由外黃到內 樂富廣場平民西餐廳最啱撐枱腳

由外黃到內 樂富廣場平民西餐廳最啱撐枱腳

[sig_post_pv label=”瀏覽:”]





[sp_html5video category=”1912″]

位於樂富廣場嘅呢間海鮮西餐廳,無心插柳搵到嘅呢間西餐廳,價錢唔太貴,足料又抵食,極適合拍拖撐枱腳。

由店外黃到店內,設計以黃色為主調,顏色鮮艷,但不俗氣,店內有霓虹燈字樣,好搶眼,仲有STAND WITH HONG KONG嘅字樣貼喺牆壁上。室內環境清靜,位置唔多,坐得舒服,適合幾個知己好友小聚。

樂富要搵非連鎖食店已經艱難,仲要搵高質嘅食店,絕對係難上難。今次小編無意中發現呢間價錢相當平呢嘅西餐廳,食物有質素之餘,喺武漢肺炎下亦做足抗疫措施,有為客人量度體溫,限聚令下每張枱都有1.5米以上距離,餐具亦有獨立包裝,每日仲有限定口罩提供,絕對令人食得放心。

午餐有一款係香脆三文魚手指配忌廉雞肉意粉,上面灑有芝士粉,將意粉撈勻後,入口有啖啖芝士香,忌廉醬汁偏濃稠,意粉內亦有好多粒雞肉肉粒,意粉掛起醬汁,質感滑溜,唔會軟淋淋。三文魚魚肉製成手指條般,都算係粗身,約兩三隻手指咁粗,有足夠魚肉,表皮炸得脆卜卜,而魚肉則嫩滑,一片片魚肉質感新鮮,如果獨立食嘅話配沙律醬似乎唔錯。

極度推介白鱈魚漢堡伴自家製他他醬配薯條,漢堡不單大份兼足料,而且好精緻,打卡一流!漢堡包面有啖啖牛油香同芝麻香,包內有蕃茄同生菜等餡料,當然唔少得脆炸白鱈魚,鱈魚外面香脆,魚肉嫩滑唔嚡口,雖然鱈魚係以脆炸方式製作,但無乜油膩感,加上自家製嘅他他醬,入口有啲似沙律醬,酸甜味夾雜鮮甜味,好fresh,反而令漢堡帶有清新感。至於薯條亦外脆內軟,以罕有連皮薯條製法,入口滿滿薯香,好香口。

嘢飲有汽水咖啡或茶,仲有蜜桃茶可以選擇,有蜜桃味同茶味,甜度恰好。埋單只係一百一至一百二左右,價錢相宜,食物足料,絕對係拍拖抵食之選。

Like Facebook 緊貼最新資訊,一個Like一個鼓勵,支持原創文章,向Content Farm說不。】

延伸閱讀﹕樂富格仔山極速登頂 高空俯瞰九龍仔一帶市景

Seafood Stand

地址﹕ 樂富聯合道198號樂富廣場1樓1104號舖
營業時間﹕ 星期一至五 12:00 – 22:00;星期六、日及公眾假期 11:00 – 22:00
電話﹕ 3621 0478

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


在〈由外黃到內 樂富廣場平民西餐廳最啱撐枱腳〉中有 2 則留言

留言功能已關閉。