今次行到比柴灣更遠、港島東盡頭嘅小西灣,區內大多數係住宅區,不過其實都有可以遊覽嘅地方。編輯第一次認識小西灣,係從《家有囍事》睇到係一個周星馳帶張曼玉去嘅地方,小西灣原本唔係叫小西灣,填海前叫馬塘,後來又叫小柴灣或柴灣仔,都係由於位置靠近馬塘山同柴灣。而柴灣本身客家話發音同西灣類似,故翻譯被稱作西灣,所以最終小柴灣就變成小西灣。
3低本地遊,  兩個人旅吓行,  和你Taste

【3低本地遊】小西灣前身有料到? 百呎小店有水準 闖入軍事建築遺址

個人瀏覽過





今次行到比柴灣更遠、港島東盡頭嘅小西灣,區內大多數係住宅區,不過其實都有可以遊覽嘅地方。編輯第一次認識小西灣,係從《家有囍事》睇到係一個周星馳帶張曼玉去嘅地方,小西灣原本唔係叫小西灣,填海前叫馬塘,後來又叫小柴灣或柴灣仔,都係由於位置靠近馬塘山同柴灣。而柴灣本身客家話發音同西灣類似,故翻譯被稱作西灣,所以最終小柴灣就變成小西灣。

第一站﹕小西灣運動場

由柴灣行到小西灣,海傍附近嘅小西灣運動場係全港第二大運動場,僅次於香港大球場,1997年前落成啟用,運動場圓拱上蓋看台可容納1.2萬個觀眾入場,草地足球場既符合標準,可舉行甲組足球大型賽事,影張相真係夠晒霸氣。而田徑設施都符合國際業餘田徑總會標準,平常唔少居民都會去運動場跑步。

第二站﹕日常小館

由小西灣運動場步行到南灣半島樓下係巴士總站,亦有一條好啱打卡嘅粉色天橋連接,交通尚算方便,但小西灣以連鎖餐廳為主,要搵好嘢食唔容易。附近富景商場有一間排隊店日常小館,望落類似一般文青咖啡店,周末都係六、七十蚊一個餐,餐飲管理方面好有水準。即使只係All Day Breakfast,都用心炮製,炒蛋滑溜,焗豆亦暖笠笠,而日式芝士流心蛋包飯亦幾出色,有3款醬汁可擇,仲可以配搭炸豬扒或炸蝦,日式咖哩汁配滑蛋,好有蛋香味,滑蛋內更有芝士香,值得拍拖去試吓!

延伸閱讀﹕小西灣食店清泉 軟滑蛋包飯暗藏芝士拉絲

小西灣本來係英國情報中心所在地,40年代末,英、美、澳、加、紐五國組成五眼聯盟,英國就喺小西灣建立一個遠東大型情報中心,以無線電通訊幫助台灣中華民國政府監聽中共政權,方便台灣一方喺調景嶺得到資訊。不過,80年代確認香港主權移交後,該情報中心即時關閉,並且徹底拆毀,其後逐漸變成住宅區。填海前,小西灣同時係英國皇家空軍居住地,但之後變成空軍球場。

第三站﹕小西灣海濱花園

鄰近日常小館,可以拍拖行吓位處小西灣道嘅小西灣海濱花園,海濱長廊環境舒適,藍天白雲下可飽覽海天一色景觀,更可眺望將軍澳、佛堂洲,海邊不時會發現有居民或途人齊齊落水遊玩。

第四站﹕歌連臣角砲台遺址

70至80年代時,事實上為配合地下鐵路,將柴灣徙置大廈拆卸,結果為安置居民同應付人口急增問題,政府就開發小西灣。二戰前人口極少,80年代初亦只有200餘人,大多為漁農業人士,其後先發展為住宅區。

由海濱花園經龍躍徑,可以去到歌連臣角炮台遺址,當中最出名就係被稱為大電視嘅探射燈碉堡,仲可以去埋英軍二戰發電站探險,路線唔複雜,亦唔需要爆汗,呢條懶人路線好適合兩個人夏天散吓步。上英軍二戰發電站時,小路狀似山路,略為崎嶇,有探險感,上到頂仲有頹廢感。回程可以去埋歌連臣角炮台遺址,下面會見到碉堡遺跡,不過颱風過後瓦礫片片,兩個人遊走時特別需要小心安全。

延伸閱讀﹕歌連臣角夏日懶人路線 直闖舊軍事建築探險打卡


E.A.Tips :

(1) 小巴路線47M,47E,61 皆可到達小西灣。

(2)若由柴灣步行到小西灣,腳程約20分鐘。


Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!