2021-04-10

銅鑼灣搬到葵興 商場樓上咖啡店歎寫意下午茶

好日咖啡店 Good Day Cafe

75個人瀏覽過





提到葵興,大部份人只諗到工廈區、政府合署,或者低下階層、學校,即使係2017年落成嘅KCC商場,人流都唔算多,甚少人上樓搵食,偏偏商場內就有一間由銅鑼灣鬧市搬入商場高層嘅咖啡店。

呢間以好日命名嘅咖啡店,原址位卡銅鑼灣希雲街,後來移至葵興KCC商場內,更位處8樓高層,以木系、乾花、水泥風格打造。菜式方面,則繼續以花生醬漢堡、芝心炸魚柳為招牌菜式,其他主菜同普遍Cafe差唔多,意粉、飯類、漢堡應有盡有,更有素食選擇。不過,小編今次走去8樓係想坐低食個下午茶,餐牌中有7款Tea Set可擇,價錢平至$48,最貴嘅Egg Benedict配沙律就$98,兩個人都尚且化算。

室內係典型咖啡店裝潢,無咩特別,只係感覺係工廈區內一個小確幸,靠窗位置更可對住蔚藍天空進餐,都算係繁忙工廈業區內嘅寧靜小角落。店內一邊係普通座位,另一邊就係靠近大窗嘅高枱櫈,陽光灑落,玻璃窗滲入微微溫暖光線,變成一個寫意空間,適合拍拖談心。

I Love HK Toast 我愛西多配雪糕 $58,將普通一大塊西多士切成4小舊上碟,配上一小球雲呢嗱軟雪糕,西多士炸成金黃色,表皮輕脆,麵包軟熟,內餡夾有花生醬,花生醬濃而不膩。而軟雪糕溶化得快,雖然盡快食用,建議每次將少量雪糕放上西多士表面,雪糕、西多士冷熱交融下更美味,冷冰冰嘅軟雪糕滲入暖笠笠嘅西多士內,令西多士帶有香甜味,入口鹹中帶甜。

Deep Fried Single Bone Chicken Wings 秘製香草蜜糖炸單骨雞翼 $58,應該有8隻,雞翼色調偏啡,表皮灑有香草,炸得香脆,單骨雞翼比普通雞翼體積較細小,更容易入味,雞翼略帶香甜蜜糖味,不過鹹味稍重。

下午茶免費餐飲有咖啡或橙汁,免費嘅餐飲亦有檸檬蜂蜜、黑糖薑母茶,檸檬蜂蜜茶可熱可冷,黑糖薑母茶就只有熱飲。檸檬蜂蜜茶通透清澈,呈金黃色,視覺效果不俗,既有檸檬香,檸檬滲出酸味,亦有花蜜微甜味,加上稍有茶香,茶內酸中帶甜,加上冰粒後更冰涼清爽。而黑糖薑母茶就入口暖笠笠,黑糖香甜味中夾雜微微辛辣薑味,溫暖潤喉。

小編講吓嘢﹕

當日遇上小插曲,小編嚐過堂食,又試過外賣,堂食感覺到員工都有質素,而且店內好有良心。不過外賣一份下午茶,返去就發現8隻雞翼變成4隻雞翼,另有4隻不翼而飛,只係小編懶得行返轉頭,但今次相信係員工忙中有錯,偶有錯手,可以原諒。


E.A.Tips﹕

(1) Cafe位處KCC商場內,沿Life@KCC嗰棟商場行就得,商場內會見到 阿布生活百貨葵興店,入商場後乘搭電梯上8樓轉彎就見。

(2) 由新葵興花園步行去Life@KCC,然後過天橋,只係約5分鐘腳程;而由新都會廣場步行去Life@KCC,就需約10至15分鐘腳程。

(3) $200以下只接受現金付款,$200以上先可使用Credit Card付款,堂食無加一服務費,但外賣要加$1。

(4) 外賣記得查看清楚先走,要避免有爭拗。


好日咖啡店 Good Day Cafe

葵涌葵昌路72-76號活@KCC8樓801號舖
08:30 – 20:00
6360 0766

Please Like & Follow & Subscribe /
歡迎讚好、追蹤、訂閱