樂富格仔山極速登頂
九龍,  兩個人影吓相,  神秘之地

樂富格仔山極速登頂 高空俯瞰九龍仔一帶市景



    武漢肺炎逼到好多香港人上山抖氣,結果造成多座山皆人流滿滿嘅情況,小編今次繼續反其道而行去登市區山,人流反而比熱門嘅行山路線少,絕對係兩個人目前登山嘅好去處。

    需時﹕15至30分鐘

    位於樂富市區嘅格仔山,又名雷達山,原稱九龍仔山,英文名為Checkerboard Hill,海拔高98米,只係一座近樂富、介乎九龍塘同九龍城嘅小山丘,係當年啟德機場13跑道降落航道必經地方,小山丘髹上紅白格仔相間嘅圖案係方便機師導航,所以早期叫格仔山,後來機場關閉,髹返灰色同種咗樹。不過,格仔山仍然係唔少人懷舊,甚至抖氣、郊遊同睇景嘅好地方。

    遊格仔山嘅同時,另一條分岔路轉上去,可以順便行吓樂富配水庫休憩花園,有一片大草地可以俾小朋友放電,青翠碧綠嘅草地又可以俾大人休息同散步。

    開始上格仔山,基本上沿住配水庫外面行走,就可以搵到上格仔山嘅入口,行上梯級後要小心安全,小路較窄,隨時跌落山。

    上到格仔山山頂,記者發現原來有一欄鐵絲網欄住唔俾人跨過,但似係人為損壞,整層鐵絲網向內倒下,然後不少人都走出該圍欄範圍。記者絕對唔建議坐邊緣打卡,坐鐵絲網原先嘅位置已經係極限,要影靚相唔一定要做一啲極危險嘅動作,安全情況下一樣可以影靚相。

    從格仔山山頂可以飽覽九龍仔一帶景觀,左面可以睇到九龍城,而右面則可睇到九龍塘,中間位置俯視就係九龍仔公園,相信日落同夜間景色會更壯觀,不過夜晚落山更危險,所以我哋日落前已經離開咗。

    E.A.Tips﹕

    (1)小路上山有一定危險度,而且多沙路,非石屎路,最好靠住鐵絲網行走,右邊叉錯腳就會跌落去。
    (2)好多女仔鍾意坐山頂邊緣影相,但打卡還打卡,Miss A絕對唔建議坐邊緣打卡,因為下面真係無任何欄杆或平台,坐低起身更危險,一失足就從高空跌落去!
    (3)上到山頂要小心被地上嘅鐵絲網𠝹到,生銹嘅鐵通同鐵絲網好易會𠝹傷人。


    E.A.路線﹕
    行入樂富公園,由聯合道入口作起點,上斜會見到分岔路口,右邊係發電站,基本上無咩睇,左邊係樂富配水庫休憩花園,中間有梯級小路可以上格仔山。


    樂富公園

    地址﹕老虎岩富安街
    開放時間﹕24hours
    電話﹕ 2304 5585

    延伸閱讀﹕由外黃到內 樂富廣場平民西餐廳最啱撐枱腳

    Δ 版權為E.A.Two 兩個人醫吓肚所有,歡迎轉貼連結,勿全篇文章轉載

    Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!