天氣愈來愈熱，去戶外最佳消暑方法係一把芭蕉扇或一杯冰凍飲品。全港茶飲店開得成行成市，到底點可以突圍而出？柴灣呢間街坊台式茶飲店由4位年輕人主理，茶底選擇多多，可滿足唔同口味之人。經典珍珠奶茶沖茶採用口嘅係明治奶，用料有誠意，曾一度大排長龍，今次亦為夏天推出期間限定，一款係桃之夭夭，一款係芝芝西瓜，夏天最啱拍拖兩個人一人一杯。
顧名思義，一款為香桃口味，另一款則為西瓜口味，一杯芝芝西瓜 $38 頂頭奶蓋有三款口味任揀，有原味、芝士、班蘭，有些微芝士味鹹香味，奶泡打得好滑，好creamy，略略有輕微鹽味，味道唔太重。芝芝西瓜更適合喺夏天飲用，西瓜清爽，入口透心涼，水果亦較健康，最頂係鹹香味嘅奶蓋，中間係西瓜沙冰，沉底嘅係粒粒西瓜果肉，層次豐富，爽過飲汽水，驚喜又解暑！
飲埋招牌之一嘅黑糖Oreo珍珠鮮奶 $35，沖茶速度都幾快，不消5分鐘就有，係幾有效率。黑糖掛杯，虎紋一般嘅紋理幾靚，唔會太快流晒落底，Oreo碎放喺鮮奶表面，好有新鮮感，而鮮奶奶香味濃，唔會太甜膩，最好先用飲管將整杯攪勻，避免一啖過甜。搖勻之後，黑糖味的確好香，奶味依然好重，入口滑溜，有香醇感，珍珠入口煙韌有彈性，唔會太黐牙，配合Oreo餅碎更有層次感，飲晒成杯會好飽肚。
呢間茶飲店仲有一款黃到金嘅招牌貨，叫做金蕉榮光歸香港 $38，不過小編接受唔到香蕉榨果汁，如果有讀者試過，可以Facebook留言話俾我哋知味道如何。
延伸閱讀﹕小西灣食店清泉 軟滑蛋包飯暗藏芝士拉絲
| e.a.tips （1）每買一杯嘢飲會有一張印花卡，蓋滿5次可+$10兌換單杯環保袋一個，蓋滿10次可以免費兌換一杯茶飲，另一張卡後面蓋滿一行可兌換一次優惠。 （2）冰度同甜度都可以自由選擇，建議茶飲都係叫少甜，太甜既唔健康，亦蓋過味蕾。 （3）旋轉式設計嘅杯蓋可以更方便從杯頂飲用奶蓋飲品，呢方面幾貼心。 |
響茶
| 地址﹕ | 柴灣柴灣道350號樂軒臺地下317-318號舖 |
| 營業時間﹕ | 12:00 – 23:30 |
| 電話﹕ | 9864 3317 |
| 地址﹕ | 柴灣柴灣道350號樂軒臺地下317-318號舖 |
| 營業時間﹕ | 12:00 – 23:30 |
| 電話﹕ | 9864 3317 |
在〈柴灣夏日限定西瓜味茶飲 粒粒果肉清爽消暑〉中有 3 則留言
留言功能已關閉。