2021-05-17

精品咖啡店Time Coffee進駐葵芳 全新薄荷綠蚊型咖啡店角落小確幸

Time Coffee

179 個人瀏覽過





葵芳隱藏嘅咖啡店有幾間,最近又有一間蚊型咖啡店開業,小店僅屬微舖模式,一眼睇晒,不過相比葵涌廣場小食,呢間全新咖啡店Time Coffee係稍有新意,係街坊小店,亦適合打吓卡,加上據知咖啡豆由店內咖啡師烘焙,的確幾有誠意。

小店以開放式設計,增加空間感,薄荷綠色柱甚搶眼,座位設於門口,兩邊吧枱正對咖啡機,枱面更放有懷舊卡式帶,而另一邊花園坐位則為後巷位置,都可算係一個寧願角落,要於良心經濟圈分散投資,當然係一間食、一間飲啦,今次編輯就揀呢間飲杯咖啡Chill返吓!

乍看餐牌,Time Coffee既有黑咖啡、白咖啡,亦有手沖咖啡、Coffee Tonic,甚至抺茶、朱古力等係非咖啡飲品。輕食則以貝果、班戟、蛋糕、鬆餅為主,每份約$50至$60,價錢尚算相宜,拍拖兩個人去輕食加咖啡嘅話,人均約$100。

     

Iced Dirty $40 以Espresso配微涼鮮奶,採用Whole Milk,玻璃杯內啡色、奶白色逐漸自然融合,線條層次分明,咖啡置於上層,而鮮奶則為下層,鮮奶份量明顯比咖啡厚重。咖啡豆味帶微酸,入口苦澀味比較搶,其後苦澀味逐漸溶化,奶味平衡苦澀味,充滿層次,而且入口順滑,咖啡味有餘韻。Iced Mocha $50 朱古力味極濃郁,咖啡香完全被朱古力味滲透,入口香滑,唔會過於甜膩。

延伸閱讀﹕樓底特高藏巨型機械人壁畫 葵涌工業區一杯寫意咖啡滲出北歐藝術氣息

延伸閱讀﹕銅鑼灣搬到葵興 商場樓上咖啡店歎寫意下午茶


E.A.Tips﹕

(1) 由葵芳新都會廣場步行,大概5至10分鐘腳程。

(2) 小店有提供燕麥奶選擇。

(3) 枱底會有幾個掛鉤,可以掛袋,幾方便。


Time Coffee

葵芳榮芳路79號葵樂大廈地下F1號舖
09:00 – 18:00
9686 0159

Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ Please Like & Follow & Subscribe /
歡迎讚好、追蹤、訂閱