【區區有小店】葵興5間隱藏小店 Cafe寫意悠閒 必試$24最平咖哩飯

[sig_post_pv label=””] 個人瀏覽過

 

 

 

提到葵興,大部份人只諗到工廈區、政府合署,或者低下階層、學校,即使係2017年落成嘅KCC商場,人流都唔算多,甚少人上樓搵食,今次編輯就搵吓葵興區內5間隱藏小店,方便拍拖兩個人搵食啦!

(1)好日咖啡店 Good Day Cafe

第一間係由銅鑼灣鬧市搬到葵興工業區嘅好日咖啡店 Good Day Cafe,目前位處KCC商場高層,小店一端大窗可俯視區內景色。室內有唔少乾花陳設,配合木系、水泥風設計,為典型文青咖啡店,可算係繁忙工商廈之中嘅小確幸。菜式以Burger、意粉、飯類為主,下午茶就比較相宜,一般約$50有交易,當中有7款小食可擇,最平$48,最貴$98,包含西多配雪糕、香草蜜糖單骨雞翼等,套餐有免費餐飲,包括檸檬蜂蜜、黑糖薑母茶,檸檬蜂蜜茶。

延伸閱讀﹕銅鑼灣搬到葵興 商場樓上咖啡店歎寫意下午茶

(2)珍味泉越南粉

另一間係藏於簡陋嘅葵涌中心內嘅珍味泉越南粉,主打越南河Pho,雖然唔係好高水準,但總算係標準嘢,而且全屬街坊價,價錢夠平,$38就有一碗生牛肉湯河。湯底有輕微牛骨味,亦有少少魚露味,牛肉唔多,配料就好多,蔥花、芫荽、金不換、指天椒、青檸仔都有,味道比牛味更濃。

延伸閱讀﹕葵涌隱蔽商場藏街坊價越南河 湯底標準勁多配料

(3)大雞大超級雞排

位於KCC商場內嘅大雞大超級雞排,於屯門、元朗、葵興都有分店,主打炸雞,質素向來可圈可點,不過一份套餐只係$44至$45,都算係平價食物,打工仔、學生哥都可以負擔得來。雖然炸雞係比較出名,但編輯覺得炸雞好一般,反而鹵雞比較有水準,入味而鹹度唔重。

延伸閱讀﹕一度被淘汰 網民熱推大雞大炸雞 鹵雞仲好食?

(4)野菜咖哩事務所

隱藏於馬路邊微舖角落嘅野菜咖哩事務所,主打日式咖哩,可配搭豬、牛或雞,午餐、下午茶都會配上一杯綠茶,最值得試嘅原因係下午茶最平係$24,最貴亦只係$34,絕對超值!一碗咖哩飯,堂食比外賣份量多少少,而且醬汁亦較多,不過兩者都份量充足,對得住呢個價錢有餘。既有咖哩汁,小店亦有蕃茄汁、日式燉飯等,同樣配搭豬牛雞,編輯覺得日式蕃茄醬汁比咖哩更有水準。

延伸閱讀﹕葵涌中心馬路邊百呎微舖 大大碗咖哩飯最平24蚊!

(5)Relax Coffee

至於Relax Coffee就係一間小型咖啡店,位於KCC商場地下,靠近工業大廈一邊,稍為偏僻。店內空間唔多,但咖啡有心思,大多為手沖咖啡。而咖啡豆來自台灣,可以選擇符合自己口味嘅咖啡,手沖咖啡一般唔太苦澀,而Latte、Mocha更有拉花圖案。更特別嘅係除咗鬆餅、牛角包、玉桂卷等輕食,更有豆腐櫻花蛋糕切餅,味道清新,滑溜而唔甜膩。

延伸閱讀﹕葵涌良心小店 工業區驚喜咖啡




Δ 版權為E.A.Two 兩個人醫吓肚所有,歡迎轉貼連結,勿全篇文章轉載

Δ 如果覺得我哋嘅介紹啱睇,就Like吓我哋Facebook / Follow吓我哋Instagram啦!