深井以燒鵝聞名，大多數人腦中都將深井同燒鵝自然聯繫，但事實上深井又點只燒鵝呢？今次編輯想帶大家拍拖兩個人去深井半日文化歷史遊，其實深井連繫唔少山徑，但現時夏日天氣炎熱，決定先撇除山路，簡單探索吓深井呢個鮮為人知嘅村落，上山？秋季再講啦！
事實上，深井於地理上屬荃灣、汀九以西嘅鄉郊地帶，靠近青龍頭，當中以深井村為中心，深井村牌坊就位處青山公路深井段，附近有遠近馳名嘅深井燒鵝，步入深井村，可遠眺馬灣、青馬大橋，前臨東灣海岸線，環境比市區寧靜。但其實深井以前係由農村變工業邨，最後變成現時嘅住宅區，區內一度四處都係化工廠、香港啤酒廠、嘉頓麵包廠、九龍紗廠，而深井村附近嘅麗都花園前身就係九龍紗廠，而碧堤半島前身則為生力啤酒廠嘅，均為80至90年代興建嘅私人住宅。其中，香港啤酒廠、九龍紗廠、嘉頓麵包廠則為深井3大工廠，啤酒廠更以山水釀酒，而目前依舊位處深井嘅廠房則只有嘉頓麵包廠。
深井村、深井新村等村屋比私人住宅歷史悠久，大多為三層平房建築，靠近青山公路嘅村屋低層更有唔少食肆、士多。由深井村牌坊起步，經過文青咖啡店July Coffee & Co.，前行至深井村路，從深井臨時遊樂場左邊可達深井村公所、因最初客家原居民居住而興建嘅傅氏宗祠，而右邊方向則可直達深井公立學校牌坊，而深井公立學校牌坊背後樓梯繼續向上走，則可以同樣到達深井村公所，位置原為深井公立學校。
而深井公立學校現為一所荒廢學校，位處山坡之上，深井村公所位置就係學校原址，只有地下一層，後來經活化改為綜合活動中心，校舍本來前臨大操場、講台，不過現時變成一個工地，未能進入。至於學校牌坊頂端雕刻寫有1961年，即於該年興建，屹今有60年歷史。不過翻查歷史，早年深井原有文通書室，後來改為深井學校，於1927年經村民捐地興建，1961年先興建新校舍，即深井公立學校，當時吸引唔少來自青龍頭、汀九、清快塘嘅學童返學，最終因政府淘汰村校而於1983年停辦。而深井公立學校牌坊兩旁則有一副對聯，寫有 「深深造士菁（音﹕青）莪（音﹕娥）秀」、「井井培材棫（音﹕域）樸芃（音﹕蓬）」，編輯不才，實在難以理解， 井字估計係深井意思，成句意思簡單嚟講就係培育優秀人才、社會棟樑。
從牌坊直上，於分岔路左邊可以去到村公所，而繼續向前直行則可以從高點俯視山腳淺綠、白相間嘅「光屋」，而繼續上山去可以通往大欖郊野公園，經深井管理站前往深井沉澱塘，水塘較平時睇嗰啲更細小，但人流唔多，了無人煙，比較清靜，而湖面亦相當平靜，天空之鏡輕易拍攝。路段甚至可以連接圓墩古村，此路段於Google Map並無顯示路線，但現場路段清晰，樹葉唔多，可見間中會有山友穿過。不過，上山路段呢…編輯決定秋天先行。
折返深井臨時遊樂場、深井臨時街市及熟食中心，穿過福興士多、深井新村，重有潮州文化入侵嘅深井潮州街坊福利會、深井商會，回望可望向屯門公路，更可眺望青馬大橋，沿深康路繼續走到盡頭就會見到深井商業新村，隔離就可以正面望呢座綠色相間嘅光屋……至於「光屋」到底係乜東東？
深井「光屋」前身係一座九龍紗廠眷屬宿舍，現時係屬於社企「要有光社會地產」4年前推出嘅「光房」計劃，據悉內有44伙，每個單位約有300呎，由業主以超低價租予基層單親婦孺、在職貧窮家庭、申領綜援家庭，官方曾聲稱受惠者既有新移民，亦有香港人。而「光屋」住戶於3年租約限期內需提升生活能力，再搬出「光房」，簡單嚟講就係幫助基層脫貧。從戶外所見，「光屋」樓高5層，靠近山邊，每個單位環境不俗，有公共陽台，頂層更有天台。
由深康路折返潮州商會對面停車場，沿小路走進，可以前往深井新村內有逾70年歷史嘅天地父母廟，不過廟內無神像，因為天地父母為無形。而繼續前行則可連接清快塘，通往喜香農莊、清快塘村、清快塘新村，甚至元荃古道路段。不過為避免中暑，上山路段等秋季再行啦！
返回地面，經深康路走出青山公路深井段，沿途可見多間燒鵝店，包括傅記、陳記、裕記，而路口則有一所靈光小學，內有深井靈光堂，相比深井公立學校更歷史悠久，皆因於1950年初由英國傳教士創立，至今仍為深井一所津貼小學。
向荃灣方向走約10分鐘，會見到另一座歷史悠久嘅建築物，不過係舊式廠房，位於深井青山公路深井段嘅嘉頓麵包廠房，鄰近鵝雕塑、運水船石、海濱公園。位於深水埗嘉頓山旁邊嘅係嘉頓中心，為嘉頓總辦事處、烘焙中心，而深井嘅先係嘉頓廠房，靠近青山公路嘅係低座廠房大樓，而靠近深慈街嘅係高座廠房大樓，至今已比較少見如嘉頓嘅舊式廠房，而廠房位置亦可直視青馬大橋。
深井村最初客家村民落戶，由農村逐漸演變為工業地帶，最後變成住宅區，歷史、文化方面值得再深究吓。
E.A.Tips :
❷ 若由青山公路深井段深井村村口起步，沿村內樓梯直上，到達深井村路後會經過深井臨時遊樂場，左邊可以去深井村、深井遷至村兒童遊樂場、傅氏宗祠、深井村公所，而於穿過深井臨時遊樂場右邊則可到達深井公立學校牌坊，靠近深井臨時街市及熟食中心，沿樓梯直上可以於高點俯視光屋，繼續前行上山可達大欖郊野公園、深井沉澱塘、圓墩村。
❸ 要去光屋，可以先搵福興士多，穿過深井新村、深井潮州街坊福利會、深井商會，就會到達深井商業新村，旁邊就係光屋。
❹ 沿深井新村走，經過天地父母廟，前行上山路可以去到清快塘，而且可以連接元荃古道。
❺ 路段皆有居民，記得保持安靜，同時唔好亂扔垃圾，亦唔好於村內逗留太耐。
❻ 由牌坊通往大欖郊野公園山徑小路旁邊有農地，村民聲稱內有惡犬，要特別小心，唔好進入。
深井村
深井深慈街1號
09:00–17:30，星期日休館
2386 4231
深井光屋
荃深井深康路100 號
2806 1911
嘉頓有限公司
荃深井深康路100 號
2806 1911
在〈光屋係乜東東？深井村歷史文化半日遊 農村變工業邨再變住宅地 探索舊式工廠+廢校牌坊〉中有 3 則留言
留言功能已關閉。