2021-09-19

光屋係乜東東?深井村歷史文化半日遊 農村變工業邨再變住宅地 探索舊式工廠+廢校牌坊

深井村(公立學校牌坊+光屋+商業新村+舊村+新村+嘉頓廠房)

個人瀏覽過





深井以燒鵝聞名,大多數人腦中都將深井同燒鵝自然聯繫,但事實上深井又點只燒鵝呢?今次編輯想帶大家拍拖兩個人去深井半日文化歷史遊,其實深井連繫唔少山徑,但現時夏日天氣炎熱,決定先撇除山路,簡單探索吓深井呢個鮮為人知嘅村落,上山?秋季再講啦!

事實上,深井於地理上屬荃灣、汀九以西嘅鄉郊地帶,靠近青龍頭,當中以深井村為中心,深井村牌坊就位處青山公路深井段,附近有遠近馳名嘅深井燒鵝,步入深井村,可遠眺馬灣、青馬大橋,加上前臨東灣海岸線,環境比市區寧靜。但其實深井以前係由農村變工業邨,最後變成現時嘅住宅區,區內一度四處都係化工廠、香港啤酒廠、嘉頓麵包廠、九龍紗廠,深井村附近嘅麗都花園前身就係九龍紗廠,而碧堤半島前身則為生力啤酒廠嘅,為80至90年代興建嘅私人住宅。其中,香港啤酒廠、九龍紗廠、嘉頓麵包廠則為深井3大工廠,啤酒廠更以山水釀酒,但目前依舊位處深井嘅廠房則只有嘉頓麵包廠。

深井村、深井新村等村屋比私人住宅歷史悠久,大多為三層平房建築,靠近青山公路嘅村屋低層更有唔少食肆、士多。由深井村牌坊起步,經過文青咖啡店July Coffee & Co.,前行至深井村路,從深井臨時遊樂場左邊可達深井村公所、因最初客家原居民落戶而興建嘅傅氏宗祠,而右邊方向則可直達深井公立學校牌坊。從深井公立學校牌坊背後樓梯繼續向上走,則可以同樣到達深井村公所,位置原為深井公立學校。

深井公立學校現為一所荒廢學校,位處山坡之上,深井村公所位置就係學校原址,只有地下一層,後來經活化改為綜合活動中心,校舍本來前臨大操場、講台,不過現時變成一個工地,未能進入。至於學校牌坊頂端雕刻寫有1961年,表示於該年興建,屹今有60年歷史。不過翻查資料,早年深井原有文通書室,後來改為深井學校,於1927年經村民捐地興建,1961年先興建新校舍,即深井公立學校,當時吸引唔少來自青龍頭、汀九、清快塘嘅學童返學,最終因政府淘汰村校而於1983年停辦。而深井公立學校牌坊兩旁則有一副對聯,寫有 「深深造士菁(音﹕青)莪(音﹕娥)秀」、「井井培材棫(音﹕域)樸芃(音﹕蓬)」,編輯不才,實在難以理解, 井字估計係深井意思,成句大概意思簡單嚟講就係培育優秀人才、社會棟樑。

從牌坊直上,於分岔路左邊可以去到村公所,而繼續向前直行則可以從高點俯視山腳淺綠、白色相間嘅「光屋」,而繼續上山去可以通往大欖郊野公園,經深井管理站前往深井沉澱塘,水塘較平時睇嗰啲更細小,但人流唔多,了無人煙,比較清靜,而湖面亦相當平靜,天空之鏡輕易拍攝。路段甚至可以連接圓墩古村,此路段於Google Map並無顯示路線,但現場路段清晰,樹葉唔多,可見間中會有山友穿過。不過,上山路段呢…編輯決定秋天先行。

折返深井臨時遊樂場、深井臨時街市及熟食中心,穿過福興士多、深井新村,重有潮州文化入侵嘅深井潮州街坊福利會、深井商會,回望可見屯門公路,更可眺望青馬大橋,沿深康路繼續走到盡頭就會見到深井商業新村,隔離可以正面望向呢座綠色相間嘅光屋……至於「光屋」到底係乜東東?

      

深井「光屋」前身係一座九龍紗廠眷屬宿舍,現時係屬於社企「要有光社會地產」4年前推出嘅「光房」計劃,據悉內有44伙,每個單位約有300呎,由業主以超低價租予基層單親婦孺、在職貧窮家庭、申領綜援家庭,官方曾聲稱受惠者既有新移民,亦有香港人。而「光屋」住戶於3年租約限期內需提升生活能力,再搬出「光房」,簡單嚟講就係幫助基層脫貧。從戶外所見,「光屋」樓高5層,靠近山邊,每個單位環境不俗,有公共陽台,頂層更有天台。

由深康路折返潮州商會對面停車場,沿小路走進,可以前往深井新村內有逾70年歷史嘅天地父母廟,不過廟內無神像,因為天地父母為無形。而繼續前行則可連接清快塘,通往喜香農莊、清快塘村、清快塘新村,甚至元荃古道路段。不過為避免中暑,上山路段等秋季再行啦!

返回地面,經深康路走出青山公路深井段,沿途可見多間燒鵝店,包括傅記、陳記、裕記,而路口則有一所靈光小學,內有深井靈光堂,相比深井公立學校更歷史悠久,皆因於1950年初由英國傳教士創立,至今仍為深井一所津貼小學。

向荃灣方向走約10分鐘,會見到另一座歷史悠久嘅建築物,不過係舊式廠房,係位於深井青山公路深井段嘅嘉頓麵包廠房,鄰近鵝雕塑、運水船石、海濱公園。位於深水埗嘉頓山旁邊嘅係嘉頓中心,為嘉頓總辦事處、烘焙中心,而深井嘅先係嘉頓廠房,靠近青山公路嘅係低座廠房大樓,而靠近深慈街嘅係高座廠房大樓,至今已比較少見如嘉頓嘅舊式廠房,而廠房位置亦可直視青馬大橋。

深井村最初客家村民落戶,由農村逐漸演變為工業地帶,最後變成住宅區,歷史、文化方面的確值得再深究吓。


E.A.Tips :

(1) 乘搭巴士路線48P,52X,53,234A,234B,234D,A38,N252、小巴路線96,96M,302,308M 可以抵達深井村村口;而乘搭巴士路線48P,52X,53,96,96M, 234A,234B,234C,234D, 302,308M,A38,N252、小巴路96C,302,308A 則可到達碧堤半島巴士總站或海韻花園,位置靠近嘉頓有限公司、深井海濱公園。

(2) 若由青山公路深井段深井村村口起步,沿村內樓梯直上,到達深井村路後會經過深井臨時遊樂場,左邊可以去深井村、深井遷至村兒童遊樂場、傅氏宗祠、深井村公所,而於穿過深井臨時遊樂場右邊則可到達深井公立學校牌坊,靠近深井臨時街市及熟食中心
沿樓梯直上可以於高點俯視光屋,繼續前行上山可達大欖郊野公園、深井沉澱塘、圓墩村。

(3) 要去光屋,可以先搵福興士多,穿過深井新村、深井潮州街坊福利會、深井商會,就會到達深井商業新村,旁邊就係光屋。

(4) 沿深井新村走,經過天地父母廟,前行上山路可以去到清快塘,而且可以連接元荃古道。


(5) 路段皆有居民,記得保持安靜,同時唔好亂扔垃圾,亦唔好於村內逗留太耐。


(6) 由牌坊通往大欖郊野公園山徑小路旁邊有農地,村民聲稱內有惡犬,要特別小心,唔好進入。


深井村

深井深慈街1號
09:00–17:30,星期日休館
2386 4231

深井光屋

荃深井深康路100 號

2806 1911

嘉頓有限公司

荃深井深康路100 號

2806 1911

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook啦!
ΔPlease Like & Follow & Subscribe /
歡迎讚好、追蹤、訂閱

       

銅鑼灣推限定二人套餐 人氣店燈籠滷味啖啖台北夜市風味
靠近石板潭!本地鳳眼藍9月再盛放 鹿頸南涌魚塘角落零距離觀賞浪漫紫花海【2021賞花地圖】
Bauhaus風格豈止中環街市? 中上環博覽館活化必列啫士街街市 直上半山探索童話式大宅
盛夏Kayaking!西貢海灣3條路線出發獨木舟 小島玻璃水清澈見底 探索海洋生態享異國風靚景
筲箕灣東大街平民價正宗泰國菜 冬蔭公湯底濃郁可口 蝦醬炒飯惹味有驚喜
深井村西式咖啡店只限7月?All Day Breakfast 配料自選 罕見櫻花蝦炒蛋+熱香餅有新鮮感
深水埗基隆街泰北麵口味正宗 家鄉湯底香口惹味恍如穿越泰國
【中秋好去處2021】大澳水鄉花燈節取消開幕儀式 走勻大街小巷尋幻彩手繪燈籠 同場加映元朗大橋街市五彩燈籠街+灣仔利東街紅噹噹燈籠海
九十後部落觀塘新分店開業 懶人週末悠閒上樓歎All Day Breakfast
夏日去邊個沙灘?粉藍情人橋重開打卡地再現 石澳盡頭闖大頭洲回望小漁村尋靚景
連影193燈塔+日系碼頭唯美暮色!西貢海鮮街徒步三星灣路線 泳灘碧綠玻璃水清澈見底
大角嘴街角星馬菜餐廳 大大塊厚切豬扒上枱就聞到香味 最出色唔係菜式係乜?
大角嘴角落手打烏冬專門店 經濟型街坊價定食有乜揀?
尖沙嘴鬧市藏港版粉紅教堂 哥德式設計逾百年歷史 尖頂似浪漫童話古堡
中環半山藏薄荷綠摩羅廟 全港最古老清真寺被列一級歷史建築
【西藏偽旅行】五彩經幡隨風飄揚 山上滿佈彩旗寓意吉祥?

撰文﹕Miss A ;攝影﹕Mr E, Miss A;設計﹕Mr E

View all posts by 撰文﹕Miss A ;攝影﹕Mr E, Miss A;設計﹕Mr E →