興芳路223號新都會廣場2樓270-271號舖
電話﹕6293 9281

Please Like & Follow & Subscribe /
歡迎讚好、追蹤、訂閱

     

One thought on “葵芳驚喜魷魚包飯 歎埋甜品Souffle Pancake

Comments are closed.