深井沉澱塘+大欖+清快塘
兩個人影吓相,  新界,  神秘之地

傲視青馬大橋全景!青龍頭起步登深井沉澱塘 山頂連環瞰四橋景 清快塘農莊窺探睡蓮

瀏覽次數:1575
個人瀏覽過





上次編輯於夏季帶大家走過深井村,適逢踏入秋天,即管帶大家拍拖兩個人走上山,找尋鮮有人走過嘅山路。路段可以觀望青馬大橋全景,而且路段可連環眺望,青馬大橋、汲水門大橋、汀九橋,甚至遠啲嘅昂船洲大橋。山路亦可連接元荃古道、清快塘村、圓墩、大欖郊野公園,而且係一道正式郊遊徑,即使瞓晏咗,3點至4點出發都可以步行嘅路線。

由青山公路青龍頭步行上龍如路,向大欖郊野公園進發,經過深井濾水廠後,直到見到閘口管理亭、燒烤場、公廁,然後繼續上行至分岔路口,坡度不高,不難發現滿佈指示牌。左邊為圓墩古村屋,可以步往民安隊圓墩營、桃杭峒;一端為大欖自然教育徑路線,可通往大欖涌水塘,即千島湖;而今次編輯走嘅係無路牌兼最唔似正常路線嘅右邊方向,前行可以通往深井沉澱塘。

步行不足5分鐘,即會到達水塘位置,水塘位置後方為燒烤場、大草地,深井沉澱塘又叫深井聚水塘或深井沉澱池,面積唔大,空間甚小,一眼睇晒,可能係最細嘅水塘。不過,水塘水面平靜,碧綠有緻,可輕易拍攝「翡翠之鏡」。而水源基本由清快塘連接深井、青龍頭一帶,為居民提供食水;沉澱塘作用為沉澱山水當中嘅泥沙、枯枝,水源會流向大欖涌水塘,幫助山水淨化。

穿過深井沉澱塘、燒烤場,前行為盡頭方向,比較少人繼續前進,但事實上步行3分鐘後,會見到小路隱藏一道小山路入口。該山路入口隱蔽得完全唔似入口,但又見到正式山路指示牌,穿過暗黑小橋,的確可以連接一道山路。

雖然為上行山路,但路線清晰,並唔算太困難,而且不時有山友舖砌樓梯級,令路段難度降低。編輯推介此路線係因為人氣唔高,全程鮮見途人,背靠深山,環境清靜,觀賞水塘後,上山又可以環瞰整條青馬大橋!

直上山頂小平台,可以輕鬆拍攝青馬大橋全景,位置亦可以同時觀望左邊嘅汀九橋、右邊嘅汲水門大橋,甚至遠眺昂船洲大橋,能夠連環放眼香港四橋風景,可算係一道罕見路線。由山路入口直到分岔路口,全程約需時20至30分鐘,左邊兩條路線分別係圓墩郊遊徑、大欖方向,只需轉右則可以通往清快塘村。

大概下行約10至15分鐘,就可以到達清快塘村,分岔口左邊可通往由村屋改建而成嘅喜香農莊,內含荷花池,亦可窺探睡蓮,略帶清雅氣質。穿過農莊可以接駁元荃古道郊遊徑、田夫仔,而折返分岔路口,沿清快塘新村方向走,全段皆為下行石屎路,輕鬆易走,步行到公廁大概只係15至20分鐘,沿路可以折返深井新村、天地父母廟。




E.A.Tips :

❶ 巴士路線48P,52X,53,61M,234A 或96,96M 都可以到達深井村,

❷ 最好先到深井補給,沿途無補給點。

❸ 龍如路中途有公廁,郊野公園亦有,而近本路線終點位置,清快塘新村路至深井方向亦有公廁。

❹ 喜香農莊無需要入場費,可以經過,但謹記唔好隨意走入農田呀。

❺ 清快塘可以連表元荃古道,而深井沉澱塘亦可連接圓墩郊遊徑。

❻ 雖然山路明顯,但亦要小心路面碎石。

❼ 謹記自己垃圾自己帶走。

深井沉澱塘

  • 深井

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!


長假期後人氣熱點頓變空蕩蕩巨石陣 30分鐘從炮台山日式庭園登北角後山新手路線紅香爐峰
【野餐隨行】鰂魚涌香港人高水準兩餸飯最平$32 闖北角清靜海邊公園野餐近汽車渡輪碼頭
新田加州花園保留罕見赤紅色殖民時代電話亭 英式小庭園探索圓柱形皇冠郵筒/貴族風時鐘
【野餐隨行】黃大仙近30年騎呢《西遊記》公園野餐 本土自家製熱狗店推分店限定優惠
大圍舊式茶樓客香邨現已恢復24小時營業 火鍋店616班底接手保留經典糯米包/魚翅餃
非來自台灣?本土製牛肉麵旺角/長沙灣有得食 外賣自取折後$50有找
近屯門碼頭!屯門蝴蝶灣泰國冬蔭功蝦湯奶白變橙紅 估吓一碗有幾多隻蝦?
鑽石山出發勇闖石礦場!山中秘道探索高聳東南亞樹屋 上中下三條路線直抵城市後山入口
【野餐隨行】登紅燈山觀九龍半島!何文田勝利道姊妹店廚房打通 兄弟邦x鮮丼家一舖兩用賣日式丼飯
太子人氣車仔麵湯底鹵汁混腩汁 16款麵底任揀必試低卡蒟蒻麵
薄扶林榕樹小徑驚現獨特樹洞仙境!一條路線走過殖民建築玫瑰邨+歷史古蹟伯大尼教堂/舊牛奶公司牧場
「食街」搵食遊!西貢巷弄7間夏日必去本土小食店 離碼頭僅2分鐘步程
全港7間兩餸飯專門店良心地圖!港九新界遍地開花間間平靚正低至$32!(最新消息﹕5月鰂魚涌有新店)
近天澤商場!天水圍後山矮過嘉頓山 秘道闖淋坑山賞北方黃昏景【野餐隨行】
【野餐隨行】鴨脷洲海邊歎有料車仔麵 前臨南區純白燈塔眺東博寮海峽3支煙囪 30分鐘輕鬆走完小玉桂山
月前旺角設分店齊齊叫雞!上水鳳鳴居足料無味精雞湯麵濃郁可口 醉雞嫩滑+10款湯底回頭率極高