15分鐘直上寶馬山紅香爐峰

15分鐘直上寶馬山紅香爐峰 無遮擋望維港靚景

[sig_post_pv label=””] 個人瀏覽過



紅香爐峰基本上只係一個晨運路線,可以快速登頂嘅小山丘,人流比較少,絕對係港島區鬧市一片清淨之地,最啱登山睇維港景色同日落靚景,視野可媲美太平山頂。

既然武漢肺炎逼到好多人上山抖氣,以致熱門山峰人流極多,倒不如繼續反其道而行,暫時先去比較冷門嘅小山丘,拍拖行山亦較方便,如果天清氣朗時,不妨上紅香爐峰睇睇。

山峰上人雖不算太多 但山頂空間有限 感覺會比較擠迫 大家小心忍讓

上山路段會有唔少分岔路,會好容易迷路,但只要過咗分岔路後,就會沿路見到絲帶路,樹上綁有絲帶,只需沿絲帶路即可直上山頂,基本上路程唔難,適合兩個人散步上山。

紅香爐峰海拔高220米,靠近北角寶馬山,登上頂峰基本只需15分鐘!雖然只係小山丘,但景觀開揚,攀上石後可到達熱門打卡位,亦可以由180度至270度無遮擋飽覽維港靚景同日落景。

上山大多係本地人,亦有唔少外籍人士,係晨運、拍攝或遛狗嘅好地方。山頂空間有限,同時每塊巨石空間唔大,僅容納一至兩人,亦難以擺腳架拍攝,但始終有一定危險度,唔建議攀得太高打卡。

E.A.路線﹕
聖貞德中學作起點
,經左邊小路行入去,沿樓梯路上山,直上到第一個分岔路口,見到木牌,可沿右邊繼續行,因為左邊只係寶馬山方向,右邊先可以去紅香爐峰。沿路基本上都係泥路,但中間其實已經有好多人踩出一條小徑,同時有部份路段建築咗石屎路,右邊可以望到山下景色。然後,會見到第二個分岔路口,左邊大路同小路分別係渣甸山同小馬山方向,千祈唔好行錯!右邊先係紅香爐峰方向,繼續沿路直行,上山路會一直見到一條絲帶路,有山友喺沿路綁晒絲帶,避免大家行錯路,所以……跟住黃絲帶一定無錯!

Like Facebook 緊貼最新資訊,一個Like一個鼓勵,支持原創文章,向Content Farm說不。】

e.a.tips
(1)上山分岔路口多,容易迷路,所以最好都係睇清楚路線先好行。

(2)雖然只係一個小山丘,同樣有山路,比較崎嶇不平,部份山路較窄,而近乎到達山頂時,需要好似攀石場咁攀上好多舊巨石,著運動鞋比較方便,另著牛仔褲或causal wear都還可以,但女仔絕對唔建議著非過膝嘅短裙,上次小編喺一個著裙上山嘅女仔後面行,只係比水平線望高少少,已經睇到前面女仔嘅裙下春光。

(3)喺山頂,有唔少人都會攀上石打卡,不過攀上去危險度甚高,失足即跌落山,一定要量力而為,事實上攀上去睇到嘅景觀同唔攀上去係相差無幾,所以其實無咩必要將自己放到危險地方。

(4)若要等候日落,建議帶備電筒,上山容易落山難,天黑時落山會較危險。

交通﹕
(1)由天后巴士總站搭綠色小巴49M,車費為$5.1;
(2)由銅鑼灣百德新街搭綠色小巴25號,車費為$5;
(3)由鰂魚涌沿山邊行,經柏架山自然徑入口進入,路程較長,但全程都係步行上山,據了解全程都要兩三個鐘;
(4)由金鐘搭綠色小巴24M,尚翹峰上車,車費為$5,直達總站畢拉山道,車程約20分鐘,路線較清晰,斜路同樓梯較少,但(4)同(3)一樣所需時間較長;
而(1)(2)同樣喺寶馬山總站落車,車程約10分鐘,落車位置正對聖貞德中學,靠近樹仁大學,上山基本上快則15分鐘,慢則30分鐘都可以直達山頂。

紅香爐峰

地址﹕寶馬山道55號聖貞德中學 55 Braemar Hill Rd, Hong Kong
開放時間﹕24hours

延伸閱讀﹕全港5大快靚正登山點 15分鐘即達山頂

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!