【區區有小店】柴灣3間小店 有一間定食屋神秘得你絕對意想不到

[sig_post_pv label=””] 個人瀏覽過

 

 

 

柴灣亦有唔少小店,以外賣店佔多,包括港式小食、台式飲品等,最值得推介係一間隱藏於柴灣體育館內嘅日式定食屋,位置神秘,食物不俗,值得拍拖兩個人去試吓。

(1)響茶

茶飲店係現時每區必備嘅小店,呢間響茶亦係其一,各款茶飲解渴又消暑,當中西瓜口味嘅芝士奶蓋夠晒特別,清爽度高,最啱夏天飲用。而招牌黑糖Oreo珍珠鮮奶嘅黑糖都夠掛杯,鮮奶味香濃,珍珠煙韌,最特別係有一杯以香蕉為主嘅金蕉榮光歸香港,以香蕉榨果汁。

延伸閱讀﹕柴灣夏日限定西瓜味茶飲 粒粒果肉清爽消暑

(2)友光記

另一間係一間主打傳統小食嘅微舖,同樣由年輕人主理,光字更有特別意思。小店內嘅小食包括有燒賣、碗仔翅、生菜魚肉、咖喱角、陳皮魚蛋、墨汁墨魚丸、春卷等,醬料更有特製沙嗲醬可擇,夠濃香。最特別係竟然有只有舊式小食檔先有嘅陳皮魚蛋,成本較高,魚蛋的骰,入口彈牙,有陳皮香,唔會有腥味,添加微微辣汁更有層次。而炸燒賣就保持方形,表皮微脆,內餡稍有濕軟,整體偏乾。

延伸閱讀﹕柴灣街坊小食店 傳統陳皮魚蛋僅5蚊6粒

(3)悠 定食屋

柴灣最特別嘅一間小店,其實係悠定食屋,呢間定食屋位處柴灣體育館內,而且靠近角落,並非輕易搵到。小店菜式以日式定食為主,如京都風蒲燒鰻魚箱飯配麵豉湯,份量合理,味道唔錯。另有季節限定鍋物,包括最平嘅和風牛肉鍋,湯底可揀豬骨、鰹魚、醬油、麵豉或辛辣,湯底夠清,唔會太鹹,入口舒服,雜菜鍋內有逾10款配菜。至於招牌貓飯亦有重木魚味、紫菜、牛油、日本醬油,一碗只係加$28,都算係糧尾之選。

延伸閱讀﹕神秘定食屋隱藏柴灣體育館 人均$100歎日式料理



Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!