日常小館

小西灣食店清泉 軟滑蛋包飯暗藏芝士拉絲



[sp_html5video category=”2432″]

小西灣一帶良心小店唔多,沿小西灣運動場、藍灣半島直入,會發現呢間有家庭式味道嘅小店,餐牌中食物同普遍文青咖啡店無異,但餐廳無論食物定餐飲管理都相當有水準,周末平均60蚊一個餐,最貴都係76蚊,小西灣附近連鎖餐廳林立,小店更顯得與眾不同。

室內裝潢基本以北歐風為主,連碗碟都有幾分歐陸感,設計同食物都同Cafe相似,例如不敗嘅鮮蝦牛油果忌廉意粉巴馬火腿芝麻菜扁意粉、文青咖啡店必備嘅All Day Breakfast、香口惹味嘅英式Fish and Chips、鋸扒必食嘅香煎西冷牛扒配燒汁伴薯菜,仲有小編推介嘅日式芝士流心蛋包飯,份量十足,通通都係平食之選。話明小館,餐廳空間當然有限,只得十零個座位,但衛生方面都做足,枱與枱之間都有膠板分隔,入門口都會量體溫,食嘢之前唔俾除口罩,可以食得放心。

雖然位處小西灣邊緣,但餐廳較平實,人流一直絡繹不絕。以餐廳管理嚟講,呢間小店的確好高質,樓面有兩個人,廚房有三個人,以小店嚟講人手其實幾充足,由排隊到入座,上菜到離座,無論時間控制、人流控制、上菜速度定店員服務方面,流程非常順利,甚至留意食物細節,捱得落去亦絕不僥倖。

小編上次大窩口食All Day Breakfast同蛋包飯食到一肚氣,今次決定食多次同款Brunch。小西灣日常小館嘅全日早餐 $60,價錢一樣,包含多士、香草腸、煙肉、炒蛋、蕃茄、野菌、焗豆,份量同樣唔算多,全部表面都灑上香草點綴。廚師採用德國腸,而唔會用廚師腸,煙肉煎得香脆,有微微焦香感,但唔會太乾。麵包輕輕烘過,表面輕脆,內裏仍然鬆軟,而焗豆亦翻熱過,入口暖笠笠。All Day Breakfast必備嘅炒蛋亦好滑溜,蛋香味十足,不過最值得一讚係冬菇粒,簡單易整,炒香一堆再輕輕烘焗,表面好似好乾,但咬落仍然有濕潤感,菇香味重。另外,平時坊間叫柚子蜜,無論冷熱都要加錢,而呢間柚子蜜可作餐飲,只係凍飲要加錢。

延伸閱讀﹕蛋包飯無蛋 果Jam製特飲 大窩口咖啡店仍門庭若市?

另一道菜式係吉列炸蝦蛋包飯 $54,今次有三款醬汁任揀,有日式咖哩汁、意式茄蓉汁、白菌忌廉汁,似乎咖哩汁最穩陣。的確,咖哩汁質感唔算太黏稠,味道唔辣,微甜,係日式咖哩味,加埋煙韌嘅珍珠米,撈飯一流,略嫌咖哩汁唔係太足夠。炸蝦雖然炸粉唔厚,炸得香脆,但係欠缺蝦味,紅蘿蔔有輕微炒過,食得出有蘿蔔香同洋蔥香。而滑蛋不單軟滑,仲好厚身,好有蛋香味,而蛋香味中竟然夾雜輕微芝士味!原來夾層有芝士拉絲,味道可口,表面再灑上香草,廚師似乎好鍾意用香草點綴每款食物。不過,呢碟嚴格嚟講係炒滑蛋飯,而唔係蛋包飯,滑蛋放白飯上面,並非包裹白飯。

e.a.tips
(1)先攞位,人齊先入座,有單丁位,一個人會比較方便快捷,兩個人拍拖去都可以,但唔建議多過四人入座。
(2)人流多時,先點餐,後入座,最好先諗定食乜。
(3)可外賣自取,夜晚可訂枱,只係小店經營,全日無加一,只收Cash。

交通﹕小巴47M可從柴灣直入小西灣,車程僅約5mins,若步行入內需時約20至30分鐘。

延伸閱讀﹕歌連臣角夏日懶人路線 直闖舊軍事建築探險打卡

延伸閱讀﹕柴灣夏日限定西瓜味茶飲 粒粒果肉清爽消暑

日常小館

地址﹕ 柴灣小西灣道18號富景商場地下3號舖
營業時間﹕ 星期一至二 12:00 – 17:00、18:00 – 21:30;星期三全日休息;星期四至五 12:00 – 17:00、18:00 – 21:30;星期六至日12:00 – 16:00、18:00 – 21:30
電話﹕ 6818 3759

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!