兩個人影吓相,  神秘之地

全港5大快靚正登山點 15分鐘即達山頂



目前香港氣溫愈來愈高,意味夏天即將到來,事實上5月嘅天氣已經逐漸轉變,唔少人都開始使用風扇。不過夏天來臨、氣溫上升,行山機會將愈少,唔少鍾意行山嘅人都趕住喺夏天前再上山。要喺夏天爆汗之前再上山抖氣或打卡嘅話,除咗超熱門嘅登山點,其實仲有好多靠近民居嘅小山丘,腳程較短,15分鐘至30分鐘可以到達山頂位置,居高臨下欣賞山下景色,特別適合拍拖兩個人輕鬆上山散吓步。

Like Facebook / MEWE 緊貼最新資訊,一個Like一個鼓勵,支持原創文章,向Content Farm說不。】

(1)紅燈山

紅燈山位置靠近何文田,又稱為採石山,位處何文田,如果由地鐵何文田站口出發,只係條天梯較窄同上斜會少少攰,15至20分鐘就上到山頂,但由公開大學嗰邊行上山就較輕鬆,上到山頂可以飽覽土瓜灣市景同何文田新舊樓,而且可以遠眺獅子山、九龍灣海景同舊機場跑道。紅燈山比較適合睇日出,日落景基本已經被附近樓景遮蔽。

延伸閱讀﹕避山上人群! 反其道而行登市區山 15分鐘到紅燈山山頂

(2)格仔山

格仔山又叫做雷達山,同時被稱為九龍仔山,靠近樂富位置,可以同時俯視九龍仔公園、九龍塘同九龍城,最出名係屬於舊啟德機場13跑道降落航道必經地方,叫格仔山係因為曾經被髹上紅白格仔圖案,方便機師導航,直至機場關閉先髹返灰色。格仔山隔離係樂富配水庫休憩花園,有一片青翠碧綠嘅草地,雖然上山時間僅15分鐘,但上山必經小路較狹窄,山頂位置原本欄住嘅鐵絲網亦倒下,基本已經無圍欄,所以打卡還打卡,絕對要小心安全,影靚相唔一定需要坐到最邊緣位置同做出極危險嘅動作。

延伸閱讀﹕樂富格仔山極速登頂 高空俯瞰九龍仔一帶市景

(3)沈雲山

沈雲山附近為佐敦谷公園,座落觀塘,同時又叫水塘山,係觀塘人嘅一個後花園,上山只係15至25分鐘。山頂景觀極開揚,從四邊位置基本可360度盡覽山下景色!東北有順天邨等、北面有順利邨同飛鵝山、南面有樂華邨、鱷魚山同牛頭角、西面就有佐敦谷同獅子山側面、東南就係觀塘,至於西南面亦可睇埋九龍灣,黃昏睇埋日落更壯觀。山頂中央有個觀塘上配水庫遊樂場,大草地設施充足,而繼續向九龍灣同獅子山方向行,可以見到一個神秘打卡位,本來係一個防空洞,充滿頹廢風。不過,由九龍灣落山或上山就需要特別小心,路面狹窄之餘亦崎嶇不平。

延伸閱讀﹕輕鬆上山抖抖氣 「觀塘後花園」沈雲山必影神秘打卡位

(4)紅香爐峰

紅香爐峰係唯一位置唔喺九龍嘅小山丘,靠近北角寶馬山,同樣可以用晨運路線嚟形容,屬於港島區清淨之地,不單可以180度至270度觀賞維港景色,仲可以睇埋日落靚景,視野遼闊得可以媲美太平山頂。不過,上山路線有幾段分岔路,需要特別留意,上山頂前仲有一小段路需要攀上石。紅香爐峰絕對係一個小山丘,15至30分鐘就上到山頂位置,但山頂位置唔多,每塊巨石只能容納一至兩人,絕對有危險度,所以打卡時必須留意安全問題。

延伸閱讀﹕15分鐘直上寶馬山紅香爐峰 無遮擋望維港靚景

(5)嘉頓山

最後,嘉頓山絕對係香港人最熟悉嘅市區短途小山丘,位置喺深水埗,只係90米高,由地下直上樓梯,只係10至20分鐘就可以到達山頂,欣賞深水埗市景同樓景,最適合嫌遠又想行山嘅朋友。

延伸閱讀﹕最易行嘅山 嘉頓山最啱睇夜景

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!