2020-08-04
歌連臣角

歌連臣角夏日懶人路線 直闖舊軍事建築探險打卡



夏天來臨,再行山肯定爆汗,最好就係選擇去沙灘玩水,如果真係想行吓山,就可選擇部份慢遊路線,去戶外行吓唔使爆汗嘅地方都有好多,小西灣歌連臣角係其中之一,當中被山友稱為大電視嘅探射燈碉堡係熱門打卡位,而尋找英軍二戰發電站更加有探險感,可以作為夏日懶人路線。

歌連臣角探射燈碉堡狀似寬屏幕大電視,向來係唔少人嘅打卡熱點,通常會順道行埋砵甸乍山,不過夏日炎炎都係咪搞咁多嘢,想去戶外行吓又唔想爆汗,呢條懶人路線就最適合你!

由小西灣海濱花園起步,途經龍躍徑可直上歌連臣角道,沿隱密山徑可找尋舊軍事建築。沿天藍色欄杆嘅長樓梯可直上歌連臣角道,途中會經一個又一個休憩處,其後都係斜路。再沿歌連臣角懲教所指示牌向左行就得,小路向下走,到達海邊小徑時,直去就係歌連臣角懲教所盡頭位置,右邊可以上去英軍二戰發電站,而左邊就可以落去有二戰探射燈碉堡之稱嘅歌連臣角炮台遺址。

由於同時有一群肯定沿路去大電視打卡嘅小粉紅,為咗避開爭位拍攝,小編決定先上發電站探險。沿右邊小路可以直上英軍二戰發電站,小路為山路,特別需要小心安全,小路貌似草叢,斷枝、樹藤不時撲出欄路,不過都可以遮風擋雨。直上到頂,會見到一個已廢棄嘅英軍二戰發電站,荒廢嘅發電設施充滿頹廢風,只要敢行上去就可影靚相。

從沿路折返,可以返去小斜路,過對面方向可直達歌連臣角炮台遺址,已有山友喺欄杆綁上絲帶作記認,跨過欄杆即可沿路落去碉堡遺跡位置。只需沿小斜路同長長窄樓梯直落,就會見到海邊有黑角頭碉堡,從碉堡內可直視大海,恍惚置於寬屏幕大電視,位置係唔少山友必到嘅打卡位。景觀開揚,既可遠望將軍澳、清水灣半島,亦可望海蝕洞,不過經颱風山竹吹襲,碉堡遺跡亦有損毀,瓦礫散落,場景如同頹垣敗瓦,會見到成大塊石屎堵塞碉堡遺跡門口,相信係從碉堡遺跡頂部倒塌落嚟。

碉堡遺跡由1937年興建後一直屹立崖邊,本身係英軍探射燈台,呈圓拱狀,係二戰時嘅軍事建築,從碉堡內會發現似足一個寬屏幕大電視,加上正對海景,視野極遼闊,環境一流。如今被颱風損毀後有欠完美,超闊銀幕一夜之間變成16比9家用電視,要留吓倩影就要趁下一個颱風破壞前拍攝啦!

E.A.路線﹕小西灣海濱花園➡️龍躍徑➡️英軍二戰發電站➡️黑角頭碉堡➡️原路回程,全長僅一至兩公里。

交通﹕由柴灣市中心嘅柴灣站公共小巴總站乘搭小巴44M或47M,到南灣半島落車,其實更多巴士可直達南灣半島旁交通交匯處,乘搭巴士就唔需要轉小巴。

e.a.tips
(1)夏天氣溫上升,記得要帶備充足水,要不斷補水,唔好中暑先嚟飲水,咁就可以避免喺戶外中暑。
(2)喺大自然環境內,唔好遺留任何垃圾,記得要將垃圾帶走。
(3)部份路段山路崎嶇不平,記得要小心安全,量力而為。
(4)碉堡遺跡未知結構上有否損毀,若進入碉堡要特別注意安全。
(5)呢條夏日懶人路線需時唔算長,基本上30mins可上到去。
(6)若連行都唔想行上去,可以直接乘搭18M小巴,由柴灣站公共小巴總站直去歌連臣角懲教所落車,行回頭路3至5mins可到達黑角頭碉堡入口,不過每日只得3至5班車由柴灣站開出,回程同樣只得3至5班車,需要抓緊時間。

歌連臣角炮台遺址

地址﹕石澳歌連臣角道123號
開放時間﹕24hours

Please Like & Follow & Subscribe /
歡迎讚好、追蹤、訂閱