2021-09-19

深井村西式咖啡店只限7月?All Day Breakfast 配料自選 罕見櫻花蝦炒蛋+熱香餅有新鮮感

July Coffee & Co.

個人瀏覽過





深井向來係一個無目的地唔會去嘅地方,大多數人都覺得交通不便,事實上幾條巴士路線可以直達;而提到深井,唔少人第一時間只諗到食燒鵝,的確燒鵝係最出名嘅食店,不過深井又豈止可以食燒鵝,唔少文青咖啡店都開到深井啦!

呢間位處深井村內嘅咖啡店,叫July Coffee,唔通係7月先食嘅咖啡店?定7月開張嘅咖啡店呢?抑或老闆娘叫July?翻查資料,小店其實開咗2年半,以典型文青咖啡店裝潢為主調,偏向型格風,設有落地玻璃,燈光柔和,打卡光線都充足,一端有幾個2至4人座位,另一端有一排高枱櫈,其中一排面向咖啡師,咖啡吧內有自家烘焙咖啡豆,有興趣可以直接試試手沖咖啡。咖啡店雖然近巴士站,但畢竟位處市郊,環境舒適,有種台灣咖啡店嘅感覺,適合歇腳。

食物菜式選擇不少,以意粉、全日早餐為主,輕食有吐司、蛋糕,當中卡邦尼意粉$66 為一般Cafe必試菜式,呢間嘅卡邦尼意粉並非最正宗,而係典型改良版卡邦尼意粉,港式味濃,意粉配上白汁,芝士醬汁黏滑濃稠,幾Creamy,唔算膩,意粉爽彈,但偏向硬身,煙肉微脆,幾香口。

自由配搭早餐$48 賣相吸引,等同一份All Day Breakfast,以為食材大同小異,事實上可加配任何配料,而配料並非平常市區咖啡店有得選擇,加熱香餅$0,加櫻花蝦炒蛋$2,加牛仔腸$15,加雞排$20,感覺輕盈得嚟好飽肚。最大驚喜係一份All Day Breakfast有2片熱香餅、櫻花蝦炒蛋,熱香餅配有楓糖漿,比平時All Day Breakfast配麵包或多士有新鮮感,對比港版金拱門嘅熱香餅好得多,糖漿有香甜味,唔會得個甜字。

而炒蛋並非只有黑松露炒蛋,編輯認為黑松露會搶去炒蛋香味,平常都比較少食,反而覺得炒蛋配上櫻花蝦係好嘅嘗試,櫻花蝦並非如黑松露重味,只有啖啖蝦乾鮮香味,炒蛋嫩滑,但蛋香味本身唔重,但未有完全被蝦乾覆蓋。而牛仔腸比平常雞肉腸更juicy,雞排表皮則煎香過,有脆感。

      

飲咖以咖啡、鮮奶系列為主,凍朱古力咖啡$46 屬正常水準,不過不失,味道不算濃厚,就係一杯有朱古力味嘅咖啡,無乜特別。反而抺茶鮮奶$38 就有濃郁抺茶味,鮮奶滑溜,飲到底都有濃香抺茶味,不過抺茶粉就落得比較重手。

延伸閱讀﹕光屋係乜東東?深井村歷史文化半日遊 農村變工業邨再變住宅地 探索舊式工廠+廢校牌坊


E.A.Tips﹕

(1) 乘搭巴士路線234A, 308M, 52X 可以直達深井村,小店位於深井村牌坊斜後面。

(2) 店內有外賣自取,可以堂食,亦有戶外咖啡立飲位置。

(3) 需要用QR Code落單,先點餐,再付款,食物隨後會上枱。

(4) 可以即時加入做會員,並會得到印花,優惠券有$5、$10、$20,亦可即時使用,滿$150可以揀扣減$20,換言之拍拖兩個人每杯飲品可減$10。

(5) 可以選擇線上支付或櫃台支付,有Paypal、Cash、八達通等支付方式,重有其他支付方式,但唔建議用其他,不解釋。


July Coffee & Co.

深井深井東村92號地舖
09:00 – 18:00
電話

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook啦!
ΔPlease Like & Follow & Subscribe /
歡迎讚好、追蹤、訂閱

       

銅鑼灣推限定二人套餐 人氣店燈籠滷味啖啖台北夜市風味
靠近石板潭!本地鳳眼藍9月再盛放 鹿頸南涌魚塘角落零距離觀賞浪漫紫花海【2021賞花地圖】
Bauhaus風格豈止中環街市? 中上環博覽館活化必列啫士街街市 直上半山探索童話式大宅
盛夏Kayaking!西貢海灣3條路線出發獨木舟 小島玻璃水清澈見底 探索海洋生態享異國風靚景
筲箕灣東大街平民價正宗泰國菜 冬蔭公湯底濃郁可口 蝦醬炒飯惹味有驚喜
深水埗基隆街泰北麵口味正宗 家鄉湯底香口惹味恍如穿越泰國
【中秋好去處2021】大澳水鄉花燈節取消開幕儀式 走勻大街小巷尋幻彩手繪燈籠 同場加映元朗大橋街市五彩燈籠街+灣仔利東街紅噹噹燈籠海
光屋係乜東東?深井村歷史文化半日遊 農村變工業邨再變住宅地 探索舊式工廠+廢校牌坊
九十後部落觀塘新分店開業 懶人週末悠閒上樓歎All Day Breakfast
夏日去邊個沙灘?粉藍情人橋重開打卡地再現 石澳盡頭闖大頭洲回望小漁村尋靚景
連影193燈塔+日系碼頭唯美暮色!西貢海鮮街徒步三星灣路線 泳灘碧綠玻璃水清澈見底
大角嘴街角星馬菜餐廳 大大塊厚切豬扒上枱就聞到香味 最出色唔係菜式係乜?
大角嘴角落手打烏冬專門店 經濟型街坊價定食有乜揀?
尖沙嘴鬧市藏港版粉紅教堂 哥德式設計逾百年歷史 尖頂似浪漫童話古堡
中環半山藏薄荷綠摩羅廟 全港最古老清真寺被列一級歷史建築
【西藏偽旅行】五彩經幡隨風飄揚 山上滿佈彩旗寓意吉祥?

撰文﹕Miss A ;攝影﹕Mr E, Miss A;設計﹕Mr E

View all posts by 撰文﹕Miss A ;攝影﹕Mr E, Miss A;設計﹕Mr E →